ەكى جانە ءۇش جاستارىندا قاراعاندىداعى «ماليۋتكا» بالالار ۇيىنەن اقش-قا جول تارتقان رۋسلان مەن ءاليانىڭ ءومىرى قازىر تۇبەگەيلى وزگەرگەن, دەپ حابارلايدى Egemen.kz.
«شەتەلدەگى قازاق بالالارى» باعدارلاماسىنىڭ مالىمەتىنشە, ولار 1999 جىلى تۋعان جەرىنىڭ شەكاراسىن تارك ەتكەن. بالالاردىڭ تۋعان اكە-شەشەلەرى بولەك.
ولاردىڭ اسىراپ العان اكەسى - فرەنك.
- اقش-تان بالا اسىراپ الۋعا 8 وتباسى باردىق. 6 وتباسى 2-3 بالادان اسىراپ العان. تەك 2 وتباسى ءبىر بالادان الدى, - دەيدى ول.
50 جاستان اسقاندا بالا اسىراپ العان ولار قازىر 70 جاستا. ءوز بالالارى جوق. ومىردە بار جيعان-تەرگەنىن قازاق بالالارىنىڭ اۋىزىنا توسقان.
- ەكەۋىن اسىراپ العان سوڭ, كوپ نارسە وزگەردى. ولار ءبىزدىڭ ءومىرىمىزدى مانگە تولتىردى. بالا اسىراپ الماعاندا, ءومىرىمىز تىم سۇرەڭسىز بولار ەدى. تۋعان كۇنىن تويلاعان سەكىلدى ءبىز ولاردى اسىراپ العان كۇنىمىزدى مەرەكە قىپ تويلايمىز. ءبىز ولاردى اسىراپ العانىمىزدى, قاي جەردە تۋعانىن ايتىپ وسىردىك, - دەدى ەرلى-زايىپتىلار.
بۇگىندە اتا-اناسىنان بولەك تۇراتىن 26 جاستاعى رۋسلان:
- بالا كەزىمدە كوپ ادام ماعان ايانىشپەن قارادى. ءبىر ءمۇساپىر سەكىلدى كوردى. بىراق مەن ەشقاشان اسىراپ العان بالا بولعانىما وكىنگەن ەمەسپىن. مەنىڭ اتا-انام كەرەمەت ادامدار. ولار الەمدەگى ەڭ جاقسى ادامدار. مەن ءۇشىن ءبارىن ىستەدى. ەشقاشان ءوزىمدى وگەي سەزىنگەن ەمەسپىن, - دەپ اعىنان جارىلدى.
رۋسلان پىسىق, بەلسەندى بالا بولعان. قازىر دە ءبىر ۋاقىتتا بىرنەشە شارۋا اتقارىپ جۇرە بەرەدى. ول ءوزىنىڭ بالا كەزدە اشۋلانشاق بولعانىن ايتادى.
ول – موتوتسيكل ايدايدى. قۇزعا ورمەلەيدى. رەگبيدەن باپكەر. يۋتا شتاتى بويىنشا رەگبيدەن ەرلەر قۇراماسىنىڭ مۇشەسى. ءبىر جىل بۇرىن جەكە كومپانياسى بولعان. قازىر رەگبي كيىمدەرىن ساتاتىن كومپانيا اشۋعا دايىندالىپ ءجۇر. يۋتا ۋنيۆەرسيتەتىندە كريميناليستيكا بويىنشا مەديتسينالىق دايىندىق كۋرسىن وقىپ ءجۇر. ول حيرۋرگ بولۋدى ارمانداعان. قازىر قۇلدىققا قارسى كۇرەسۋ ماقساتىندا كريممينولوگيا سالاسىن تاڭداعان. ول ادامداردى قۇلدىقتان بوساتقىسى كەلەدى.