الماتىمەن قاناتتاس قاراساي اۋدانىندا وقۋشى سانى جىل سايىن 6 مىڭعا ارتادى ەكەن. وعان دەموگرافيالىق وسىممەن قوسا, ىشكى ميگراتسيانىڭ اسەرى زور. مىسالى, وتكەن جىلى 11-سىنىپتى 2,5 مىڭ بالا ءتامامداسا, بيىلعى وقۋ جىلىندا باستاۋىش سىنىپقا 8,5 مىڭ ءبۇلدىرشىن قابىلدانعان. بۇل كورسەتكىشتەر مەكتەپ سالۋ ءىسىنىڭ وزەكتىلىگىن اڭعارتادى.
– ايتەي اۋىلدىق وكرۋگىنە قاراستى ۇشتەرەك اۋىلىندا №2 ورتا مەكتەپ اشىلىپ, ءوز جۇمىسىن باستادى. №1 ورتا مەكتەپ اۋىلدىڭ ورتاسىندا ورنالاسقان. ونىڭ جوبالىق قۋاتتىلىعى 300 ورىندىق, ايتسە دە قازىرگى كۇنگە دەيىن ول مەكتەپتەگى وقۋشى سانى 1 مىڭنان اسىپ, ءۇش اۋىسىمدا وقىتىلىپ كەلدى. ەندى جاڭا مەكتەپتىڭ قولدانىسقا بەرىلۋىنە بايلانىستى 600 بالا اۆتوماتتى تۇردە جاڭا عيماراتقا اۋىسىپ, ءۇش اۋىسىمدىق ءبىلىم بەرۋ ماسەلەسى شەشىلدى. №1 مەكتەپتە 600-گە جۋىق بالا اۋىل سىرتىنداعى ساياجايلاردان قاتىناپ وقيتىن. بۇل ماسەلە دە تۇبەگەيلى شەشىمىن تاۋىپ وتىر. وعان قوسا وسى ماڭايداعى 270 بالا كورشىلەس تۇرار اۋىلىنداعى مەكتەپكە باراتىن. جاڭا مەكتەپتىڭ ىسكە قوسىلۋىنىڭ ناتيجەسىندە بۇل ماسەلەنىڭ دە كۇرمەۋى تارقاتىلدى, – دەدى قاراساي اۋداندىق ءبىلىم ءبولىمىنىڭ باسشىسى اسەل ەركىنباەۆا.
قاراساي اۋدانىندا قازىر 6 مەكتەپ ءۇش اۋىسىممەن جۇمىس ىستەپ تۇر. اتالعان ماسەلەنى شەشۋ ماقساتىندا «جايلى مەكتەپ» جوباسى اياسىندا 10 مەكتەپتىڭ قۇرىلىسى جوسپارلانعان. قازىرگى كۇنى 8 مەكتەپتىڭ قۇرىلىسى باستالدى. بۇدان بولەك مەملەكەتتىك-جەكەمەنشىك ارىپتەستىك نەگىزىندە «اسىل ارمان» تۇرعىن ءۇي كەشەنىندە 1 500 ورىندىق جانە «ومىرزاق» تۇرعىن ءۇي كەشەنىندە 900 ورىنعا ارنالعان مەكتەپ قۇرىلىسى ءجۇرىپ جاتىر. وسى 10 مەكتەپ پايدالانۋعا بەرىلسە ءۇش اۋىسىممەن وقىتۋ ماسەلەسى تۇبەگەيلى شەشىم تاپپاق.
بيىلعى وقۋ جىلىندا 600 ورىندىق ەكى مەكتەپكە ەكى جاپسارجاي سالىنىپ قولدانىسقا بەرىلسە, سونداي-اق جارمۇحامبەت اۋىلىندا ىرگەسى قالانعان 600 ورىندىق, «قارلىعاش» شاعىن اۋدانىنان 1 200 ورىندىق جاڭا مەكتەپتىڭ قۇرىلىسى اياقتالىپ, پايدالانۋعا بەرىلگەن. سونىڭ ناتيجەسىندە وقۋ جىلىنىڭ باسىنداعى ءۇش اۋىسىمدىق 12 مەكتەپتىڭ ماسەلەسى ەكى ەسە ازايعان.
حالىق سانى 6 مىڭعا جۋىقتايتىن ۇشتەرەك اۋىلىنداعى №2 ورتا مەكتەپتىڭ اشىلۋ سالتاناتىندا قاراساي اۋدانى اكىمىنىڭ ورىنباسارى رۋستام امىرعالي ۇلى تۇرعىنداردى قۋانىشىمەن قۇتتىقتاپ, ءبىلىم ورداسىنان وقۋدا وزات, ءتارتىپتى دە تاربيەلى وقۋشىلاردىڭ كوپتەپ شىعۋىنا تىلەكتەستىگىن ءبىلدىردى.
زاماناۋي ۇلگىدە سالىنعان جاڭا مەكتەپتە وقۋشىلاردىڭ تولىققاندى ءبىلىم الۋىنا, ونەرگە بەيىمدەلۋىنە بارلىق جاعداي جاسالعان. سپورت زال, اكت زالى مەن كەڭ دە جارىق اسحانا تالاپقا ساي قاجەتتى قۇرىلعىلارمەن جابدىقتالعانىنا اتا-انالار ريزاشىلىعىن ءبىلدىردى. «نەمەرەمىزدىڭ وسىنداي ساۋلەتتى مەكتەپتە ءبىلىم الاتىنىنا قۋانىپ وتىرمىز. قانشا جىلدان بەرى قاشىقتاعى مەكتەپكە تاسىمالمەن وقىتۋدىڭ اۋرەسىن كوردىك. ەندى مىنە, ءۇيىمىزدىڭ جانىنداعى جاڭا مەكتەپكە بارۋ باقىتى بۇيىردى. وسىنىڭ سالىنۋىنا اتسالىسقان ازاماتتارعا العىسىمىز شەكسىز, نەمەرەلەرىمىزدىڭ ءبىلىمدى, ونەرلى بولىپ وسۋىنە ۇلەسىمىزدى قوسامىز», دەدى قۋانىشىن جاسىرا الماعان «اراي» ساياجايىنىڭ تۇرعىنى دينا ايازبايقىزى.
سونداي-اق ءدال وسى كۇنى وبلىسقا قاراستى ۇيعىر اۋدانىنىڭ شونجى اۋىلىندا دا ءۇش قاباتتى 900 ورىندىق مەكتەپ بوي كوتەرگەنىن ايتا كەتەيىك. ج.قۇدايبەرگەنوۆ اتىنداعى ورتا مەكتەپتىڭ اشىلۋ سالتاناتىنا الماتى وبلىسىنىڭ اكىمى مارات سۇلتانعازيەۆ ارنايى قاتىسىپ, ۇستازدار قاۋىمى مەن وقۋشىلاردى, اتا-انالاردى قۋانىشتى ساتپەن قۇتتىقتادى. بۇل كۇنى پايدالانۋعا بەرىلگەن ەكى جاڭا مەكتەپ تە قازاق تىلىندە ساباق بەرەتىنىن ەرەكشە اتاعىمىز كەلەدى.
الماتى وبلىسى