قاراعاندى وبلىسى بۇقار جىراۋ اۋدانىندا ەكى قاباتتى ۇيدە جارىلىس بولدى. قۇتقارۋ جۇمىستارى تولىعىمەن اياقتالدى. ءۇيىندى استىنان 2 ادامنىڭ ءمايىتى مەن جاراقات العان 5 ادام شىعارىلدى, دەپ حابارلايدى Egemen.kz.
وقيعا تۋرالى قاراعاندى وبلىسى تجد باستىعى مۇرات قاتپانوۆ Instagram پاراقشاسىندا جازدى. جارىلىس 30 قاڭتار ساعات 00:07-دە بۇقار جىراۋ اۋدانى, بوتاقارا اۋىلىندا, اۋەزوۆ, 8ا مەكەنجايىنداعى ەكى قاباتتى ۇيدە بولدى. الدىن الا بولجام بويىنشا 12 پاتەرلى تۇرعىن ءۇيدىڭ №10 پاتەرىندە تۇرمىستىق گاز باللونى جارىلعان.
جارىلىس سالدارىنان پاتەردىڭ شاتىرى, ونىڭ قابىرعالارى مەن جابىندىلارى تولىق وپىرىلىپ تۇسكەن. ءبىرىنشى قاباتتا ورنالاسقان جالپى اۋدانى 300 شارشى № 7 پاتەرگە دە قاتتى زاقىم ءتيىپ, ونىڭ قابىرعالارى دا قۇلاعان. سونداي-اق توتەنشە جاعداي كەزىندە ءبىرىنشى قاباتتاعى № 5, 6, 8, ەكىنشى قاباتتاعى № 11, 12 پاتەرلەر جارتىلاي زاقىمدانعان. ۇيدە بارلىعى 46 ادام تۇرادى, جارىلىس كەزىندە ۇيدە 35 ادام بولعان.
«ساعات 00:11-دەن باستاپ 03:37-دەن قۇتقارۋ جۇمىستارى كەزىندە ءۇيىندى استىنان 1973 جىلعى ەر ادام مەن 1974 جىلعى ايەل ادامنىڭ ءمايىتى تابىلدى. ءتۇرلى دەنە جاراقاتىمەن بۇقار جىراۋ اۋداندىق اۋرۋحاناسىنا 3 بالا جەتكىزىلدى», دەدى م.قاتپانوۆ.
اۋداندىق اۋرۋحانا ديرەكتورىنىڭ مىندەتىن اتقارۋشى دانيار قوجاباەۆتىڭ سوزىنشە, ءبىر بالانىڭ دەنەسىن 80 پايىز كۇيىك شالعان. ءبىر بالا قاراعاندىداعى اۋرۋحاناعا جونەلتىلگەن.
وقيعا ورنىندا جەدەل شتاب قۇرىلدى. جۇمىسقا 139 ادام مەن 32 تەحنيكا جۇمىلدىرىلدى. قۇتقارۋ جۇمىستارى تولىعىمەن اياقتالدى. قاراعاندى وبلىسىنىڭ توتەنشە جاعدايلار دەپارتامەنتىندە 8-7212-517223 سەنىم تەلەفونى اشىلىپ, 25 ازاماتقا جەدەل پسيحولوگيالىق كومەك كورسەتىلدى.