«KEGOC» اق بىلتىرعى جۇمىسىن قورىتىندىلادى. وتكەن جۇمادا وتكەن ءباسپاسوز بريفينگىندە ايتىلعان دەرەكتەر بويىنشا اتالعان كومپانيانىڭ جالپى پايداسى 2022 جىلمەن سالىستىرعاندا 39 پايىزعا, ياعني 50,9 ملرد تەڭگەدەن 70,5 ملرد تەڭگەگە دەيىن وسكەن.
بريفينگتە ايتىلعانداي, ەلىمىزدە ەلەكتر ەنەرگياسىن تۇتىنۋ 1,9 پايىزعا ارتقان. ال ءتۇسىم 251,9 ملرد تەڭگەنى قۇراپ وتىر. «KEGOC» اق باسقارما توراعاسى ءنابي ايتجانوۆتىڭ ايتۋىنشا, بۇل كورسەتكىش ءوسىم نەگىزىنەن رەتتەلەتىن قىزمەتتەر بويىنشا كولەمدەر مەن تاريفتەردىڭ ءوسۋى جانە وپەراتسيالىق شىعىنداردى وڭتايلاندىرۋ ەسەبىنەن قالىپتاسىپ وتىر. سونىمەن كومپانياداعى تازا پايدا وتكەن جىلدىڭ قورىتىندىسىمەن 42,7 ملرد تەڭگە بولسا, بۇل 2022 جىلمەن سالىستىرعاندا 60 پايىزعا جوعارى. ول جىلى كومپانيا پايداسى 26,7 ملرد تەڭگەنى قۇراعان ەدى. ءبىر قىزىعى, بىلتىر كومپانيانىڭ تازا پايداسى 31,5 ملرد تەڭگە بولادى دەپ الدىن الا بولجانعان ەدى. بۇگىندە «KEGOC» اق بولجانعان قارجىنىڭ ءوسۋىن ەسكەرىپ, ەكىنشى جارتىجىلدىقتا تولەنەتىن ديۆيدەند كولەمىن ۇلعايتۋ ماسەلەسىن قاراۋدا. باسقارما توراعاسى مۇنداي شەشىم اكتسيونەرلەر ءۇشىن دە, الەۋەتتى ينۆەستورلار ءۇشىن دە وڭ سەرپىن بولاتىنىن اتاپ ءوتتى.
– وتكەن جىلدىڭ ەكىنشى جارتى جىلدىعىنىڭ قورىتىندىسى بويىنشا ديۆيدەندتەر تولەۋ بيىل ەكىنشى توقسانىندا جۇزەگە اسىرادى. كومپانيادا ديۆيدەندتىك ساياسات جاڭارتىلدى, وعان سايكەس, ونى تولەۋگە تازا پايدانىڭ كەمىندە 60 پايىزى جۇمسالادى. «KEGOC» اق اكتسيونەرلەرىنە ديۆيدەندتەر جىلىنا ەكى رەت تولەنەدى. بىلتىر ءبىرىنشى جارتىجىلدىق بويىنشا كومپانيا 20,2 ملرد تەڭگە مولشەرىندە ديۆيدەندتەر تولەدى, – دەدى ن.ايتجانوۆ.
سونداي-اق كومپانيا جاڭا جوبالاردى ەنگىزۋ جانە قولدانىستاعى جەلىلەردى جاڭعىرتۋدى جالعاستىرا بەرمەك. ال بىلتىرعى قورىتىندى بويىنشا باتىس ەنەرگيا تورابىنىڭ ەلەكتر جەلىلەرىن كۇشەيتۋ بويىنشا ءىرى ينۆەستيتسيالىق جوبانىڭ اياقتالۋىن ايتۋعا بولادى. بۇل جوبا وسى جەلىلەردىڭ قىزمەت ەتۋ مەرزىمىن 30 جىلدان اسا ۋاقىتقا ۇزارتتى. ال بۇگىندە ءبىرتۇتاس ەلەكتر ەنەرگەتيكالىق جۇيەسىنىڭ وڭتۇستىك ايماعىن نىعايتۋ جوباسى باستالىپ كەتكەن. جوبادا جامبىل جانە تۇركىستان وبلىستارىنىڭ 500 كۆ-تىق ەلەكتر جەلىلەرىن كۇشەيتۋ, ونىڭ ىشىندە ءۇش قوسالقى ەلەكتر ستانساسىن كەڭەيتە وتىرىپ, 500 كۆ-تىق «شۋ – جامبىل – شىمكەنت» اۋە جەلىسىن سالۋ قاراستىرىلىپتى.
ايتا كەتەيىك, بۇگىندە كومپانيانىڭ بالانسىندا ۇزىندىعى شامامەن 27 مىڭ شاقىرىم, كەرنەۋى 220-1150 كۆ ەلەكتر جەلىلەرى مەن ترانسفورماتورلارىنىڭ بەلگىلەنگەن قۋاتى 38,99 گۆا بولاتىن 83 قوسالقى ەلەكتر ستانساسى بار.