اقتاۋدا بيىل اۋتيستىك سپەكترى بۇزىلعان جانە مەنتالدىق دامۋى تەجەلگەن بالالارعا ارنالعان وڭالتۋ ورتالىعى اشىلادى, دەپ حابارلايدى Egemen.kz ماڭعىستاۋ وبلىسى قوعامدىق كوممۋنيكاتسيا ورتالىعىنا سىلتەمە جاساپ.
وبلىس حالقىنىڭ 32 مىڭعا جۋىعىن مۇگەدەكتىگى بار ادام قۇرايدى. ونىڭ ىشىندە 18 جاسقا دەيىنگى مۇگەدەكتىگى بار بالالار سانى — 7 313. ماڭعىستاۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ارناۋلى الەۋمەتتىك قىزمەتتەردى ۇيلەستىرۋ ءبولىمىنىڭ باسشىسى مۋمينات مۋسينانىڭ ايتۋىنشا بۇل كورسەتكىش جىلدان جىلعا ءوسىپ كەلەدى.
− ستاتيستيكا دەرەكتەرىنە سايكەس, ەرەكشە مۇقتاجدىعى بار بالالار سانى جىل ساناپ ارتىپ كەلەدى. وبلىس بويىنشا مۇگەدەكتىگى بار بالالاردى الەۋمەتتىك قورعاۋ ماسەلەسىن جولعا قويۋ جان-جاقتى ويلاستىرىلعان. الايدا قازىرگى تاڭدا وبلىس كولەمىندە ءاۋتيزمى بار بالالارعا ارنالعان مەملەكەتتىك ارناۋلى الەۋمەتتىك قىزمەتتەر كورسەتەتىن ورتالىقتار نەمەسە وڭالتۋ ورتالىقتارى جوق. مۇنداي ورتالىقتار رەسپۋبليكا دەڭگەيىندە دە جوقتىڭ قاسى. وسىعان بايلانىستى بارلىق وبلىس ورتالىقتارىندا ءاۋتيزمى بار بالالارعا ارنالعان جارتىلاي ستاتسيونارلىق جاعدايدا وڭالتۋ ورتالىعىن اشۋ تۋرالى تاپسىرمالار ءتۇستى, − دەدى مۋمينات مۋسينا.
بۇل ماقساتتا وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى 9-شاعىناۋداندا ورنالاسقان № 42 عيماراتتى ءوز تەڭگەرىمىنە الىپ, عيماراتقا جوبالاۋ – ىزدەستىرۋ جۇمىستارىن جۇرگىزگەن. ورتالىقتىڭ جوبالىق-سمەتالىق قۇجاتتاماسىن جاساقتاۋ ماقساتىندا وبلىستىق بيۋدجەتتەن قارجى ءبولىندى.