كورىپكەلگە جوعالعان ادامداردىڭ ەلەسى كورىنگەن, دەپ حابارلايدى Egemen.kz.
"استانا" ارناسىنىڭ مالىمەتىنشە, مايقايىڭداعى التىن شاحتاسىنا قۇلاپ, تابىلماي جاتقان قۇتقارۋشىلاردىڭ تۋىستارى كورىپكەل شاقىردى.
ول اپات ورنىنا ارنايى كەلىپ, اۆتوبۋستىڭ بولجالدى ورنىن ايتقان. ونىڭ سوزىنشە, باقسىعا ەكى ادامنىڭ دا ەلەسى كورىنگەن. قۇتقارۋشىلارعا شۇڭقىرداعى قىزعىلت ءتۇستى جەردى قازۋدى ءوتىنىپتى. قازىر وقيعا ورنىندا ىزدەۋ جۇمىستارى جۇرگىزىلىپ جاتىر.
- مەن كەنەت كەتىپ بارامىن. ءوزىمنىڭ كوزقاراسىمدى ولارعا ايتتىم. بۇل - جەردەن سومكەنى الىپ كوتەرە سالاتىن نارسە ەمەس قوي. مەنىڭ ويىمشا بۇگىن تۇنگە دەيىن ۇلگەرسە ۇلگەرەدى, ۇلگەرمەسە ەرتەڭ ول جەر تۋرالى ەستيتىن بولامىز. سەبەبى, ونى كورسەتكەندەي بولدىم. ەكى ادام دا ماعان كورىندى. سول مەن كورسەتكەن جەردەن تابىلادى دەپ ۇمىتتەنەمىن. مەن بارا جاتقاندا-اق ماعان ارۋاقتار ايان بەردى. بارعان سوڭ شۇڭقىردان قىزعىلت ءتۇستى كورەسىڭ, سول جەردە جاتىر دەدى. مەن بارعاندا قىزعىلت ءتۇستى اۋماقتى كوردىم. قازىر سول جەردى قازىپ جاتىر, - دەيدى كورىپكەل.
وبلىستىق توتەنشە جاعدايلار دەپارتامەنتى ەشقانداي باقسى شاقىرماعاندارىن حابارلادى. ال كورىپكەلدى جوعالعان ادامنىڭ تۋىستارى الدىرتقانىن راستادى. بىراق, ىزدەۋ جۇمىستارى باقسى ايتقان جەردەن ەمەس, گەوراداردىڭ كومەگىمەن جاسالىنىپ جاتقانىن جەتكىزدى.