ەلوردامىزدا جاقسىلىق ۇشكەمپىروۆ اتىنداعى جەكپە-جەك سارايىندا تمد ەلدەرىنىڭ اسكەري قىزمەتكەرلەرى اراسىندا ارميالىق قويان-قولتىق ۇرىستان بىرىنشىلىك ءوتتى.
ەلىمىزدىڭ قورعانىس ءمينيسترىنىڭ كۋبوگى ساراپقا سالىنعان باسەكەگە قازاق سپورتشىلارىمەن قاتار رەسەي فەدەراتسياسى, وزبەكستان جانە بەلارۋس رەسپۋبليكالارىنىڭ سايىپقىراندارى باق سىنادى. سولاردىڭ ءبىرى – 57 كگ سالماقتا تۋرنير چەمپيونى اتانعان جاندوس مادەحيانوۆ.
كەز كەلگەن ەلدىڭ اسكەرى قارۋ-جاراعىنىڭ كۇشتىلىگىمەن عانا ەمەس, سونىمەن قاتار جاۋىنگەرلەرىنىڭ دەنە دايىندىعىمەن دە قۋاتتى. وسى ماقساتتا 2018 جىلى قويان-قولتىق ۇرىس اسكەري قىزمەتكەرلەر ءۇشىن مىندەتتى اسكەري دەنە دايىندىعى باعدارلاماسىنا ەنگىزىلدى. بۇل جەكپە-جەك ونەرىنىڭ تۇرلەرى ىقىلىم زاماننان بەرى دە كوپتەگەن ەلدە جاۋىنگەرلەردى تاربيەلەۋ, شىنىقتىرۋ جۇيەسى رەتىندە قولدانىلعان. كەيىنگى عاسىرلاردا قارۋ-جاراق پەن تەحنيكانىڭ دامۋىمەن ماڭىزى تومەندەگەنىنە قاراماستان, ءالى كۇنگە كۇشتىك قۇرىلىمداردىڭ جاۋىنگەرلەرىن دايارلاۋدىڭ ماڭىزدى قۇرامداس بولىگى بولىپ قالىپ وتىر.
بىلەگى مىقتى, جۇرەگى تۇكتى جاندارعا ارنالعان سپورتتى جانىنا سەرىك ەتكەن كەيىپكەرىمىز, حالىقارالىق جارىستىڭ سۋ جاڭا چەمپيونى سەرجانت جاندوس مادەحيانوۆ قاراعاندى وبلىسىنىڭ قارقارالى اۋدانىندا دۇنيەگە كەلگەن. قاراعاندى قالاسىنداعى №61 ورتا مەكتەپتىڭ تۇلەگى. سپورتپەن 16 جاسىنان كاسىبي تۇردە اينالىسىپ كەلەدى. قويان-قولتىق ۇرىستان, كيكبوكسينگتەن, ۋشۋ-ساندادان سپورت شەبەرى. وسى ءۇش سپورت تۇرىنەن دە ەل چەمپيونى.
قورعانىس ءمينيسترىنىڭ كۋبوگى جولىنداعى جارىستارعا ءتورت جىل قاتارىنان قاتىسىپ, بيىل جەڭىستى قولدان بەرمەدى. العاشقى جىلى قاتىسقان تۋرنيردە 3-ورىن, ودان كەيىن 2-ورىن, بىلتىر 3-ورىن العان ەدى. بيىل كوپتەن كۇتكەن جەڭىس تۇعىرىنان كورىندى. سپورتتا جەڭىمپاز بولۋ وڭاي ەمەس. ول ءۇشىن ادامعا تەمىردەي تاباندىلىق پەن مىنەز كەرەك.
«سوڭعى قارسىلاسىم – ءۇش دۇركىن قازاقستان چەمپيونى, ءۇش دۇركىن الەم چەمپيونى. سوندىقتان ودان ايلامدى اسىرۋ ءۇشىن بارىمدى سالدىم. بۇعان دەيىن ءمينيستردىڭ كۋبوگى ءۇشىن وتكەن تۋرنيردە جانە قازاقستان چەمپيوناتىندا ودان ەكى رەت ۇتىلعان ەدىم», دەيدى جاندوس.
اسكەرگە كەلگەن سوڭ ارميالىق قويان-قولتىق ۇرىسپەن شۇعىلدانا باستاعان وعان جالپى جەكپە-جەك تەحنيكاسى جاقسى تانىس. ويتكەنى بۇل سپورت ءتۇرى دە جاۋىنگەردى شىڭدايتىن, قولمەن, اياقپەن سوققى جاساپ, لاقتىرۋ, كۇرەسۋ ادىستەرىنە نەگىزدەلگەن. «الداعى ماقساتىم – قويان-قولتىق ۇرىستان الەم چەمپيونى اتانىپ, حالىقارالىق دارەجەدەگى سپورت شەبەرى اتاعىن الۋ», دەيدى جاندوس.