اۋىر اتلەتيكادان 2006 جىلعى جازعى ازيا ويىندارىنىڭ جەڭىمپازى ۆياچەسلاۆ ەرشوۆ قايتىس بولدى, دەپ حابارلايدى Egemen.kz.
اۋىر اتلەتيكا فەدەراتسياسى الەم چەمپيوناتىنىڭ قاتىسۋشىسى, قازاقستاننىڭ بىرنەشە دۇركىن چەمپيونى ۆياچەسلاۆ ەرشوۆتىڭ دۇنيەدەن وزعانىن راستادى.
- قازاقستان رەسپۋبليكاسى اۋىر اتلەتيكا فەدەراتسياسىنىڭ كومانداسى ۆياچەسلاۆتىڭ تۋعان-تۋىستارى مەن جاقىندارىنىڭ قايعىلارىنا ورتاقتاسىپ, قايعىرىپ كوڭىل ايتادى, - دەپ جازىلدى فەدەراتسيانىڭ جەلى پاراقشاسىندا.
ايتا كەتەيىك, ۆياچەسلاۆ ەرشوۆ 2013 جىلى سپورتشى مايا مانەزامەن وتاۋ قۇرعان بولاتىن. ەكەۋىنىڭ ەكى بالاسى بار. ازىرگە اۋىر اتلەتتىڭ نەدەن قايتىس بولعانى تۋرالى اقپارات جوق. الەۋمەتتىك جەلىدە دوستارى كوڭىل ايتىپ جاتىر.
فوتو: مارينا ۆلاسوۆا