اقپاندا ايازدىڭ بەتى قايتا ما, كوكتەم قاشان كەلەدى؟

سينوپتيكتەردىڭ مالىمەتىنشە اقپاندا اۋا رايى قۇبىلىپ, تەمپەراتۋرا جىل سايىنعى نورمادان 1-2 گرادۋس جىلى بولادى. الايدا اقپاندا ەل تەرريتورياسىن اياز اينالىپ وتپەيدى. 

ايدىڭ العاشقى ونكۇندىگىندە كۇن رايى قۇبىلىپ سولتۇستىك-شىعىس وڭىرلەردە تەمپەراتۋرا كورسەتكىشى كۇندىز  - 4, - 16 گرادۋستى كورسەتسە, ەكىنشى, ءۇشىنشى ونكۇندىك ايازدى بولادى. جاۋىن-شاشىن نورما مولشەرىندە بولادى دەپ بولجانىپ وتىر.

ال استانا قالاسىندا اقپان ايىنىڭ باسى مەن ءۇشىنشى ونكۇندىكتىڭ ورتاسىندا قارلى بوران سوعۋى ىقتيمال.

الماتى قالاسى مەن وبلىستا اقپانداعى ورتاشا تەمپەراتۋرا - 0,8, - 11,3 گرادۋس شاماسىندا بولادى. 

كۇننىڭ كۇرت سۋىتۋى اقپاننىڭ العاشقى ونكۇندىگىنىڭ سوڭىندا كۇتىلەدى. تاۋلى ايماقتاردا -20 گرادۋسقا دەيىن اياز بولادى. ايدىڭ ءۇشىنشى ونكۇندىگىندە جاۋىن جاۋادى دەپ بولجانعان.

وڭتۇستىك تسيكلونداردىڭ پايدا بولۋىنا بايلانىستى اۋا تەمپەراتۋراسى وڭتۇستىك وبلىستاردا +5, +15 گرادۋسقا دەيىن كوتەرىلەدى.

سينوپتيكتەر كوكتەم لەبى وڭتۇستىك ايماقتاردا اقپاننىڭ سوڭعى ونكۇندىگىندە سەزىلە باستايدى دەپ بولجايدى. 

«ناۋرىز ايىندا قازاقستان اۋماعىنداعى اۋانىڭ ورتاشا تەمپەراتۋراسى نورمادان 2° جوعارى بولادى دەپ بولجانىپ وتىر. جاۋىن-شاشىن مولشەرى ەلىمىزدىڭ باسىم بولىگىندە نورمادان كوپ جاۋادى», دەلىنگەن «قازگيدرومەت» رمك حابارلاماسىندا.