2023 جىلى تۋريزم جانە سپورت مينيسترلىگى قۇرعان ارنايى چات-بوتتارعا زاڭسىز ويىن بيزنەسىنە كۇدىكتى ورىندارىن كورسەتىپ 100 ادام شاعىمدانعان. مينيسترلىك ازاماتتاردىڭ لۋدومانياعا قارسى بىرلەسكەن بەلسەندى كۇرەسى ەلىمىزدەگى وسى ماسەلەنى شەشۋگە مول ۇلەس ەكەنىن اتاپ ءوتتى, دەپ جازادى Egemen.kz.
مينيسترلىك 2023 جىلدىڭ قاراشا ايىنان باستاپ «Telegram» (https://t.me/stop_online_casino_bot) جانە «WhatsApp» (+7 707 9071507) مەسسەندجەرلەرىندە چات-بوتتاردى ىسكە قوستى.
تۇرعىندار ارنايى ارنالار ارقىلى زاڭسىز ويىن بيزنەسى, بۋكمەكەرلىك كەڭسە, ۇتىس ويىندارى مەن ينتەرنەتتە كۇدىك تۋدىراتىن جارناما نىشاندارىن بايقاسا, ءتارتىپ بۇزۋدىڭ الدىن الۋ ءۇشىن جەدەل حابارلاۋعا بولادى.
«بۇگىنگى كۇنى مينيسترلىكتىڭ چات-بوتىنا 100-دەن ءاستام وتىنىش كەلىپ ءتۇستى. بۇدان باسقا, مينيسترلىك زاڭسىز جەلىلىك رەسۋرستاردىڭ ۇيىمداستىرۋشىلارى مەن بەنەفيتسيارلارى بولىپ تابىلاتىن قازاقستان ازاماتتارىنا قاتىستى قۇقىقتىق باعالاۋ, زەردەلەۋ جانە تەكسەرۋ جۇرگىزۋ ءۇشىن ءتيىستى ماتەريالداردى قۇقىق قورعاۋ ورگاندارىنا ۇسىنادى. سونىمەن قاتار مينيسترلىك قۇقىق قورعاۋ ورگاندارىمەن جانە اقپارات سالاسىنداعى ۋاكىلەتتى ورگانمەن بىرلەسىپ, ۇنەمى «كيبەرنادزور» اقپاراتتىق جۇيەسىن پايدالانا وتىرىپ ينتەرنەت جەلىسىندە زاڭعا قايشى كونتەنتتى تاراتۋعا قارسى كۇرەس جۇرگىزەدى», دەلىنگەن مينيسترلىك حابارلاماسىندا.
«كيبەرنادزور» اقپارات جۇيەسىنە ينتەرنەت-كازينو قىزمەتىنىڭ بەلگىلەرى بار 8284 ماتەريال سالىنىپ, ونىڭ ىشىندە مازمۇندى زەردەلەۋ ناتيجەسىندە 4459 سايت بۇعاتتالعان.
ايتا كەتەيىك, قازاقستاندا ويىن بيزنەسىنە مينيسترلىكتىڭ ليتسەنزياسى نەگىزىندە الماتى جانە اقمولا وبلىسىندا ورنالاسقان ەكى اۋماقتا عانا قىزمەت ەتۋگە رۇقسات ەتىلگەن. وسى ەرەجەنى اتتاپ ءوتىپ, زاڭسىز ويىن ۇيىمداستىرعان ازاماتتاردىڭ ايىبى انىقتالسا 7 جىلعا دەيىن باس بوستاندىعىنان ايىرۋ, قىلمىستىق تابىسىنىڭ 20 ەسەلەنگەن مولشەرىندە ايىپپۇل ارقالاپ, مۇلكىن تاركىلەۋ تۇرىندە قىلمىستىق جاۋاپكەرشىلىككە تارتىلادى.