بىلىكتىلىكتىڭ بىرلەسكەن جوباسى

دۇنيەجۇزىلىك بانك پەن عىلىم جانە جوعارى ءبىلىم مينيسترلىگى قولداۋ كورسەتكەن اۋقىمدى جوبانىڭ ماقساتى – پەداگوگيكالىق وقىتۋدىڭ جەتىلدىرىلگەن مودەلىن ەنگىزۋ جانە 30 ءبىلىم بەرۋ باعدارلاماسىن جاڭا ۇلگىگە بەيىمدەۋ. سونداي-اق پەداگوگيكالىق ۋنيۆەرسيتەتتەردە مۇعالىمدەردى دايارلاۋ باعىتىن ترانسفورماتسيالاپ, سول ارقىلى مۇ­عالىمدەردىڭ ءرولىن, مارتەبەسىن كوتەرۋ كوزدەلگەن. ساراپشىلاردىڭ ايتۋىنشا, قازىرگى كەزدە ءبىلىم الۋشىنىڭ نازارىن اۋدارۋعا ۇمتىلاتىن باسەكەلەستەر كوپ. سوندىقتان وقىتۋشىلار ءوز قۇزىرەتتىلىگى مەن كاسىبي دەڭگەيىن ارتتىرۋى كەرەك.

– مينيسترلىك وتكەن جىل بويى مۇ­عا­لىمدەردىڭ ءبىلىمىن ارتتىرۋ بويىن­شا ۇلكەن جۇمىس اتقاردى. جەكە تۇجى­رىم­داما قابىلداندى. پەداگوگيكالىق ۋني­ۆەرسيتەتتەردىڭ ارنايى جۇمىس توبى نازارباەۆ ۋنيۆەرسيتەتپەن بىر­لەسىپ, وسى تۇجىرىمداما اياسىندا دۇنيەجۇزىلىك بانك جوبالارىن جۇزەگە اسىرۋعا قاتىسقان فينليانديادان كەلگەن سەرىكتەستەرمەن جۇمىس ىستەدى. قازىر جوبانى اۋقىمدى جۇزەگە اسىرۋ كەزەڭى – جوعارى وقۋ ورىندارى وقىتۋشىلارى اراسىندا ءبىلىمدى تاراتۋ كەزەڭى باستالادى. ەسكى مازمۇنمەن جاڭا ماسەلەلەردى شەشۋ مۇمكىن ەمەس. بۇل ءبىزدىڭ ۇجىمدىق شەشىمدى قاجەت ەتەتىن ۇلكەن ۇدەرىس, – دەدى عىلىم جانە جوعارى ءبىلىم ءمينيسترى ساياسات نۇربەك.

بۇل جوبا بيىل قاڭتار-ماۋسىم ايلارى ارالىعىندا ونلاين جانە وفلاين فورماتتا وتەدى. وقۋ بارىسىندا 1 800 وقىتۋشى قازىرگى زامانعى مۇعالىمدەردىڭ ءبىلىم بەرۋ ۇردىستەرى, ستۋدەنتكە باعدارلانعان وقىتۋ ما­سە­­لەلەرى جانە تسيفرلىق پەداگوگيكا بويىن­­شا قۇزىرەتتىلىگىن ارتتىرادى. سونى­مەن قاتار ساراپشىلار جوعارى وقۋ ورىن­دارىنىڭ 200 وقىتۋشىسى مەن 50 اۋىل مەكتەبىنىڭ ديرەكتورلارى ءۇشىن ءبىلىم بەرۋدەگى كوشباسشىلىق باعىتىندا بىلىكتىلىكتى ارتتىرۋ باعدارلاماسى بويىن­شا ترەنينگتەر وتكىزەدى ءارى CLIL تەحنولوگياسى – پاندىك-ءتىلدى كىرىكتىرىلگەن وقىتۋ – جوعارى وقۋ ورىندارىنىڭ 100 وقىتۋشىسىنا جەكەلەگەن ءدارىس بولادى.

جوبانىڭ اشىلۋىندا نازارباەۆ ۋنيۆەرسيتەتى پرەزيدەنتىنىڭ مىندەتىن اتقارۋشى يلەسانمي ادەسيدا وقىتۋ­شىلاردى وقۋ كۋرسىنىڭ باستالۋىمەن قۇتتىقتاپ, وقۋ ورداسىنىڭ وتاندىق ءبىلىم بەرۋدى وزگەرتۋگە قوسقان ۇلەسىن اتاپ ءوتتى.

ايتا كەتەيىك, ترەنينگتەردى فين­دىك جانە نازارباەۆ ۋني­ۆەرسيتەتتىڭ ساراپشىلارى, سونىڭ ىشىندە NU GSE قاۋىمداستىرىلعان پروفەسسورلارى دۇيشونكۇل شاماتوۆ پەن سۇلۋشاش كەرىمقۇلوۆا, نازارباەۆ ۋنيۆەرسيتەتىنىڭ اكادەميالىق ساپا جونىندەگى ديرەكتورى ءاليا سۇلەيمەنوۆا, ينستيتۋتتىق تيىمدىلىك جونىندەگى قاۋىمداستىرىلعان ديرەكتور ايجان مۋسينا جۇرگىزەدى. جوباعا جەرگىلىكتى ساراپشىلار مەن وتاندىق جوعارى وقۋ ورىندارىنان 50 پەداگوگيكالىق ازىرلەۋشى دە تارتىلعان.

– يننوۆاتسيالىق ءبىلىم بەرۋ جوباسى اياسىندا دۇنيەجۇزىلىك بانك ارقىلى 30 ءبىلىم بەرۋ باعدارلاماسى بەيىمدەلگەن. وكىنىشكە قاراي, كەيىنگى جىلدارى پەداگوگيكالىق جوعارى وقۋ ورىندارىندا ۇلكەن وزگەرىستەر مەن رەفورمالار بولعان جوق. بۇگىنگى ىسكە اسىرىلىپ جاتقان باعدارلاما – العاشقى باستامالاردىڭ ءبىرى. نازارباەۆ ۋنيۆەرسيتەتى جوعارى ءبىلىم بەرۋ مەكتەبى وسى باعدارلامانىڭ ناتيجەسىندە, پەداگوگيكالىق ۋنيۆەرسيتەتتەردەگى ءبىلىم جاقسارا تۇسەدى دەگەن ۇمىتتە, – دەدى دۇيشونكۇل شاماتوۆ.

جوبانىڭ اشىلۋ سەسسياسىنان كەيىن وفلاين رەجىمدە جوسپارلانعان ترەنينگ باستالىپ تا كەتتى. ءارتۇرلى ۋنيۆەرسيتەتتەردەن كەلگەن وقىتۋشىلار توپتارعا ءبولىنىپ, ارنايى تاپسىرمالارمەن جۇمىس ىستەدى. استانا حالىقارالىق ۋنيۆەرسيتەتى پەداگوگيكالىق ينستيتۋتىنىڭ قاۋىم­داس­تىرىلعان پروفەسسورى, ماتەما­تيكا جانە ماتەماتيكالىق مودەلدەۋ ينستيتۋتىنىڭ PhD داۋلەت نۇراح­مەتوۆتىڭ ايتۋىنشا, بۇل باستاما وقىتۋشىلار ءۇشىن ءدال قازىرگى ساتتە اسا قاجەت.

– قازىر كۇندەلىكتى ومىردە, تەحنولوگيادا, الەۋمەتتىك سالادا بولىپ جاتقان جاڭالىقتار وقۋ ۇردىسىندە مىندەتتى تۇردە ەسكەرىلۋى كەرەك. سوعان بايلانىس­تى بۇعان وقىتۋشى قالاي, قاي جاعىنان دايىن بولۋى كەرەك دەگەن دۇنيەنى جاقسى ءبىلۋ ماڭىزدى. سەبەبى ءبىز شاكىرت تاربيەلەيمىز. بولاشاقتا ولار مەكتەپتەردە, ۋنيۆەرسيتەتتەردە نەمەسە مەكەمەلەردە جۇمىس ىستەيدى. سونداي-اق بولاشاق مۇعالىمدەردىڭ بويىندا قانداي قۇزىرەتتىلىك بولۋى كەرەك دەگەن سۇراق تۋىنداپ جاتىر. ولار قالاي باسەكەگە قابىلەتتى بولا الادى؟ الەمدە بولىپ جاتقان وزگەرىستەرگە ىلەسىپ, دامىپ جاتىر ما؟ مىنە, جوبادا وسى تاقىرىپ توڭىرەگىندە پىكىر تالاستىرىپ, اقپارات الماسىپ, شىڭدالىپ جاتىرمىز. وتكەن اپتادا ترەنينگ ونلاين رەجىمدە بولدى. ال قازىر وفلاين رەجىمدە ءوتىپ جاتىر. وعان ءارتۇرلى سالا بويىنشا بىرنەشە ۋنيۆەرسيتەت قاتىسىپ وتىر. ءبارىمىزدىڭ ماقساتىمىز ءبىر – تۋىنداعان ماسەلەلەردى جىك-جىگىمەن تالداپ, تالقىلاۋ. ياعني ءبىزدىڭ وقىتىپ جاتقان جۇيەمىز الەمدىك ستاندارتتارعا ساي كەلە مە, كوشتەن قالىپ قويعان جوقپىز با, اينالامىزدا نە بولىپ جاتىر دەگەن نارسەگە نازار اۋدارۋ. اسىرەسە ءبىر-بىرىمىزبەن پىكىر الماسا وتىرىپ, حالىقارالىق ساراپشىلاردىڭ ۇسىنىسىن ەسكەرە وتىرىپ, دەڭگەيىمىزدى انىقتاۋ قاجەت, – دەدى د.نۇراحمەتوۆ.

بۇل جوبادا فينليانديانىڭ ۇزدىك, جەتەكشى ۋنيۆەرسيتەتتەرىنىڭ تاجىري­بەلەرى پايدالانىلىپ وتىر. «مۇعالىم الەۋەتىن نىعايتۋ ۇدەرىسى تۇراقتى بولۋى ءۇشىن بىزگە, ەڭ الدىمەن, جۇيەلى كوزقاراس قاجەت. قازاق مۇعالىمدەرىمەن سەرىكتەسە وتىرىپ, باعدارلامانىڭ مازمۇنىن دايىندادىق. كۋرس اياسىنداعى ءبىزدىڭ مىندەتىمىز – پەداگوگيكالىق جوعارى وقۋ ورىندارى ءۇشىن جاڭا بەيىمدەلگەن سيللابۋس قۇرۋ. ءبىز الەمدەگى ەڭ ۇزدىك ءبىلىم بەرۋ جۇيەسىنىڭ وكىلدەرى رەتىندە ءوز تاجىريبەمىزبەن ءبولىسىپ وتىرمىز», دەدى HAMK ۋنيۆەرسيتەتىنىڭ ترەنەرى يرمەلي لينگنەل.

ايتا كەتەيىك, 15-19 قاڭتار ارالىعىندا نازارباەۆ ۋنيۆەرسيتەتتە, اباي اتىن­داعى قازاق ۇلتتىق پەداگوگيكالىق ۋني­ۆەرسيتەتىندە جانە ءو.جانىبەكوۆ اتىن­داعى وڭتۇستىك قازاقستان پەداگوگي­كالىق ۋنيۆەرسيتەتىندە پاراللەل وفلاين سەسسيالار ءوتتى. 22-26 قاڭتار ارالىعىندا سەسسيالار ءا.مارعۇلان اتىنداعى پاۆلودار پەداگوگيكالىق ۋنيۆەرسيتەتىندە, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى جانە ح.دوسمۇحامەدوۆ اتىنداعى اتىراۋ ۋنيۆەرسيتەتىندە ءوتىپ جاتىر. وعان 950-دەن استام وقىتۋشى قاتىسادى.