ورال قالاسىندا حاديشا بوكەەۆا اتىنداعى باتىس قازاقستان وبلىستىق دراما تەاترىنىڭ ءارتىسى, مادەنيەت سالاسىنىڭ ۇزدىگى ەلميرا ماقاشەۆانىڭ بەنەفيسىنە ارنالعان «نورا» قويىلىمى ساحنالاندى.
نورۆەگيالىق دراماتۋرگ گەنريك يبسەننىڭ 1879 جىلى جازىلعان «قۋىرشاق ءۇي» پەساسى 2001 جىلى يۋنەسكو-نىڭ دۇنيەجۇزىلىك قۇجاتتىق مۇرانى قورعاۋ بويىنشا «الەم جادى» تىزىمىنە ەنگىزىلگەن ەدى. قويىلىمنىڭ باستى كەيىپكەرى نورا كۇيەۋى ءتورۆالدتى اجالدان اراشالاۋ ءۇشىن بارىن سالادى, ءتىپتى وتىرىككە بارادى. دەرتتىڭ بەتى قايتىپ, بيىك مانساپقا قول جەتىپ, ەندى باقىتتى ءومىردىڭ ەسىگى اشىلدى دەگەندە, كۇتپەگەن جەردەن قۇپيا اشىلماق, ءبارى كۇل-تالقان بولماق... نورا كۇيەۋىنەن قولداۋ, كەشىرىم كۇتەدى, ويتكەنى وسىنىڭ ءبارى سول ءۇشىن جاسالعان ەدى عوي...
كەيىپكەرلەرىنىڭ ىشكى جان-دۇنيەسىن قوبالجىتىپ, سان قالىپقا تۇسىرەتىن كۇردەلى پسيحولوگيالىق پەسانى قازاق تىلىنە تارجىمالاعان – ەلميرا جۇماجانقىزىنىڭ ءوزى بولاتىن. ونىڭ ۇستىنە قويىلىمداعى 4 كەيىپكەردى – نورا كەلىنشەك, ونىڭ كۇيەۋى تورۆالدت, ادۆوكات حەلمەر مەن قىز كۇنىندەگى قۇربىسى فرۋ ليننەنى ەلميرا ماقاشەۆانىڭ جالعىز ءوزى سومداپ شىقتى. وسىلايشا, ءوزىنىڭ 50 جاسقا تولعان تۋعان كۇنىندە كورەرمەندەرگە ەرەكشە مادەني تارتۋ جاسادى.
– بۇل پەسانىڭ جازىلعانىنا 1,5 عاسىر وتسە دە وزەكتىلىگىن جوعالتپاعان دۇنيە. ءبىز ونى قازاق تىلىنە اۋدارىپ, ءبىر ادامدىق مونوسپەكتاكل ەتىپ ىڭعايلادىق. قويىلىم ەلميرا ماقاشەۆانىڭ بەنەفيسىنە ارنايى دايىندالدى, – دەيدى قويۋشى رەجيسسەر, قازاقستان رەسپۋبليكاسى مادەنيەت قايراتكەرى باتىربەك شامبەتوۆ.
جالعىز ءارتىستىڭ ءبىر قويىلىمدا بىردەن 4 وبرازدى الىپ شىعۋى – ورال تەاترى تاريحىندا بۇرىن-سوڭدى بولماعان دۇنيە. سوندىقتان دا بۇل وڭايعا تۇسپەگەنى انىق. دەگەنمەن, 30 جىلدىق ساحنالىق تاجىريبەسى ەلميرا جۇماجانقىزىنىڭ ابدەن قالىپتاسقان ونەر شەبەرى ەكەنىن كورسەتتى. قويىلىم سوڭىندا كەش يەسى كورەرمەننىڭ ىستىق ىقىلاسىنا بولەنىپ, قۇشاق-قۇشاق گۇلدىڭ استىندا قالدى. باتىس قازاقستان وبلىسىنىڭ اكىمى ناريمان تورەعاليەۆ العىسحاتپەن ماراپاتتالسا, ونەرپازدىڭ تۋعان جەرى – تەرەكتى اۋدانى دا ارنايى قۇتتىقتاپ, يىعىنا قامزول جاپتى.
ايتا كەتەيىك, ەلميرا ماقاشەۆا – ارتىستىگى, اۋدارماشىلىعىنان بولەك, قوعامدىق جۇمىستاردىڭ دا بەلورتاسىندا جۇرەتىن قايراتكەر جان. وتكەن جىلى عانا تەرەكتى اۋدانىنىڭ قۇرمەتتى ازاماتى اتاندى. 2021 جىلى ورال قالاسىنداعى وقۋشىلار سارايى جانىنان «ماقاشەۆا تەاترىن» اشىپ, جۇرگىزىپ كەلەدى. قازىر بۇل تەاتردا 50-گە جۋىق بالا ساحنا ونەرىنە تاربيەلەنىپ, قالا مەكتەپتەرىندە بىرنەشە قويىلىم دايىنداپ ۇلگەرگەن.
باتىس قازاقستان وبلىسى