مۇنايلى شاھاردا تانىمال تۇلعالاردىڭ ەسىمى بەرىلگەن ءبىلىم ورداسى از ەمەس. سونىڭ ءبىرى ق.قايسەنوۆ اتىنداعى №33 ورتا مەكتەپ جىلىوي اۋدانىنداعى سارىقامىس ەلدى مەكەنىنىڭ تۇرعىندارى وبلىس ورتالىعىنا كوشىرىلگەندە سالىنعان.
جاقىندا اتالعان ءبىلىم ورداسىنىڭ 8-سىنىپ وقۋشىلارىن قۇتقارۋشى كاسىبىنىڭ قىر-سىرىنا وقىتۋ باستالدى. قۇتقارۋشى فورماسىن كيگەن وقۋشىلار انت بەرىپ, ارنايى كۋالىك الدى. اتىراۋ قالالىق توتەنشە جاعدايلار باسقارماسىنىڭ باستىعى عابيت باباەۆتىڭ ايتۋىنشا, «جاس قۇتقارۋشى» سىنىبى – وقۋشىلاردى قۇتقارۋشى كاسىبىنە باۋلۋداعى العاشقى قادام. ارنايى سىنىپ بولمەسى قۇتقارۋشىلار قولدانىلاتىن قۇرال-جابدىقتارمەن قامتىلعان.
– وڭىردەگى العاشقى سىنىپتىڭ ەكىنشى دۇنيەجۇزىلىك سوعىستىڭ ەرجۇرەك باتىرى, ايگىلى پارتيزان, قازاقتىڭ قايتالانباس داڭقتى پەرزەنتى قاسىم قايسەنوۆ اتىنداعى مەكتەپتە اشىلعانى كوڭىل قۋانتىپ وتىر. «جاس قۇتقارۋشى» سىنىبىن اشۋدىڭ بىرنەشە ماقساتى بار. بىرىنشىدەن, وقۋشىلاردىڭ قۇتقارۋشى ماماندىعىنا قىزىعۋشىلىعىن وياتۋ. ەكىنشىدەن, قۇتقارۋ ءىسىنىڭ نەگىزدەرىن, توتەنشە جاعدايلاردى جويۋ مەن زارداپ شەككەندەرگە العاشقى كومەك كورسەتۋدىڭ داعدىلارى وقىتىلادى. ۇشىنشىدەن, وقۋشىلار اراسىندا سالاماتتى جانە قاۋىپسىز ءومىر سالتى ناسيحاتتالادى, – دەيدى عابيت باباەۆ.
توتەنشەلىكتەر جاس قۇتقارۋشىلارعا «العاشقى كومەك كورسەتۋ» تاقىرىبىندا ارنايى ءدارىس وتكىزدى. «جاس قۇتقارۋشى» سىنىبىنىڭ وقۋشىسى ەرنار سماديار بولاشاعىن اتالعان سالامەن بايلانىستىرۋدى كوزدەپ وتىر.
– كۇندەلىكتى تىرلىكتە ءتۇرلى جاعداي كەزدەسەدى. اسىرەسە, ءورت, تەحنوگەندىك اپات بولسا, الدىمەن قۇتقارۋشىلار قولۇشىن سوزادى. بۇل كاسىپ يەلەرىنىڭ جۇمىسى قيىن ەكەنىن بىلەمىن. بىراق تاجىريبەنى شىڭداۋ ارقىلى قيىندىقتى ەڭسەرۋگە بولادى. وسى ماماندىقتى تاڭداۋعا كوڭىلىم اۋىپ وتىر. سول سەبەپتى توتەنشە جاعدايلار سالاسىنىڭ فورماسىن كيىپ, «جاس قۇتقارۋشى» كۋالىگىن الدىم. ۇزدىك وقيمىن, بوكس سەكتسياسىنا قاتىسىپ ءجۇرمىن. بۇل ادامزاتتى ءتىلسىز جاۋدان قۇتقاراتىن بىلىكتى مامان بولۋىما ىقپال ەتەدى, – دەيدى «جاس قۇتقارۋشى» ەرنار سماديار.
اتىراۋ قالالىق توتەنشە جاعدايلار باسقارماسىنىڭ باستىعى عابيت باباەۆتىڭ ايتۋىنا قاراعاندا, «جاس قۇتقارۋشى» سىنىبىنىڭ وقۋشىلارىنا ءتۇرلى ەكسكۋرسيا ۇيىمداستىرىلادى. سونداي-اق ارنايى ساباقتار وتكىزۋ جوسپارلانعان.
اتىراۋ وبلىسى