3 ميلليونعا جۋىق حالىق العاشقى مەديتسينالىق-سانيتارلىق كومەكتەن تىس قالىپ كەلەدى. سەناتور اقمارال ءالنازاروۆا ءوزىنىڭ دەپۋتاتتىق ساۋالىندا مساك كورسەتۋگە بايلانىستى پروبلەمالار تۋرالى ايتىپ بەردى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
دەپۋتاتتىڭ ايتۋىنشا, ازاماتتاردى مەديتسينالىق ورتالىقتارعا بەكىتۋدىڭ ەرەكشەلىگىنە بايلانىستى پاتسيەنتتەر كۇردەلى اۋرۋدان ەمدەلۋ ءۇشىن دارىگەر مەن ەمحانا ىزدەپ ءىرى مەديتسينالىق مەكەمەلەرگە ۋاقىتشا بەكىتىلەدى جانە تولىققاندى ماتەريالدىق-تەحنيكالىق بازاسى جوق ەمحانالار اراسىندا كوشىپ-قونۋعا ءماجبۇر بولىپ وتىر. دارىگەرلەر دە ازاماتتاردىڭ كەيبىر ساناتتارىن تىركەۋدە قيىندىققا تاپ بولىپ جاتىر.
«اسكەر قاتارىنا بورىشىن وتەۋشىلەردىڭ وزدىگىنەن ەمحانادان شىعارۋ ماسەلەسى قاراستىرىلماعان. وڭىرلەردەگى قۇزىرلى ورگاندار اتالعان تىركەۋدە قالعان جاسوسپىرىمدەر قاراجاتىن زاڭسىز الىنعان قاراجات ساناتىنا جاتقىزىپ وتىر. ال بۇل ءوز كەزەگىندە قورمەن جالعان تىركەۋلەر رەتىندە كورسەتىلىپ, مەديتسينالىق قىزمەتكەرلەردىڭ ديسكرەديتاتسياسىنا جانە دارىگەرلەردىڭ جۇيەدەن كەتۋىنە اكەلىپ وتىر», دەدى اقمارال ءالنازاروۆا.
سەناتور سوڭعى 5 جىلدا العاشقى مەديتسينالىق كومەك قارجىسىنىڭ ۇلەسى 21,9%-عا دەيىن تومەندەگەنىن, جالپى جۇيەگە بەرىلگەن قارجى كولەمىنىڭ وسكەنىنە قاراماستان مساك تاريفتەرى وزگەرىسسىز قالىپ كەلە جاتقانىن اتاپ ءوتتى. ءوڭىر دارىگەرلەرى كورسەتەتىن 42 قىزمەتتىڭ 38%-ىنا جانە ورتا بۋىن قىزمەتكەرلەر كورسەتەتىن 212 قىزمەتتىڭ 44%-ىنا تاريف بەكىتىلمەگەن. ال جان باسىنا شاققانداعى كەشەندى نورماتيۆ وڭىرلىك قىزمەتكەرلەردىڭ قىزمەتىن تولىق قامتي المايدى. دەپۋتات سونىمەن قاتار مەديتسينالىق ۇيىمداردا بولىنگەن قاراجاتتى دەربەس رەتتەۋ قۇقىعىنىڭ بولماي وتىرعانىنا دا توقتالدى.
«ەمحانالار شارۋاشىلىق جۇرگىزۋ قۇقىعىنداعى كوممۋنالدىق مەكەمەلەر بولىپ سانالعانىمەن, ءوز بەتىنشە تاۋەلسىز باسقارۋ قۇقىعىنان ايىرىلعان. وعان دالەل رەتىندە مەكەمەلەردىڭ ساقتاندىرۋ قورىنان ءبىر جىلعا بولىنەتىن قاراجاتتى, پاتسيەنتتەردىڭ ناقتى قاجەتتىلىگىنە ەسكەرىلمەگەن جوسپارى بويىنشا ءار اي سايىن يگەرۋمەن اينالىسۋىن جاتقىزۋعا بولادى. مەديتسينالىق ۇيىمدار پاتسيەنتتى ەمدەۋ, اۋرۋلاردى تالداۋ ەمەس, بەكىتىلگەن قاراجات يگەرىلمەگەنىنە نەمەسە سىزىقتىق شكالادان اسسا, سالىناتىن ايىپپۇلداردى بولدىرماۋمەن اينالىسىپ جاتىر. ناتيجەسىندە ۇيىمداردىڭ تالاپتارى مەن قارجىلىق مۇمكىندىكتەرى اراسىندا ايتارلىقتاي الشاقتىق پايدا بولىپ, شىعىستار مەديتسينالىق كومەك كورسەتۋگە كوزدەلگەن قاراجات ەسەبىنەن جابىلۋدا. ول ءوز كەزەگىندە مەديتسينالىق ستاتيستيكانىڭ بۇرمالانۋىنا جانە كەلەر جىلدىڭ جوسپارىنىڭ ناقتى قاجەتتىلىك ەسكەرىلمەي جاسالۋىنا اكەلىپ سوعادى», دەپ اتاپ ءوتتى سەناتور ءالنازاروۆا.