پرەمەر-مينيستر ءاليحان سمايىلوۆتىڭ توراعالىعىمەن وتكەن ەكونوميكانى جاڭعىرتۋ ماسەلەلەرى جونىندەگى مەملەكەتتىك كوميسسيانىڭ وتىرىسىندا «Air Astana» اۋە كومپانياسىن IPO-عا شىعارۋ ماسەلەلەرى تالقىلاندى.
IPO جەكەشەلەندىرۋدىڭ 2021-2025 جىلدارعا ارنالعان كەشەندى جوسپارىن جۇزەگە اسىرۋ اياسىندا بيىل وتۋگە ءتيىس ەكەنى ايتىلدى. بۇگىندە «سامۇرىق-قازىنا» اق مەن «Air Astana» كومپانياسى حالىقارالىق كەڭەسشىلەرمەن بىرگە ۇلكەن دايىندىق جۇمىستارىن جۇرگىزىپ جاتىر.
جيىندا قارالعان وزەكتى ماسەلە – بيىل 29 قاڭتار مەن 8 اقپان ارالىعىندا جوسپارلانعان وتىنىشتەردى قابىلداۋ ۇدەرىسىن باستاۋ ءۇشىن كومپانيانىڭ ءبىر قاراپايىم اكتسياسى مەن ءبىر عالامدىق دەپوزيتارلىق قولحاتىنىڭ باعا دياپازونىن انىقتاۋ.
ەستەرىڭىزگە سالا كەتەيىك, IPO (Initial Public Offering) – ينۆەستيتسيا تارتۋ ماقساتىندا كومپانيا اكتسيالارىن قور بيرجاسىندا باستاپقى ورنالاستىرۋ. IPO كەزىندە كومپانيا اشىق اينالىمعا اكتسيالارىن شىعارادى, ولاردى ينستيتۋتسيونالدى ينۆەستورلار دا, جەكە ينۆەستورلار دا ساتىپ الا الادى.