وسى كۇندەرى پەتروپاۆل تۇرعىندارى وزدەرىنىڭ, جاقىندارىنىڭ, اسىرەسە بالالارىنىڭ ءومىرى ءۇشىن الاڭداۋلى. ويتكەنى جازا مەرزىمى اياقتالعان ەكى قاندىقول قىلمىسكەر بوستاندىققا شىققالى وتىر. ونىڭ ءبىرى قاڭتار, ەكىنشىسى ءساۋىر ايىندا شىعادى.
بۇل تۋرالى وبلىستىق پد باسشىسى ايدىن قابىلدينوۆ وتكەن جىلى قىركۇيەك ايىندا وتكەن بريفينگتە مالىمدەگەن ەدى. 1963 جىلى تۋعان قانىشەر ۆالەري كريچينەۆسكي 1998 جىلى ۇيىنەن بەيمەزگىل ۋاقىتتا بالتا الىپ شىعىپ, قالانىڭ زارەچنىي, مەششان ورمانى, بەنزوستروي دەگەن شەتكەرگى شاعىن اۋداندارىندا ءجۇرىپ, قارا نيەتىن ىسكە اسىرعان. جالعىز كەلە جاتقان ايەلدەردى اڭدۋمەن بولعان ول قۇربانىن بالتامەن ۇرىپ سۇلاتىپ, زورلاپ ءارى توناپ كەتىپ وتىرعان. قانىپەزەردىڭ قۇرباندارىنىڭ اراسىندا 20, 40, 60 جاستاعى ايەلدەر بولعان. ءبىر رەت ءتىپتى 11 جاسار قىزدى دا سوققىعا جىققان. اۋىر سوققىدان بايعۇس بالا سول جەردە ءتىل تارتپاي اجال قۇشقان. ال ۇلكەن ايەلدەر باسقا تيگەن سوققىدان ءتىرى قالعانىمەن, ۇزاق ۋاقىت زارداپ شەگىپ ءجۇردى.
ۆ.كريچينەۆسكيدى ۇستاعاندا ۇيىنەن ايەلدەردىڭ التىن-كۇمىس زاتتارى, اڭ تەرىسىنەن تىگىلگەن توندار, ءتىپتى قىز بالانىڭ جۇمساق ويىنشىعى دا شىققان. ازعىن قىزدىڭ جۇمساق ويىنشىعىنان تاپىشكە دە تىگىپ العان ەكەن. ال قىمبات زاتتاردى ايەلىنە سىيلاعان. وسىنشا دۇنيەنى كۇيەۋىنىڭ قايدان الىپ جاتقانىنا ايەلى كۇدىك كەلتىرسە كەرەك ەدى, بىراق ول وزىنە بەرىلگەن «سىيلىقتاردى» ءۇنسىز قابىلداعان. قىلمىستىق ءىس جۇرگىزىلگەندە دە ايەلى جاۋاپقا تارتىلمادى. تەك كريچينەۆسكيدىڭ ءوزىن سوت 1999 جىلى 25 جىلعا باس بوستاندىعىنان ايىردى. بيىل قاڭتاردا ونىڭ جازا وتەۋ مەرزىمى اياقتالىپ وتىر. ول بىلتىر 61 جاسقا تولدى.
ەكىنشى قىلمىسكەردىڭ ەسىمى – الەكساندر ليۋتوۆ. ول 1972 جىلى تۋعان. 1999 جىلى العاش سوتتالعاندا 27 جاستا بولعان. مۇنىڭ دا قولدانعان قارۋى – بالتا. ول قاراڭعى تۇندە جورىققا شىعىپ, جارىق تەرەزەدەن ايەلدىڭ سۇلباسى كورىنگەن ۇيلەرگە سىرتتاعى اعاشتارعا ءمىنۋ ارقىلى ءتۇسىپ وتىرعان. مانياك ءۇي يەسى ايەلدى الدىمەن بالتامەن ۇرىپ تالدىرىپ, زورلاپ, ءۇيدى توناپ كەتىپ وتىرعان. 1997-1998 جىلدارى ول التى ايەلگە وسىلاي شابۋىل جاساپ, بىرەۋىن ولتىرگەن. ۆاگون-رەستوراندا اسپاز بولىپ ىستەگەن بۇل قانىشەردى ەشكىم دە قاندىقول قىلمىسكەر دەپ ويلاماعان. سوڭعى قىلمىسىن 1998 جىلدىڭ 19 ماۋسىمىندا جاساعان. تۇنگى ساعات ءۇش كەزىندە بالالار ءۇيىنىڭ تەرەزەسىنەن تۇسكەن ول الدىمەن ءبىر تاربيەشىنى ولتىرگەن. ونىڭ اششى داۋىسىن ەستىپ كەلگەن ەكىنشى تاربيەشىنىڭ ايقايىنان قورىققان قورقاۋ قاشىپ ۇلگەرگەن, الايدا ول سول كۇنى قولعا تۇسەدى.
سوتتاردىڭ سولقىلداقتىعىنان ءومىر باقي باس بوستاندىعىنان ايىرۋدىڭ ورنىنا قانىشەرگە 20 جىل عانا جازا بەرىلگەن. ال 2016 جىلى 17 جىل وتىرعاننان كەيىن ونى شارتتى مەرزىممەن تۇرمەدەن دە شىعارادى. بىراق ليۋتوۆ بوستاندىققا شىققاننان كەيىن تاعى قىلمىسقا بارادى, 19 جاستاعى بويجەتكەنگە شابۋىل جاساعان. بۇل جولى سۋديا ميحايل گۋسەۆ وعان بار بولعانى 3 جىل عانا جازا كەسەدى. جاسى 50-دەن جاڭا عانا اسقان, پسيحيكاسى كىسى ولتىرۋگە قۇمارتىپ تۇراتىن قاسكوي ەرتەڭ تاعى بىرەۋدىڭ قانىن موينىنا جۇكتەمەسىنە كىم كەپىل؟ ول بيىل ساۋىردە بوستاندىققا شىققالى وتىر.
پەتروپاۆل تۇرعىندارىنىڭ الاڭداۋىنىڭ باستى سەبەبى وسى. جۋرناليستەردىڭ وسى تاراپتاعى سۇراقتارىنا جاۋاپ بەرگەن وبلىستىق پوليتسيا دەپارتامەنتىنىڭ باسشىسى, پولكوۆنيك ا.قابىلدينوۆ ولاردى تىنىشتاندىرۋعا تىرىستى. «مۇنداي ادامدار قامالعان جەرىنەن شىعاردا قايدا باراتىنىن, قاي مەكەنگە تۇراقتايتىنىن كورسەتۋگە مىندەتتى. قىلمىستىق-اتقارۋ جۇيەسى دەپارتامەنتىنىڭ قىزمەتكەرلەرى بىزگە بۇل تۋرالى حابار بەرەدى. سوسىن ءبىز جازاسىن وتەپ شىققانداردى ۇنەمى باقىلاۋدا ۇستايمىز», دەدى ا.قابىلدينوۆ.
دەپارتامەنت باسشىسىنىڭ ايتۋىنا قاراعاندا, ۋچاسكەلىك پوليتسيا ينسپەكتورى دا, جەدەل ۋاكىل دە تۇزەۋ مەكەمەسىنەن شىققانداردىڭ ءجۇرىس-تۇرىسىن كوزدەن تاسا قىلماۋعا ءتيىس. لايىم سولاي بولعاي, ايتپەسە پسيحيكاسىندا اۋىتقۋى بار مۇندايلاردان قوعامعا تونەر قاۋىپ وراسان.
پەتروپاۆل