كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسى بولدى. وندا دەپۋتاتتار «قازاقستان رەسپۋبليكاسىنىڭ ۇكىمەتى مەن ەستونيا رەسپۋبليكاسىنىڭ ۇكىمەتى اراسىنداعى ادامداردىڭ رەادميسسياسى تۋرالى كەلىسىمدى راتيفيكاتسيالاۋ تۋرالى» زاڭدى قارادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
قازاقستان مەن ەستونيانىڭ قۇزىرەتتى ورگاندارى اراسىنداعى زاڭسىز كوشى-قونعا قارسى ءىس-قيمىل سالاسىنداعى ءتيىمدى ىنتىماقتاستىق ءۇشىن قۇقىقتىق نەگىز قالىپتاستىرۋ زاڭنىڭ ماقساتى بولىپ تابىلادى. تاراپتار سونداي-اق مەملەكەتتەردىڭ اۋماعىندا كەلۋ, بولۋ نەمەسە تۇرۋ شارتتارىن ورىندامايتىن نەمەسە ورىنداۋدى توقتاتقان ادامداردىڭ جەكە باسىن انىقتاۋدىڭ جانە قايتارۋدى ۇيىمداستىرۋدىڭ ءتيىمدى راسىمدەرىن بەلگىلەۋدى, سونداي-اق وسىنداي ادامداردىڭ ءترانزيتىن وڭايلاتۋدى كوزدەپ وتىر.
كەلىسىمدى راتيفيكاتسيالاۋ ۋاعدالاسۋشى تاراپتاردىڭ قۇزىرەتتى ورگاندارىنىڭ زاڭسىز كوشى-قوننىڭ الدىن الۋ جانە ۋاعدالاسۋشى مەملەكەتتەردىڭ اۋماقتارىندا بولۋعا نەگىزى بار ادامداردىڭ قۇقىقتىق مارتەبەسىن رەتتەۋ سالاسىنداعى ءوزارا ءىس-قيمىلى ءۇشىن قۇقىقتىق جاعداي جاساۋعا مۇمكىندىك بەرەدى.
وتىرىس قورىتىندىسى بويىنشا زاڭدى پالاتانىڭ قاراۋىنا جىبەرۋ تۋرالى شەشىم قابىلداندى.