موڭعوليادا تۇڭعىش بۇركىت باپتاعان ايشولپان نۇرعايىپتىڭ وتباسى تاريحي وتانى قازاقستانعا ورالدى. بۇركىتشى قىزدىڭ ءوزى بۇعان دەيىن ەلگە كەلىپ, قازىرگى تاڭدا س.دەميرەل اتىنداعى ۋنيۆەرسيتەتتە قازاق ءتىلى مەن ادەبيەتى ماماندىعىنىڭ 4-كۋرسىندا وقىپ ءجۇر, دەپ جازادى Egemen.kz kaz.inform.kz-كە سىلتەمە جاساپ.
موڭعوليادا ايشولپانعا دەيىن ەشقانداي قىز بالاسى قولىنا بۇركىت قوندىرماعان. 6 جاسىنان اتقا مىنگەن ارۋدىڭ بۇركىت باپتاۋى اعاسىنىڭ اسكەرگە كەتۋىمەن تۇس كەلگەن. ونىڭ بۇركىتشى قىز رەتىندە الەمگە تانىلۋىنا يزرايلدىك فوتوگراف اشەر سۆيدەنسكيدىڭ ايشولپاندى ارنايى ىزدەپ بارىپ, سۋرەتكە ءتۇسىرۋى سەبەپ بولعان.
بۇركىتشى قىزدىڭ ءوزى 2018 جىلدان بەرى ەلدە ءبىلىم الىپ ءجۇر. ال اتا-اناسى 1 اپتا بۇرىن شىعىس قازاقستان وبلىسىنا كوشىپ كەلدى. ونىڭ وتباسى شىرايلى شىعىستى تابيعاتى كوركەم, قۇس باپتاۋعا قولايلى ءوڭىر بولعاندىقتيان تاڭداعان.
«مەن قازاقستاندامىن, ءبىر اپتاداي بۇرىن اتا-انام مەن باۋىرلارىم كوشىپ كەلدى. ءوزىم الماتىداعى س.دەميرەل اتىنداعى ۋنيۆەرسيتەتتە قازاق ءتىلى مەن ادەبيەتى ماماندىعى بويىنشا 4-كۋرستا وقىپ جاتىرمىن. قازىر ماماندىعىم بويىنشا جۇمىس قاراستىرىپ جاتىرمىن», دەدى ايشولپان نۇرعايىپ.
ول وقۋ مەن قاتار بۇركىت باپتاپ, جاتتىعۋ جۇمىستارىن جالعاستىرىپ ءجۇر.
«وقۋ مەن بۇركىتپەن اينالىسۋدى قاتار الىپ ءجۇرمىن. اپتاسىنا ءبىر رەت اينالىسامىن. جارىستارعا قاتىسىپ جۇرگەن جوقپىن, تەك قوناق رەتىندە بارامىن. سەبەبى وقۋدان قول تيمەيدى», دەدى بۇركىتشى قىز.