باتىس قازاقستان وبلىسىنىڭ بوكەي ورداسى اۋدانىنا قاراستى بيسەن اۋىلىندا سۋ جاڭا مادەنيەت ءۇيى پايدالانۋعا بەرىلدى. جاڭا عيمارات «اۋىل – ەل بەسىگى» مەملەكەتتىك باعدارلاماسى اياسىندا سالىنعان.
اۋىلداعى مادەنيەت ءۇيىنىڭ اشىلۋ سالتاناتىنا وبلىس اكىمىنىڭ ورىنباسارى تىلەپبەرگەن قايىپوۆ پەن وبلىستىق مادەنيەت جانە تىلدەردى دامىتۋ باسقارماسىنىڭ باسشىسى سايران دۇيسەنتەگى ارنايى كەلدى.
– اۋىلدىق ەلدى مەكەندەردىڭ الەۋمەتتىك-ەكونوميكالىق احۋالىن جاقسارتۋ ءۇشىن مەملەكەت تاراپىنان ىرگەلى باعدارلامالار قولعا الىنىپ وتىر. ءبىر عانا ءبىزدىڭ باتىس قازاقستان وبلىسىندا 2023 جىلى 17 مەكتەپتىڭ قۇرىلىسى اياقتالدى. وسى اۋداننىڭ وزىندە بىرنەشە فەلدشەرلىك-امبۋلاتوريالىق پۋنكت سالىنعانىنا وزدەرىڭىز دە كۋاسىزدەر. بۇگىن, مىنە, «اۋىل – ەل بەسىگى» باعدارلاماسى بويىنشا مادەنيەت ءۇيى پايدالانۋعا بەرىلىپ وتىر. وسىنداي جاقسى ىستەر 2024 جىلى دا جالعاسادى, – دەدى تىلەپبەرگەن قايىپوۆ.
جاڭا عيماراتتىڭ قۇرىلىسىنا 500 ملن تەڭگەدەن استام قارجى جۇمسالعان ەكەن. مەردىگەر «قالدىعايتى» جشس 15 ايعا جوسپارلانعان قۇرىلىس جۇمىسىن مەرزىمىنەن بۇرىن 9 اي ىشىندە اياقتاپ شىققان. ەكى قاباتتى عيماراتتا كەڭ فويە, كونتسەرت زالى, جەكەلەگەن قىزمەتتىك كابينەتتەر, جايلى اجەتحانا, ءتىپتى دۋش كابينالارى دا بار. بەس ادامدىق شتاتى بار مادەنيەت ۇيىندە دومبىرا, كوركەمسوز, ۆوكال جانە ءان-بي ۇيىرمەلەرى جۇمىس ىستەيتىن بولادى.
اۋىلداعى مادەنيەت وشاعىنىڭ جاڭا ماۋسىمى اۋداندىق حالىق تەاترى ارتىستەرى دايىنداعان گ.حۋگاەۆتىڭ «قارا شەكپەن» اتتى ءاپسانا-قويىلىمىمەن اشىلدى.
باتىس قازاقستان وبلىسى