پرەزيدەنت قاسىم-جومارت توقاەۆ الداعى ۋاقىتتا پرەزيدەنتتىك سايلاۋعا تۇسپەيتىنىن ايتتى, دەپ حابارلايدى Egemen.kz.
رەسپۋبليكالىق «Egemen Qazaqstan» گازەتىندە جاريالانعان سۇحباتىندا پرەزيدەنت ق.توقاەۆ قوعامدا ابىڭ-كۇبىڭ اڭگىمە تۋدىرعان قاۋەسەتكە قاتىستى پىكىرىن ايتتى. 2026 جىلى وتەتىن پرەزيدەنتتىك سايلاۋعا مەملەكەت باسشىسىنىڭ ءتۇسۋى مۇمكىن ەكەن دەگەن سوزگە قاتىستى جاۋاپ بەردى.
«بۇل – جالعان اقپارات. بۇدان بىلاي اركىم ويىنا كەلگەنىن ىستەپ, اتا زاڭعا وڭدى-سولدى وزگەرىس ەنگىزە المايدى. ال وسىنداي ماڭىزدى ماسەلەگە كەلگەندە, ءتىپتى مۇمكىن ەمەس. مەن بۇعان نىق سەنىمدىمىن. كونستيتۋتسيالىق رەفورما اتا زاڭعا قالاي بولسا سولاي وزگەرىس ەنگىزە بەرۋ ءۇشىن جاسالعان جوق.
پرەزيدەنت لاۋازىمىنا ءبىر-اق رەت سايلانۋ تۋرالى ەرەجە ەندى ەشقاشان وزگەرمەيدى. بۇل تالاپ مەملەكەتىمىزدىڭ تاۋەلسىزدىگى, بىرتۇتاستىعى, اۋماقتىق تۇتاستىعى جانە باسقارۋ نىسانى تۋرالى نورمالار سياقتى مىزعىماستاي ەتىپ بەكىتىلگەن.
اقىرى وسى تاقىرىپ قوزعالعان ەكەن, بۇعان قاتىستى كەيبىر جايتقا كەڭىرەك توقتالىپ, ءمان-جايىن اشا كەتەيىن. مەن جەتىجىلدىق ءبىر عانا مەرزىم تۋرالى يدەيانى وسىدان 15 جىل بۇرىن جابىق پىكىرتالاستاردا ايتىپ ءجۇردىم. سول كەزدە ۇسىنىس اسا قولداۋ تابا قويمادى. ءوزىم پرەزيدەنت بولىپ سايلانعاننان كەيىن, وسى باستامامنىڭ ارتىقشىلىعى مەن كەمشىلىگىن ابدەن سالماقتاپ, ونى قالاي جۇزەگە اسىرۋعا بولاتىنى جونىندە كوپ ويلادىم», دەدى پرەزيدەنت.
بىلتىر كونستيتۋتسياعا وزگەرىس ەنگىزۋدەگى نەگىزگى ماقسات سۋپەرپرەزيدەنتتىككە ءتان وكىلەتتىكتەردى جويۋ بولعاندىقتان دا جەتىجىلدىق ءبىر مەرزىم يدەياسىن ءوزى ۇسىنىپ, حالىق قولداۋ بىلدىرگەنىن ايتتى.