الا دوپقا قۇمار اۋىل بالالارىنىڭ قىسقى دەمالىستارىن ءتيىمدى وتكىزۋىنە «حالىق» قايىرىمدىلىق قورى قول ۇشىن بەرىپ, دەمەۋشىلىك جاسادى.
جاڭا جىلدىڭ العاشقى اپتاسىندا «اۋىل فۋتبول» جوباسى اياسىندا قارعالى اۋىلىنداعى «BAQSY» ساۋىقتىرۋ ورتالىعىندا 2012 جىلى تۋعان بالالاردان قۇرالعان الماتى وبلىسىنىڭ فۋتبول قۇراماسىنىڭ وقۋ-جاتتىعۋ جيىنى ءوتتى.
قۇراما مۇشەلىگىندە قاراساي اۋدانىنا قاراستى 9 اۋىلدىڭ, اتاپ ايتقاندا اباي, رايىمبەك, قىرعاۋىلدى, اششىبۇلاق, المالى, اقساي, جامبىل جانە جىبەك جولى اۋىلى كوماندالارىنان ىرىكتەلگەن 15 بالا بار.
تابيعات اياسىنداعى جاتتىعۋ باعدارلاماسىندا كۇندەلىكتى ەكى تەحنيكالىق جانە تاكتيكالىق ساباق, دەنە شىنىقتىرۋ, تەوريالىق ساباقتار, سونىمەن قاتار باسسەينگە, كينوتەاترعا بارۋ جانە بوس ۋاقىتتا PlayStation ويناۋ قامتىلعان. كوماندانىڭ مۇشەلەرى ويىن جانە جاتتىعۋ كيىمدەرىمەن, ارنايى سپورتتىق سومكەلەرمەن قامتاماسىز ەتىلدى. لاگەردە كۇنىنە 4 مەزگىل ىستىق تاماق, 2 مەزگىل جەڭىل تاماق بەرىلىپ, بالالاردىڭ دۇرىس تاماقتانۋىنا ايرىقشا كوڭىل ءبولىندى. وقۋ ۇدەرىسىن كاسىبي بىلىكتىلىگى بار 3 جاتتىقتىرۋشى جۇرگىزىپ, اۋىل بالالارىنىڭ فۋتبول ويىنىن جەتىك مەڭگەرۋىنە ىقپال ەتتى. تاۋلىك بويى بالالاردىڭ قاۋىپسىزدىگى قاداعالانىپ, مەديتسينالىق كومەك كورسەتۋگە ءتيىستى جاعداي جاسالىندى.
«وسىنداي قامقورلىققا اۋىل بالالارى دا لايىق. سوندىقتان ءبىز ەڭ الدىمەن اۋىل بالالارىن سپورتپەن, ونىڭ ىشىندە فۋتبولمەن بەلسەندى اينالىسۋعا ىنتالاندىرۋعا تىرىسامىز. ەكىنشىدەن, مۇنداي شارالار اتا-انالاردى ىنتالاندىرادى. قولعا العان جۇمىسىمىزدىڭ ناتيجەسىن كورگەن ولار بالالارىنىڭ بوس ۋاقىتىن ءتيىمدى ۇيىمداستىرۋعا بەلسەندى قاتىسادى دەپ سەنەمىز. ۇشىنشىدەن, تالانتتى, ۇزدىك بالالاردى جىگەرلەندىرەدى. بۇل كوماندانى اۋىل بالالارىنىڭ اراسىنان ىرىكتەپ الدىق. ىرىكتەۋ اشىق ءارى ءادىل ءوتتى. كاسىبي جاتتىقتىرۋشىنىڭ پىكىرىن ەسكەردىك. باستى قاعيدامىز دا – وسى», دەيدى «اۋىل فۋتبول» جوباسىنىڭ جەتەكشىسى سەرىك مامبەتوۆ.
وقۋ-جاتتىعۋ جيىنىنا قاتىسىپ, تاجىريبەسى شىڭدالعان قۇراما كوماندا الداعى ۋاقىتتا ءتۇرلى دەڭگەيدەگى جارىستارعا قاتىسىپ, ناتيجەلى ونەر كورسەتەدى دەگەن ءۇمىت بار. جالپى, مەموراندۋم اياسىندا 2024 جىلدىڭ قاڭتار-ماۋسىم ايلارى ارالىعىندا 2012, 2013 جانە 2014 جىلى تۋعان بالالاردىڭ قاتىسۋىمەن 3 وقۋ-جاتتىعۋ جيىنىن وتكىزۋ جوسپارلانىپ وتىر.
ەسكە سالساق, 2023 جىلدىڭ قاراشا ايىندا «اۋىل فۋتبول» جوباسى مەن «حالىق» قايىرىمدىلىق قورى اراسىندا ىنتىماقتاستىق تۋرالى مەموراندۋمعا قول قويىلعان ەدى. مەموراندۋم اياسىندا رەسپۋبليكا كولەمىندەگى اۋىلدىق ەلدى مەكەندەردىڭ 100 بالالار فۋتبول كومانداسىن قاجەتتى قۇرال-جابدىقتارمەن قامتۋ, 100 جاتتىقتىرۋشىنىڭ UEFA-نىڭ D ساناتى بويىنشا بىلىكتىلىگىن كوتەرۋ جانە وبلىستىق تۋرنيرلەر وتكىزۋ جوسپارلانعان.
2020 جىلدىڭ باسىندا ىسكە قوسىلعان «اۋىل فۋتبول» جوباسىن جۇزەگە اسىرۋ بارىسىندا 100-دەن اسا كومانداعا قولداۋ كورسەتىلدى, 40-تان اسا ءتۇرلى دەڭگەيدەگى تۋرنيرلەر, 30-دان اسا سەمينارلار مەن ترەنينگتەر, جىل سايىنعى فۋتبول دەمالىستارى مەن فەستيۆالدار وتكىزىلىپ كەلەدى. قاتىسۋشى كوماندالار رەسپۋبليكالىق جانە حالىقارالىق دەڭگەيدەگى ءتۇرلى جارىستاردىڭ جەڭىمپازدارى مەن جۇلدەگەرلەرى اتانعانىن ايتا كەتكەن ءجون.
جوبا قازاقستان بويىنشا 50-دەن اسا كوماندانى جانە 2 مىڭنان اسا بالانى قامتيدى. سونداي-اق جوبا 2024 جىلدى ء«بىلىم جىلى» دەپ جاريالادى.
الماتى وبلىسى