سپورت ۇزدىكتەرىنىڭ ماراپاتى

سالتاناتتى جيىنعا پارلامەنت دەپۋتاتتارى, وليمپيادا جەڭىمپازدارى, سپورت ارداگەرلەرى, بيىلعى الەم بىرىن­شىلىكتەرى مەن حالىقارالىق جارىس­تار­دىڭ جەڭىمپازى مەن جۇلدەگەرى, سپورت جۋرناليستەرى قاتىستى. جيىندا ءسوز العان سپورت ءمينيسترى ەرمەك مارجىقپاەۆ بيىل ەل سپورتى ءۇشىن ءساتتى جىل بولعانىن, وتانداستارىمىز حالىقارالىق ارەنالاردا جەڭىس تۋىن جەلبىرەتكەن ساتتەرگە ەرەكشە توق­تالىپ, ۇزدىكتەردى قۇتتىقتادى.

«بيىل ەل سپورتىندا ايتۋلى جەڭىستەر از بولعان جوق. جالپى, سپورت سالاسى ەلىمىزدە قارقىندى دامىپ كەلە­دى. سپورتتىڭ بارلىق ءتۇرى بويىنشا وتان­دىق سپورتشىلار جانكۇيەرلەردى ءوز جەتىس­تىكتەرىمەن ءاردايىم قۋانتىپ ءجۇر. ۇلت­تىق قۇراما سپورتشىلارى جىل باسىنان بەرى 1 400 حالىقارالىق جارىسقا قاتىسىپ, 864 مەدال جەڭىپ الدى. ونىڭ ىشىندە 291 التىن, 262 كۇمىس جانە 311 قولا مەدال بار. الەم چەمپيوناتتارىنان – 68 التىن مەدال, ازيا چەمپيوناتتارىنان – 47 التىن جۇلدە, ازيا ويىندارىنان 10 التىن ولجالادى. مەملەكەت باسشىسى ەل تاۋەلسىزدىگى تاريحىندا العاش رەت ازيا ويىندارىنىڭ جۇلدەگەرلەرىن قابىلداپ, ماراپاتتاعانىن ەرەكشە اتاپ وتكىم كەلەدى», دەدى ە.مارجىقپاەۆ.

جىل قورىتىندىسى بويىنشا «ۇزدىك» دەپ تانىلعاندار: نۇركەن راحمانقۇل – «جىلدىڭ ۇزدىك اۋىل جاتتىقتىرۋشىسى», كەنجەعالي بەكقۇلوۆ – «اۋىلدىق جەردەگى ۇزدىك دەنە شىنىقتىرۋ جانە سپورت ادىس­كەرى», راۋان قازەزوۆ – «اۋىلدىق جەر­دەگى ۇزدىك دەنە شىنىقتىرۋ جانە سپورت نۇس­قاۋشىسى», بۇقار جىراۋ اۋدانىنىڭ دەنە شىنىقتىرۋ جانە سپورت ءبولىمى – «اۋداندىق ۇزدىك دەنە شىنىقتىرۋ جانە سپورت ءبولىمى», يسحار كۋرباەۆ – «جاس جانە جاسوسىپىرىمدەر قۇرامىنداعى سپورتشى», ۆيكتوريا ۆولكوۆا – «جىلدىڭ ۇزدىك بالالار جاتتىقتىرۋشىسى», ناتاليا سۋحاچەۆا – «دەنە شىنىقتىرۋ جانە سپورت سالاسىنداعى ۇزدىك مامان», بەرىك قونىسبەكوۆ – «ۇزدىك سپورت دارىگەرى», ءمولدىر جاڭبىرباي, ميلاد كاريمي, رۋسلان قۇربانوۆ – «جىلدىڭ ۇزدىك ناتي­جەلەرى», قازاقستان سپورتتىق اتۋ فەدە­راتسياسى – «جىلدىڭ ۇزدىك اككەر­دي­تەلگەن سپورت فەدەراتسياسى», تيمۋر تۋرلوۆ – «جىلدىڭ ۇزدىك اككرەديتتەلگەن سپورت فەدەراتسياسىنىڭ پرەزيدەنتى», ادىلەت بارمەنقۇلوۆ – «جىلدىڭ ۇزدىك سپورت مەنەدجەرى», مۇمكىندىگى شەكتەۋلى ادامدارعا ارنالعان ء«ۇمىت» سپورت كلۋبى – «جىلدىڭ ۇزدىك سپورت ۇيىمى», الماتى قالاسى – «ۇزدىك سپورتتىق ءوڭىر», سەرگەي شابالين (رۋسلان قۇربانوۆتىڭ جات­تىق­تىرۋشىسى) – «جىلدىڭ ۇزدىك جات­تىقتىرۋشىسى», سامات قاناعاتوۆ, جاندوس بۇسۇرمانوۆ, ەربول قايىروۆ – «ۇزدىك سپورت ءجۋرناليسى», ريزابەك ايتمۇحان – «سپورتتاعى ۇزدىك سەرپىن», ماحمۇد سابىرحان, ەربول حاميتوۆ «جىلدىڭ ۇزدىك سپورتشىسى» اتاعىمەن ماراپاتالدى.