حالىقارالىق ساراپشىلار ەلىمىزدىڭ ەكونوميكاسىنا, ماكروەكونوميكالىق كورسەتكىشتەرىنە بايلانىستى ءتۇرلى بولجام ايتىپ ءجۇر. پرەزيدەنت قاسىم-جومارت توقاەۆ «Egemen Qazaqstan» گازەتىنە بەرگەن سۇحباتىندا «شىن مانىندە, مەن ءۇشىن ماكروەكونوميكالىق كورسەتكىشتەر سونشالىقتى ماڭىزدى ەمەس, ازاماتتاردىڭ تۇرمىس ساپاسىنىڭ ءىس جۇزىندە جاقسارۋى ودان الدەقايدا ماڭىزدىراق», دەپ ناقتى ۇستانىمىن جەتكىزدى.
ەكونوميكامىز قالىپتى دامۋ ءۇشىن جۇزەگە اسىرىلىپ جاتقان جوبالاردىڭ ناتيجەلىلىگى مەن تيىمدىلىگى ماڭىزدى. سۇحباتتا پرەزيدەنت ەكونوميكامىزدى ىلگەرىلەتۋ جولىندا بىرنەشە باعىتتى ايقىندادى.
بىرىنشىدەن, اۋقىمدى ونەركاسىپ جوبالارىن جۇزەگە اسىرۋ. بۇل باعىتتا جۇيەلى جۇمىس جۇرگىزىلىپ جاتىر. ەندى جوبالارعا تالداۋ جاسالىپ, ولار ينۆەستورلار, ساراپشىلار جانە بيزنەس وكىلدەرىنىڭ قاتىسۋمەن پىسىقتالادى. مەملەكەت قولداۋ كورسەتەدى.
وڭدەۋ ونەركاسىبى كاسىپورىندارىن وتاندىق شيكىزاتپەن قامتاماسىز ەتۋ تۋرالى زاڭ نورماسىن جاقىندا پارلامەنت ءماجىلىسى ماقۇلدادى. زاڭسىز شىعارىلعان اكتيۆتەر ەلگە قايتارىلىپ جاتىر. بۇل دا الەۋمەتتىك-ەكونوميكالىق جاعدايىمىزدى جاقسارتۋعا وڭ اسەرىن تيگىزىپ كەلەدى. بۇعان قاتىستى پارلامەنت ءتيىستى زاڭ قابىلدادى. ەكونوميكامىزدا باستى مىندەتتىڭ ءبىرى – ينۆەستيتسيا تارتۋ. وسىعان بايلانىستى ينۆەستيتسيالىق شتاب قۇرىلىپ, ينۆەستيتسيالىق احۋالدى جاقسارتۋ ءۇشىن اۋقىمدى وكىلەتتىلىك بەرىلدى.
ەكىنشىدەن, پرەزيدەنت ينۆەستورلارعا قولايلى جاعداي جاساۋمەن قاتار, بيۋدجەت كىرىسىنىڭ ازايىپ كەتپەۋىنە ەرەكشە ءمان بەرىپ وتىر. بۇعان پارلامەنت ماجىلىسىندە تالقىلانىپ جاتقان بيۋدجەت كودەكسىنىڭ الاتىن ورنى ەرەكشە. بۇل ورايدا, دەپۋتاتتار بيۋدجەت قاراجاتىنىڭ ماقساتىنا ساي جۇمسالۋىن, تيىمدىلىگىن قامتاماسىز ەتۋگە, كۆازيمەملەكەتتىك سەكتور سۋبەكتىلەرىنىڭ تيىمدىلىگىن ارتتىرۋعا, ديۆيدەنتتەردى تولىق تولەۋگە باعىتتالعان ۇسىنىستار ەنگىزدى.
بۇل تۇرعىدا, پارلامەنت ماجىلىسىندە جان-جاقتى تاقىلانىپ جاتقان مەملەكەتتىك ساتىپ الۋ تۋرالى زاڭ جوباسى دا ۇلكەن ءرول اتقارادى. مەملەكەتتىك ساتىپ الۋعا قوعامدىق باقىلاۋ ورناتۋدىڭ دا قاجەتتىلىگى زور.
جاڭا سالىق كودەكسى ازىرلەنىپ جاتىر. بۇل قۇجات مەملەكەت پەن بيزنەستىڭ قارىم-قاتىناسىن قايتا قاراۋعا مۇمكىندىك بەرمەك. كاسىپكەرلىك پەن باسەكەلەستىكتى دامىتۋ, جەكەمەنشىكتى قورعاۋ وتە ماڭىزدى. بۇل باعىتتا پرەزيدەنت تاپسىرماسىنا سايكەس ناقتى جۇمىستار ىستەلىپ كەلەدى. اتاپ ايتاتىن بولساق, جاقىندا پارلامەنت ءماجىلىسى كاسىپكەرلىك قىزمەتتى جاقسارتۋعا, كەدەرگىلەردى الىپ تاستاۋعا, مەملەكەتتىك باقىلاۋ مەن تەكسەرۋ جۇيەسىن رەتتەۋگە بايلانىستى بيزنەستى جۇرگىزۋ ماسەلەلەرى تۋرالى زاڭ جوباسىن ماقۇلداپ, سەناتقا جىبەردى. ەكونوميكامىز دامىسا, حالىقتىڭ ءال-اۋقاتى جاقسارادى. بيۋدجەتكە تۇسەتىن كىرىس ۇلعايادى. بۇل باعىتتا جۇمىس جۇيەلى بولۋى قاجەت.
نۇرتاي سابيليانوۆ,
ءماجىلىس دەپۋتاتى