پارلامەنت ءماجىلىسىنىڭ دەپۋتاتى, ايتىسكەر اقىن رينات زايىتوۆ شىعارماشىلىعىنداعى سوڭعى جاڭالىعىن ءبولىستى, دەپ حابارلايدى Egemen.kz.
- اۋەلدەن ونەر ادامى ەكەنىم بارىڭىزگە ايان. بىراق, ءومىردىڭ بۇرالاڭ جولى مەنى ساياسات ساحناسىنا الىپ كەلدى. بۇگىندە ءار كۇنىم كەشەگى كورەرمەندى ساعىنۋمەن وتەدى. كەيىنگى ون ايدا ەسىمە تۇسەتىن باقىتتى ساتتەرىم اسا كوپ ەمەس, - دەدى اقىن.
ول سونداي ساتتەردىڭ ەڭ ءتاتتىسى – وسىدان ەكى جىل بۇرىن وتكەن شىعارماشىلىق كەشى ەكەنىن اتاپ ءوتتى. سودان بەرى قاربالاس جۇمىستاردان ۋاقىت ۇنەمدەپ, كوپشىلىكپەن تاعى ءبىر جۇزدەسۋدىڭ رەتىن كەلتىرۋگە بارىن سالىپ جاتقانىن دا جەتكىزددى.
- شۇكىر. ونىڭ دا ورايى كەلگەن سياقتى.
سونىمەن, اقپان ايىنىڭ 10-ى كۇنى, الماتىدا. رەسپۋبليكا سارايى. ساعات 19:00-دە وزدەرىڭىزدى «ابايلاڭىزدار» اتتى مۋزىكالىق كەشكە شاقىرامىن.
كەش تۇگەلدەي جاندى داۋىستا وتەدى. وزدەرىڭىزگە تانىلعان اندەردى قازاق ساحناسىنىڭ جۇلدىزدارى: مەيرامبەك بەسپاەۆ, عادىلبەك جاڭاي, «زامان» توبى, نۇرجان شوكەنوۆ, ماقپال يسابەكوۆا, ەرمەك مەدەنوۆ, بيبىگۇل قيلىمحان, اسەت ەسجان, ايساۋلە قايىرعازينا, ۇلجان اعلاقوۆا, ناريمان ءابدىراحمانوۆ, ازات دۋلات ۇلى, قۇرالاي وتەپوۆا, ەرسەيىت اليەۆ ت.ب. «الاتاۋ» ءانسامبلىنىڭ سۇيەمەلدەۋىمەن ورىندايدى.
ۋاقىت تاۋىپ, كەلگەن كورەرمەن وكىنبەيدى. ءبىز سىزدەردى ساعىنا كۇتەمىز!
P.S. مەملەكەت قارجىسىنان ءبىر تيىن دا جۇمسالمايدى, – دەپ جازدى ايتىسكەر اقىن.