2023 جىلى 21 325 ەتنيكالىق قازاق تاريحي وتانىمەن تابىسىپ, قانداس مارتەبەسىن العان. جالپى 1991 جىلدان بەرى رەسپۋبليكاعا 1 ملن 128,3 مىڭ ەتنيكالىق قازاق ورالدى. وتكەن جىلى قازاقستانعا كەلگەن قانداستاردىڭ جارتىسى (50,3%) وزبەكستاننان, 21,5% – قىتايدان, 10,2% – موڭعوليادان, 9,2% – تۇرىكمەنستاننان, 6,8% – رەسەيدەن جانە 2% باسقا ەلدەردەن. وسى جانە باسقا دا ستاتيستيكالىق ماعلۇماتتار ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنەن ءمالىم بولدى, دەپ حابارلايدى Egemen.kz.
2024 جىلعى 1 قانتارداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 60,2%-دى, ەڭبەككە قابىلەتتى جاستان كىشى 30,9%-دى جانە زەينەتكەرلەر 8,9%-دى قۇرايدى. ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 15,3%-ى جوعارى ءبىلىمدى, 32,4%-ى ورتا كاسىبي ءبىلىمدى, 44,3%-ى جالپى ورتا ءبىلىمدى, جانە 8,3%-ىنىڭ ءبىلىمى جوق.
قونىس اۋدارعان ەتنيكالىق قازاقتار ءتۇرلى وڭىرلەرگە قونىستانعان. سونىمەن قوسا, قانداستاردى قونىستاندىرۋ ءۇشىن ەڭبەك كۇشى تاپشى وڭىرلەر قاتارىندا اقمولا, اباي, قوستاناي, پاۆلودار, شىعىس قازاقستان, سولتۇستىك قازاقستان وبلىستارى انىقتالدى.
2024 جىلعى 1 قاڭتارداعى كورسەتكىش بويىنشا قونىستاندىرۋ وڭىرلەرىنە 2 337 قانداس كوشىرىلگەن, اتالعان تسيفر 2023 جىلعا بەكىتىلگەن كۆوتاعا سايكەسەدى. اتالعان وڭىرلەردە قونىستانعان قانداستارعا كوشۋ ءۇشىن ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (2023 جىلى – 241,5 مىڭ تەڭگە) مولشەرىندە; تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (2023 جىلى – 51,7-دەن 103,5 مىڭ تەڭگەگە دەيىن) مولشەرىندە سۋبسيديا تۇرىندە مەملەكەتتىك قولداۋ شارالارى ۇسىنىلادى.
بىلتىر 2126 قانداسقا ءتۇرلى قولداۋ شارالارى كورسەتىلگەن. ناقتى اتاعاندا, 735 ادام تۇراقتى جۇمىسقا ورنالاستىرىلىپ, 2126 ادام بىرجولعى سۋبسيديا العان, ال 694 قانداسقا تۇرعىن ءۇي شىعىندارى سۋبسيديالانعان.
سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلداندى. تۇرعىن ءۇي ساتىپ الۋ, سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50%-ى نەمەسە ءبىر وتباسىنا 4 ملن تەڭگەگە دەيىن مولشەرىندە بىرجولعى وتەۋسىز جانە قايتارىمسىز نەگىزدە ەنگىزىلدى.
ەستەرىڭىزگە سالايىق, وتكەن جىلى پيلوتتىق رەجيمدە قازاقستان ەلشىلىكتەرى ارقىلى ء«بىر تەرەزە» قاعيداتى بويىنشا قانداس مارتەبەسىن بەرۋ تەتىگى جۇزەگە اسىرىلعان. پيلوتتىق جوبا شەڭبەرىندە ەلىمىزگە بارۋ, جۇمىس ورنى, تۇرعىن ءۇي بەرۋ مۇمكىندىكتەرى تۋرالى ماسەلەنى شەشۋگە جانە رەسپۋبليكا اۋماعىنا كىرمەي-اق قانداس مارتەبەسىن الۋعا بولادى. قازىرگى ۋاقىتتا ەتنيكالىق قازاقتاردان جاڭا فورماتتا 6 203 ءوتىنىش قابىلداندى.