تالدى اۋىلىندا شاعىن ناۋبايحانا جۇمىسىن باستادى. ەندى اۋىل تۇرعىندارى قالاداعى دۇكەن سورەلەرىنەن نان ونىمدەرىن تاسىپ اۋرە بولمايدى.
كاسىپ يەسى – ەركەش تۇسىپقىزى. ناۋبايحانانىڭ اشىلۋ راسىمىنە تالدى سەلولىق وكرۋگىنىڭ اكىمى نۇرلان امان ۇلى قاتىسىپ, كاسىپكەردىڭ باستاعان ىسىنە تابىس تىلەدى.
– بۇگىنگە دەيىن اۋىلداعىلار ناندى قالادان تاسيتىن. ۇستەمە باعاسى دا قىمباتتاۋ. سوندىقتان وسىدان ەكى اي بۇرىن تالدى, بەرەكەت, بايبالا, اقباۋىر مەن اقشوقى, اققياق اۋىلدارىنا ورتاق ناۋبايحانا اشۋدى جوسپارلاعان ەدىك. كاسىپكەر ەركەش تۇسىپقىزىنا وسى ءىستى تاپسىرىپ, قولدان كەلەر بارلىق كومەگىمىزدى بەردىك. قاراعاندىداعى «ايسارا» ديىرمەنى مەن اۋىل اكىمدىگىنىڭ كەلىسىمى بويىنشا ارزان ۇن الىپ تۇرۋ كەلىسىلدى. دەمەۋشىلىك جاساپ وتىرعان ديىرمەن باسشىسى بيداۋلەت بالتاباەۆ مىرزاعا مىڭ راحمەت, – دەدى ن.امان ۇلى.
قازىرگى ۋاقىتتا ناۋبايحانادا سۇرىپتى ۇننان كۇنىنە 150-200 بولكە نان پىسىرىلەدى. الداعى ۋاقىتتا ەكىنشى پەشتى ىسكە قوسىپ, نان كولەمىن تاۋلىگىنە 400-گە جەتكىزۋدى جوسپارلاپ وتىر. بۇدان بولەك, باسقا دا نان-توقاش ونىمدەرىن ساتۋ جوسپارىندا بار. جەرگىلىكتى كاسىپكەر جۇرتتىڭ كۇندەلىكتى سۇرانىسىن ورىنداۋدى و باستان ماقسات ەتكەن. شاعىن عانا ناۋبايحانا پىسىرىلەتىن اس اتاسى اۋىل جۇرتىنىڭ كوڭىلىنەن شىعىپ تۇر.
قاراعاندى وبلىسى,
شەت اۋدانى