الماتى الەمدەگى ەڭ جويقىن جەر سىلكىنىسى بولاتىن ايماقتار تىزىمىندە – ەكولوگ

Assyltas TV ارناسىنا بەرگەن سۇحباتىندا مامان الماتى سەيسمولوگيالىق قاۋىپ بويىنشا الەمدىك تىزىمدە كوش باستاپ تۇرعانىن جەتكىزدى.

- جەر سىلكىنىسى كەزىندە ۇيدە بولدىم. الدىمەن گۇرىلدەگەن دىبىستار شىقتى, كوشەدەگى كولىكتەر ەكەن دەپ ويلادىم. بايقاسام, ءۇي شايقالىپ تۇر. مەن ونداي جاعدايلارعا دايىن اداممىن, قورقىنىش بولعان جوق. ال كوپ ادامنىڭ ەسى شىعىپ كەتتى, بارلىعى دالا شىقتى. ءبىزدى جاراتىلىس ساقتادى. بۇدان قاتتى بولسا, قىرعىن بولار ەدى. قازىر جەر شارىندا ەڭ قاتتى جەر سىلكىنىسى بولاتىن جەرلەر – جاپونيا, يندونەزيا, چيلي, قازاقستاندا وسى الماتى. بۇل باياعىدا زەرتتەلگەن, سەيسمولوگتاردىڭ بارلىعى بىلەدى, – دەيدى ەلەۋسىزوۆ.

ەكولوگ الماتىداعى جاڭا سالىنىپ جاتقان ۇيلەردىڭ قۇرىلىس ساپاسىن سىنعا الدى. ونىڭ ايتۋىنشا, قۇرىلىس بارىسىندا ساپاسىز ماتەريالدار قولدانىلادى, سونداي-اق جاڭا قۇرىلىستاردىڭ بارلىعى تىعىز سالىنادى. جەر سىلكىنىسى سەكىلدى اپاتتى جاعدايلاردا تۇرعىنداردىڭ جينالاتىن قاۋىپسىز بوس الاڭدارى جوق.

- كەڭەس وداعى كەزىندە قوناەۆتىڭ سۇراۋىمەن بولۋى كەرەك, الماتىعا ارنايى عالىمدار كەلىپ زەرتتەۋ جاساعان. سوندا عالىمدار الماتىنىڭ ەكولوگيالىق سىيىمدىلىعىنىڭ 700 مىڭ ادامعا لايىقتالعانىن ايتىپ كەتكەن. ال قازىر شامامەن 3 ملن ادام بار. بۇل ساننىڭ ءالى دە وسەتىن مۇمكىندىگى بار. تاعى 4 قالا سالامىز دەيدى. ەسى اۋىسقان بۇلاردىڭ. قازىر سۋ تاپشى. 44 پايىز مۇزدىقتارىمىز ەرىپ كەتتى, – دەپ دابىل قاقتى ەكولوگ.

سونداي-اق مەلس ەلەۋسىزوۆ حالىقتى جەر سىلكىنىسى كەزىندە ۇرەيگە بوي الدىرماۋعا شاقىردى.

- حالىققا ۇيرەتۋ كەرەك. «پانيكا» دەگەن جامان دۇنيە. جەر سىلكىنگەندە العاشقى تولقىن وتكەن سوڭ, اقىرىن سىرتقا شىعۋ كەرەك. جاپونيادا كىشكەنتاي بالالارعا دەيىن بىلەدى العاش نە ىستەۋ كەرەگىن. ۇستەلدىڭ استىنا نەمەسە وزدەرىنە بەلگىلەنگەن جەرلەرگە تىعىلادى. سول سەكىلدى بىزدە دە بارىنە دايىن بولۋ كەرەك, – دەيدى ەكولوگ.

سونىمەن قاتار سۇحبات بارىسىندا ەكولوگ قازاقستانداعى ەكولوگيالىق پروبلەمالارعا, اسىرەسە بالقاشتىڭ تارتىلىپ كەتۋ قاۋپىنە توقتالىپ, بيلىكتىڭ جەدەل نازار اۋدارۋى كەرەك ەكەنىن ايتتى.