ەلىمىزدە پرەزيدەنت جولداۋىنىڭ اياسىندا تۇرمىستىق زورلىق-زومبىلىققا قارسى كۇرەستىڭ جاڭا ءارى ءتيىمدى شارالارىن قاراستىراتىن زاڭ جوباسى ازىرلەنىپ جاتىر, دەپ حابارلايدى Egemen.kz.
مەملەكەت باسشىسى قاسىم-جومارت توقاەۆ «Egemen Qazaqstan» گازەتىنە بەرگەن سۇحباتىندا قوعامدا ورىن الىپ جاتقان زورلىق-زومبىلىق پەن قاتىگەزدىكتىڭ الدىن الۋ ءۇشىن مەملەكەت تاراپىنان قانداي شارالار قاراستىرىلىپ جاتقانىن ايتىپ بەردى.
«مۇنداي قىلمىستاردىڭ الدىن الىپ, جولىن كەسۋ ءۇشىن مەنىڭ تاپسىرماممەن ناقتى شارالار قابىلدانۋدا. ايەلدەر مەن بالالارعا جاسالعان زورلىق-زومبىلىققا قاتىستى قىلمىستاردى تەرگەۋمەن ايەل تەرگەۋشىلەر اينالىساتىن بولدى. سونداي-اق ىشكى ىستەر ورگاندارىندا ايەلدەردى زورلىق-زومبىلىقتان قورعاۋمەن شۇعىلداناتىن مامانداردىڭ شتاتى قالپىنا كەلتىرىلىپ, ولاردىڭ قۇزىرەتى كۇشەيتىلدى.
ءبىز مۇنىمەن شەكتەلگەن جوقپىز. بىلتىر وتباسىنداعى تۇرمىستىق قۇقىق بۇزۋشىلىقپەن كۇرەس تاسىلدەرىن قايتا قارادىق. 1 شىلدەدەن باستاپ پوليتسيا جابىرلەنۋشىنىڭ شاعىمىن ەمەس, قىلمىستىڭ انىقتالۋىن نەگىزگە الىپ, قىلمىستىق ءىستى تىركەۋگە كوشتى. ياعني مۇنداي قىلمىستارعا قاتىستى ءىس قوزعاۋ ءۇشىن زورلىق-زومبىلىقتان جاپا شەككەن ادامنىڭ ارىزى قاجەت ەمەس. تۇرمىستىق زورلىق-زومبىلىق جاساعاندارعا اكىمشىلىك جانە قىلمىستىق جاۋاپكەرشىلىك ەداۋىر كۇشەيتىلدى. جابىرلەنۋشى قايتا-قايتا قىسىمعا ۇشىراماۋى ءۇشىن بۇدان بىلاي مۇنداي ىسكە قاتىستى تاراپتارعا ەكىنشى رەت تاتۋلاسۋ مۇمكىندىگى بەرىلمەيتىن بولدى.
سونداي-اق ءماجىلىستىڭ ءبىر توپ دەپۋتاتى حالىققا جولداۋىمنىڭ اياسىندا تۇرمىستىق زورلىق-زومبىلىققا قارسى كۇرەستىڭ جاڭا ءارى ءتيىمدى شارالارىن قاراستىراتىن زاڭ جوباسىن ازىرلەپ جاتىر», دەدى ەل پرەزيدەنتى.