ەۋروپا تەننيس قاۋىمداستىعى (Tennis Europe Tour) بيىلدىڭ قورىتىندىسى بويىنشا وزگە قۇرلىق وكىلدەرى اراسىنان ۇزدىكتەردى انىقتادى.
دارىندى جاستار اتالىمى بويىنشا قازاقستاننىڭ قوس ورەنى – ەۆا كورىشەۆا مەن دانيەل تازابەكوۆ جەڭىمپاز دەپ تانىلدى. ولاردىڭ ەكەۋى دە ءوز قاتارلاستارى اراسىنداعى جارىستاردا تابىستى ونەر كورسەتىپ ءجۇر.14 جاستاعى ەۆا بيىل تۇركيا مەن بەلگيادا توپ جارىپ, Tennis Europe رەيتينگىندە 18-ورىنعا تابان تىرەدى. جۇپتىق سايىستا ول ەكى رەت باس جۇلدەنى ولجالادى. ال 16 جاستاعى دانيەل اتالعان تۋرنيرلەر سەرياسىندا جەتى مارتە باق سىناپ, جاقسى ناتيجە كورسەتتى. ناتيجەسىندە, ۇزدىكتەر تىزىمىندە 20-ساتىعا جايعاستى. سونداي-اق قانداسىمىز بيىل يسپانيا مەن يتاليادا وتكەن جۇپتىق باسەكەلەردە الدىنا جان سالمادى.
جالپى, قازاقستاننىڭ جاس تەننيسشىلەرى بۇعان دەيىن دە ەۋروپا تەننيس قاۋىمداستىعىنىڭ رەيتينگىندە بىرنەشە رەت كوش باستاعانىن ايتا كەتكەن ابزال. ماسەلەن, 2021 جىلى زارا داركەن دارا شىقسا, بىلتىر زاڭعار نۇرلان ۇلى تەڭدەسسىز دەپ تانىلدى.