مەملەكەت باسشىسى قاسىم-جومارت توقاەۆ كولىك-لوگيستيكالىق الەۋەتتى دامىتۋدى ۇكىمەت جۇمىسىنىڭ نەگىزگى باسىمدىقتارىنىڭ ءبىرى رەتىندە بەلگىلەدى. بۇل تاپسىرمانى ورىنداۋ شاراسى تياناقتى جۇرگىزىلىپ كەلەدى.
2024-2030 جىلدار ارالىعىندا جالپى ۇزىندىعى 9 مىڭ شاقىرىمنان اساتىن بىرقاتار باسىم جول جوبالارىن جۇزەگە اسىرۋ جوسپارلانعان. ونىڭ 4,7 مىڭ شاقىرىمى رەسپۋبليكالىق جەلىدە, 4,5 مىڭ شاقىرىمى وبلىستىق ماڭىزى بار جولداردا. رەسپۋبليكالىق باعىتتارعا كەلەتىن بولساق, بيىلعى جىلى «اقتوبە – ۇلعايسىن – قىزىلوردا», «قاراعاندى – جەزقازعان», «سارىاعاش اينالما جولى», جوبالارى بويىنشا جۇمىستاردى باستاۋ جوسپارلانعان. «قىزىلوردا – جەزقازعان» باعىتى بويىنشا باستالعان جۇمىستار جالعاسادى.
ەلىمىزدىڭ تەڭىز ينفراقۇرىلىمىن دامىتۋ ءۇشىن بيىلعا بىرقاتار ماڭىزدى جوبالار پىسىقتالدى. اقتاۋ پورتىندا كونتەينەرلىك حاب قۇرۋ, ايلاقتاردى رەكونسترۋكتسيالاۋ, سونداي-اق جۇك تيەۋ جابدىقتارىن جاڭارتۋ جوسپارلانىپ وتىر. بىلتىر قۇرىق پورتىندا Abu Dhabi Ports كومپانياسىمەن بىرلەسكەن استىق تەرمينالى ىسكە قوسىلدى. ەندى تەڭىزدەگى قاۋىپسىزدىكتى ارتتىرۋ ءۇشىن 2024-2025 جىلدارى اقتاۋ جانە قۇرىق پورتتارىنىڭ اكۆاتوريالارىندا تەرەڭدەتۋ جۇمىستارى جۇرگىزىلەدى.
اتالعان جوبالاردىڭ بارلىعى جۇزەگە اسسا, قازاقستان تەڭىز پورتتارىنىڭ وتكىزۋ قابىلەتىن 10 ملن تونناعا, ونىڭ ىشىندە كونتەينەرلىك قۋاتتىلىقتى جىلىنا 300 مىڭ جفب-عا دەيىن ارتتىرۋعا مۇمكىندىك تۋادى. ال بىلتىر ىشكى سۋ كولىگىن دامىتۋ كۇشەيتىلدى. ەندى ترانسشەكارالىق ەرتىس وزەنىنىڭ ترانزيتتىك الەۋەتىن ارتتىرىپ, رەسەي – قازاقستان – قىتاي جاڭا ءدالىزىن قۇرۋ جوسپارلانىپ جاتىر. اڭگىمە سەمەي قالاسىندا جاڭا جۇك تاسىمالى ءشليۋزى, تۇعىل اۋىلىنداعى وزەن پورتى جانە قىتاي شەكاراسىنا دەيىن تەمىرجول سالۋ تۋرالى بولىپ وتىر. ترانسشەكارالىق ەرتىس وزەنىنىڭ ترانزيتتىك مۇمكىندىكتەرىن دامىتۋ جۇك تاسىمالداۋ كولەمىن قازىرگى 1,5 ملن توننادان 3,5 ملن تونناعا دەيىن ارتتىرادى دەگەن ءۇمىت بار.
اۆياتسيا سالاسىندا قازىرگى كۇندە جەكە ينۆەستيتسيا ەسەبىنەن شىمكەنت, قىزىلوردا جانە الماتى قالالارىندا 3 جاڭا جولاۋشىلار تەرمينالى سالىنىپ جاتىر. ولاردىڭ پايدالانۋعا دەيىنگى بارلىق جۇمىس وسى جىلى اياقتالىپ, حالىققا قىزمەت كورسەتۋدى باستايدى.
لوگيستيكالىق قىزمەتتى جاقسارتۋ ماقساتىندا تحكب ارقىلى وتەتىن تاسىمالدار ءۇشىن ء«بىر تەرەزە» قۇرۋ ماسەلەسى پىسىقتالىپ جاتىر. تسيفرلىق كولىك ءدالىزىن تولىق ىسكە قوسۋ 2024 جىلعا جوسپارلانعان. ەستە بولسا, بىلتىر قىتايمەن تحكب دامىتۋ تۋرالى كەلىسىمدەرگە قول قويىلدى. ولار ەكسپورتتىق-يمپورتتىق جانە ترانزيتتىك تاسىمالداردى ۇلعايتۋدى, قحر-عا پورتتىق ينفراقۇرىلىمدىق جوبالاردى قارجىلاندىرۋعا كومەك كورسەتۋدى, تحكب بويىنداعى مۋلتيمودالدى تاسىمالدى دامىتۋدى جانە ت. ب. كوزدەيدى.
اقتاۋ جانە قۇرىق پورتتارىنا جۇكتەردى اۆتوموبيلمەن جەتكىزۋ ۋاقىتىن قىسقارتۋ ءۇشىن ۇزىندىعى 515 كم بولاتىن رەسپۋبليكالىق ماڭىزى بار «شالقار – بەينەۋ» اۆتوجولىن سالۋ جوسپارلانعان. قازىر تەحنيكالىق-ەكونوميكالىق نەگىزدەمەسى ازىرلەنىپ جاتىر. باعىتتى دامىتۋ بويىنشا شارالاردى جۇزەگە اسىرۋ ونىڭ وتكىزۋ قابىلەتىن 2027 جىلعا قاراي جىلىنا 10 ملن تونناعا دەيىن ارتتىرۋعا مۇمكىندىك بەرەدى.
رەكونسترۋكتسيالاۋ ناتيجەسىندە وتكىزۋ پۋنكتتەرىنىڭ اۋماقتارىن كەڭەيتۋدى, قولدانىستاعى عيماراتتار مەن قۇرىلىمداردى جاڭعىرتۋدى, زاماناۋي جابدىقتارمەن قامتاماسىز ەتۋ, وندا ستاتسيونارلىق ينسپەكتسيالىق تەكسەرۋ كەشەندەرىن, سونداي-اق پاسپورتتىق باقىلاۋ كابينالارى مەن بولىنگەن قوزعالىس جولاقتارىنىڭ سانىن كوبەيتۋ قاراستىرىلعان. وتكىزۋ پۋنكتتەرىندە اۆتوماتتاندىرۋ مەن وزىق تەحنولوگيالاردى ەنگىزۋ ءۇشىن 2024-2026 جىلدارى 83 بىرلىك «ە Gate» پاسپورتتىق باقىلاۋدىڭ اۆتوماتتاندىرىلعان جۇيەسىن ساتىپ الۋ جوسپارلانعان.