جۋىردا اقان سەرى اتىنداعى سولتۇستىك قازاقستان وبلىستىق فيلارمونياسىنىڭ ەسترادالىق-سيمفونيالىق وركەسترى ءۇندىستان ەلىنە بارىپ, ونىڭ مۋمباي, دەلي, بانگولور, مايسوري دەگەن قالالارىنا گاسترولدىك ساپارعا شىعىپ, قازاق ونەرىنىڭ تابىستارىن كورسەتىپ كەلدى. ءبىز وسى ۇجىمنىڭ ديرەكتورى بوتاگوز اقماعامبەتوۆاعا جولىعىپ اڭگىمەلەسكەن ەدىك.
ونىڭ ايتۋىنا قاراعاندا, گاسترولدىك ساپاردىڭ ۇيىمداستىرىلۋىنا ءۇندىستاننىڭ قازاقستانداعى ەلشىسى دوكتور ناگەندرا پراسات مىرزا ۇيىتقى بولعان. ول پەتروپاۆلعا كەلگەن ساپارىندا استاناداعى ءۇندى مادەني ورتالىعىمەن بايلانىسىپ, فيلارمونيادا ولاردىڭ بيلەرىن, يوگا ونەرىن ۇيرەنىپ جۇرگەن قىزىلجارلىق جاستارعا ريزا بولىپ, ونەرلى جاستاردىڭ ۇندىستانعا دا بارىپ, ونەرلەرىن كورسەتۋى تۋرالى ۇسىنىس جاساپتى.
جاڭا جىلدان كەيىن استانانىڭ 35 ادامدىق كامەرالىق حورى دا ۇندىستانعا بارا جاتقانىن بىلگەن سوڭ ءبىزدىڭ فيلارمونيا ۇجىمى دا سولارمەن بىرگە گاسترولدىك ساپارعا شىعادى. ءۇندىستان ەلىندە ولاردىڭ كولىك, تاماق شىعىندارىن قارسى الۋشى جاق كوتەرگەن.
«35 ادامدىق وركەستردىڭ جولساپارىنا جەتەتىن قاراجاتتى وزدەرىنىڭ اقىلى قىزمەتتەرىنەن تۇسكەن قاراجات ءارى اكىمدىكتىڭ قولداۋىمەن تاپتىق. ديريجەرىمىز الماس مۇحيتدينوۆتى توپتىڭ جەتەكشىلىگىنە تاعايىندادىق. ءار قالادا ءبىر رەتتەن كونتسەرت قويدىق. ونى دومبىراشىمىز اسحات گاليەۆ اشىپ وتىردى. ەكى شەكتى دومبىرادان وسىنشالىق كەرەمەت اۋەن توگىلگەنى ۇندىلىكتەردى تاڭ قالدىرعانىن كورىپ, شاتتانىپ وتىردىق. فلەيتاشى قىزىمىز تامارا پورفيرەۆانىڭ ونەرىنە دە كورەرمەندەر بارىنشا ريزا بولدى. باسقا دا ءان-كۇيلەرىمىز, مۋزىكالىق ورىنداۋلارىمىز كورەرمەندەردى ابدەن ريزا قىلدى. ۇندىلەر ءبىزدىڭ ونەرپازداردان مۇندايدى كۇتپەگەن سياقتى, بارىنشا تاڭ قالىپ, قول سوقتى. مۋمباي قالاسىندا وسىنداعى ۇلكەن سيمفونيالىق وركەسترگە جەتەكشىلىك ەتىپ جۇرگەن جەرلەسىمىز مارات بەيسەنعاليەۆپەن دە كەزدەستىك. ءبىزدىڭ كونتسەرتتەرىمىزگە ۇندىلىك انشىلەر مەن بيشىلەر دە قوسىلىپ وتىردى. مۋمباي قالاسىندا لاكشميناريان اتتى وزدەرىنىڭ مۋزىكالىق فەستيۆالىنە ءبىزدىڭ ونەرپازدارىمىز قوناق رەتىندە قاتىسىپ, ونەرلەرىن كورسەتتى. گازەتتەر ءبىزدىڭ ونەرپازدارىمىز تۋرالى «الەمدىك دارەجەدەگى وركەستر» دەپ ماقتاپ جازعاندارىنا قاتتى قۋاندىق», دەدى ول.
قازاق ونەرپازداردى قازاق, ورىس, ەۋروپا ەلدەرى جانە ءۇندىنىڭ كەڭ تاراعان كومپوزيتورلارىنىڭ شىعارمالارىن ورىنداعان. ءسويتىپ, ءۇندى حالقىنىڭ ونەر سۇيەر قاۋىمى قازاقستان ونەرىمەن كەڭىنەن تانىسىپ, ونىڭ جەتىستەرىن كورىپ, مۋزىكانتاردىڭ ۇلتتىق جانە الەمدىك اسپاپتارمەن شەبەر وينايتىندىعىنا ءتانتى بولعان. شىن مانىندە «مۋزىكادا شەكارا جوق» دەگەن وسى شىعار.