جىلى توسەكتەن جىلىستاپ, ءتاتتى ۇيقىنى تارك ەتۋ كوپ ادامدار ءۇشىن وڭاي بولماۋى مۇمكىن. الايدا تاڭ الاگەۋىمنەن تۇرىپ, تازا اۋادا سەرۋەندەۋ – تالاي دەرتتىڭ تاپتىرماس ەمى. وسى ءبىر ءىستى ومىرلىك داعدىعا اينالدىرعان جاننىڭ ءتانى مەن جانى ۇشان تەڭىز پايداعا كەنەلەدى.
تاڭعى جۇپاردى تامسانا جۇتىپ, تازا اۋادا جارتى ساعات سەرۋەن قۇرۋ جۇرەك اۋرۋىنىڭ الدىن الادى. ستاتيستيكانى سويلەتسەك, جىل سايىن جەر شارىندا 18 ميلليون ادام ءدال وسى دەرتتىڭ سالدارىنان ومىرمەن قوش ايتىساتىن كورىنەدى. ال قازاقستان تۇتاس تمد ىشىندە جۇرەك-قان تامىرلارى اۋرۋىنا شالدىققانداردىڭ سانى بويىنشا كوش باستاپ تۇر.
تاڭەرتەڭگىلىك سەرۋەن اعزانىڭ زات الماسۋىن قالىپقا ءتۇسىرىپ, جۇرەك جۇمىسىن جاقسارتادى. اعزادان ەندورفين, ياعني قۋانىش پەن ءلاززات الۋ گارمونى مەن پايدالى اقۋىزدار ءتۇزىلىپ, جۇيكە جۇيەلەرى مەن ميعا تارايدى. سول ارقىلى بويداعى ۋايىم مەن مازاسىزدىقتان ارىلۋعا بولادى. بۇل ءوز كەزەگىندە ەستە ساقتاۋ قابىلەتىن جاقسارتىپ, وي ۇشقىرلىعىن دا دامىتا تۇسەدى.
عالىمدار تاڭەرتەڭگى كۇن ساۋلەسىنىڭ دەنە سىمباتى ءۇشىن پايدالى ەكەنىن الدەقاشان دالەلدەگەن. تاۋلىكتىڭ العاشقى بولىگىندە دەنەگە تاراعان كۇن ساۋلەسى تاۋلىكتىڭ ەكىنشى بولىگىندەگى كۇن ساۋلەسىنە قاراعاندا اعزاداعى مەتابوليزمدى جاقسارتۋعا بەيىم. اسىرەسە شىعارماشىلىق ادامدارى ءۇشىن تاڭعى سەرۋەن – ناعىز شابىت سىيلايتىن ەرەكشە ءسات.
– تازا اۋادا جاتتىعۋ مەن سەرۋەن ءبىزدىڭ رۋحاني ءومىرىمىز ءۇشىن اسا ماڭىزدى. سىرتقى ساۋىتى مەن ىشكى جان دۇنيەسى ۇيلەسىم تاپقاندا عانا ادام ءوزىن شىنايى باقىتتى سەزىنە الادى. كۇيزەلىسكە ۇشىراعان جان ەرتە تۇرىپ سەرۋەن قۇرىپ, جاتتىعۋ جاساسا, جاڭا كۇننەن جاڭا قۇلشىنىس پەن تىڭ سەرپىن الادى. وزىنە دەگەن سەنىمدىلىگى ارتادى. كوڭىل كۇيى كوتەرىلىپ, اينالاسىنا نۇر-شۋاق سەبەدى. ويتكەنى بارلىق تىرشىلىك تاڭعى ۋاقىتتا قايتا ءتىرىلىپ, جاڭا ومىرگە بەت الادى. بۇل كەزەڭ ادامعا رۋحاني قۋات بەرەدى. الۋان ءتۇرلى يدەيالاردىڭ تاسقىندايتىن شاعى دا وسى كەز. وكىنىشكە قاراي, ۇيقىنى جاقسى كورەتىندەر بۇل ولجادان قۇر الاقان قالىپ ءجۇر. جاراتۋشى ادام بالاسىنا زور قابىلەت پەن شەكسىز مۇمكىندىكتەر سىيلاعان. تاڭعى جاتتىعۋدان قاپى قالعان جاننىڭ اعزاسىنداعى زات الماسۋ ۇدەرىسى باياۋلاپ, يممۋندى جاسۋشالاردىڭ قۇرىلۋى باسەڭدەيدى. ءتۇرلى اۋرۋلارعا توتەپ بەرۋ قابىلەتى تومەندەيدى. جان مەن ءتاندى باپتاۋدىڭ ەڭ ءلاززاتتى ءارى ارزان ءتۇرى – تاڭعى سەرۋەن, – دەيدى پسيحولوگ دينا حاسەنوۆا.
الەم دارىگەرلەرى پاندەميا كەزىندە سىرقاتتان ساقتانۋدىڭ توتە جولى قيمىل-قوزعالىستى ۇدەتىپ, تاڭەرتەڭگى ۋاقىتتا كوبىرەك سەرۋەندەۋ ەكەنىن جارىسا جازدى. ءتانى ساۋدىڭ – جانى ساۋ. ءار كۇنىمىزدى ناتيجەلى ءارى تابىستى وتكىزۋ تاڭدى قالاي باستاعانىمىزبەن تىكەلەي بايلانىستى.
الماتى