ەلىمىزدە قىزىلشاعا قارسى قوسىمشا ۆاكتسيناتسيالاۋ شەڭبەرىندە 930 مىڭنان استام ادام ەكپە الدى. بۇل نىسانالى توپتىڭ 62%-ىن قۇرايدى, دەپ حابارلايدى Egemen.kz.
«قازاقستان وڭىرلەرىندە قوسىمشا يممۋنداۋدىڭ وڭ ديناميكاسى بايقالىپ وتىر. ماسەلەن, جەتىسۋ, قىزىلوردا, تۇركىستان وبلىستارى مەن شىمكەنت قالاسىندا ءتيىستى كونتينگەنتتىڭ 70%-دان استامى قوسىمشا يممۋنداۋمەن قامتىلعان. قىزىلشا بويىنشا جاعدايدى تۇراقتاندىرۋ ماقساتىندا وتكەن جىلى وسى اۋرۋعا قارسى جوسپارلى ۆاكتسيناتسيالاۋ جۇرگىزىلدى, ءبىر جانە التى جاستاعى 700 مىڭعا جۋىق بالا ەكپە الدى. قابىلدانعان شارالاردىڭ ناتيجەسىندە قىزىلشا بويىنشا تۇراقتاندىرۋ ءۇردىسى 6 وڭىردە – اقتوبە, قىزىلوردا, باتىس قازاقستان, قاراعاندى, جەتىسۋ, تۇركىستان وبلىستارىندا بايقالدى. تومەندەۋ ءۇردىسى 3 وڭىردە – شىمكەنت قالاسىندا, جامبىل جانە ۇلىتاۋ وبلىستارىندا تىركەلدى», دەدى دەنساۋلىق ساقتاۋ ءمينيسترى اجار عينيات.
ايتا كەتەيىك, 2023 جىلدىڭ سوڭىندا ەلدە قىزىلشانىڭ 29 648 جاعدايى تىركەلدى, ونىڭ 80%-ى 14 جاسقا دەيىنگى بالالارعا تيەسىلى. 2024 جىلدىڭ 1 قاڭتارىنان باستاپ قىزىلشانىڭ 1674 جاعدايى تىركەلدى.