ءماجىلىستىڭ جالپى وتىرىسىندا دەپۋتات ماقسات تولىقباي پرەمەر-ءمينيستردىڭ ورىنباسارى سەرىك جۇمانعارينگە جانە باس پروكۋرور بەرىك اسىلوۆقا دەپۋتاتتىق ساۋال جولداپ, جايىلىم جايىن قوزعادى, دەپ حابارلايدى Egemen.kz تومەنگى پالاتانىڭ ءباسپاسوز قىزمەتىنە سىلتەمە جاساپ.
«تاۋ جاراتىلىستىڭ جارتى بولشەگى دەيمىز. بىراق ەل-امان جۇرت تىنىشتا ءبىر تاۋدىڭ ءوزىن مەنشىكتەپ الىپتى دەگەندى ەستىدىڭىزدەر مە؟ ۇشقوڭىر تاۋىن ءبارى بىلەدى. تۇمسا تابيعاتى كەرەمەت سول تاۋ بۇگىندە ساي-سالاسىمەن قوسا ءبىر ازاماتتىڭ عانا جەكە مەنشىگىندە. الماتى وبلىسىنداعى ۇشقوڭىر ۇستىرتىنە بارار جولعا بلوك-بەكەت قويىلعان, باستان اياعىنا دەيىن قاۋىرلانعان توپ كۇزەتەدى. سول تاۋدى كوزىممەن كورىپ, ەتەگىندەگى ەلمەن ەتەنە تىلدەسكەن سوڭ دەپۋتاتتىق ساۋال جولداپ وتىرمىن. بىرىنشىدەن, بۇل تاۋ «ىلە الاتاۋى ۇلتتىق پاركىنە» قارايتىنداقتان, پاركتىڭ كۇزەتشىلەرى قاراۋىل بولماي ما؟ الدە بۇل تاۋ «دۇنيە اگرو» كومپانياسىنا اتاسىنان مۇرا بولىپ قالعان با؟ جان بالاسىن جۋىتپاي اينالاسىن قورشاپ, مۇزداۋ قارۋلانعان كۇزەت قويۋ – بارىپ تۇرعان باسسىزدىق», دەدى دەپۋتات.
قاراساي اۋدانىنىڭ تۇرعىندارى ءوز جەرىنە مالدارىن جايا الماي پۇشايمان كۇيگە تۇسكەنىن ايتتى. ءماجىلىس دەپۋتاتى «امانات» پارتياسىنىڭ جەر تاپشىلىعىن شەشۋ ءۇشىن قۇرىلعان «جەر اماناتى» كوميسسياسىنىڭ تىكەلەي ارالاسۋىمەن رەسپۋبليكا بويىنشا 9 ميلليون گەكتاردان اسا جەر قايتارىلعانىن, ونى ىشىندە قاراساي اۋدانىنان 1400 گەكتار جايىلىم ەل يگىلىگىنە بەرىلگەنىن اتاپ ءوتتى. بىراق ەلگە قاجەتتى جايىلىمنىڭ شۇرايلى جەرىنىڭ بارلىعى دا قورشاۋدىڭ ىشىندە قالىپ قويعانىن جەتكىزدى.
«وسىلايشا جۇرت ءوز جەرىنە كىرمەك تۇگىلى, جاڭاعى قارۋلى بەكەتتەن وتۋگە ءداتى جەتپەيدى. سوراقىسى «دۇنيە اگرو» جشس-نە 2004 جىلى ۇشقوڭىر ۇستىرتىندە ورنالاسقان 100 گەكتار جەرگە مەنشىك قۇقىعى زاڭسىز بەرىلگەن. زاڭ تالاپتارى بويىنشا ارنايى ماقساتتاعى جەرلەردى زاڭدى تۇلعالاردىڭ جەكەشەلەپ الۋىنا قۇقى جوق. بۇل نورمالاردى جەرگىلىكتى پروكۋراتۋرا جاقسى بىلەدى. بىراق جەردىڭ زاڭسىز بەرىلۋ فاكتىسى بويىنشا پروكۋراتۋرانىڭ تالاپتارىن سوت قاناعاتتاندىرماي تاستاعان. سوندا قر زاڭىنا شەكەسىنەن قارايتىن بۇل نەعىلعان شەكتەن شىعۋ دەگەن حالىقتىڭ بازىناسىنا نە ايتامىز؟», دەدى دەپۋتات.
ۇشقوڭىر ۇستىرتىندە بىرنەشە كومپانيا 13 597 گەكتار جەردى ءالى كۇنگە دەيىن ماقساتسىز پايدالانىپ وتىرعانى انىقتالدى. الايدا الپاۋىتتارمەن الىسۋعا جەرگىلىكتى اكىمدىك, اۋدان پروكۋرورلارىنىڭ پارمەنى جەتپەي دارمەنى قۇريما دەگەن كۇدىگى باسىم ەكەنىن ايتتى.
وسىعان ۇكىمەت, باس پروكۋراتۋرا باسا نازار اۋدارىپ, ارنايى كوميسسيا قۇرىپ, ماسەلەگە ءتيىستى قۇقىقتىق باعا بەرۋى ءتيىس ەكەنىن ەسكەرتتى. پرەزيدەنتتىڭ ەل يگىلىگىنە قايتارىلۋى قاجەت جايىلىمدىق جەرلەر بويىنشا تاپسىرماسىن ناقتى ورىنداۋ ماڭىزدى ەكەنىن ەسكە سالدى.