استانا قالاسىنىڭ اكىمى جەڭىس قاسىمبەك ورتالىق كرممۋنيكاتسيالار قىزمەتىندە ەلوردانىڭ الەۋمەتتىك, ەكونوميكالىق, دەموگرافيالىق وسۋىنە قاتىستى باق وكىلدەرىنىڭ سۇراقتارىنا جاۋاپ بەردى, دەپ جازادى Egemen.kz.
ەلوردا اكىمى جەڭىس قاسىمبەككە وڭىرلەردەن باس قالاعا ازاماتتاردىڭ كوشۋى شەكتەلە مە دەگەن سۇراق قويىلدى.
اكىم ءوز كەزەگىندە مۇنداي شەكتەۋ قويۋ ورىنسىز ەكەنىن ءتۇسىندىردى.
«ۋنيتارلى مەملەكەتپىز, استاناعا كوشەتىندەردى شەكتەۋ, ونداي سۇراقتار بولۋى مۇمكىن ەمەس. بۇل بارشا قازاقتىڭ استاناسى, ولاردىڭ مۇندا كەلۋگە قۇقىعى بار. جالعىز جاۋاپ وسى بولۋى مۇمكىن», دەپ جاۋاپ بەردى جەڭىس قاسىمبەك.
الايدا اكىمنىڭ ايتۋىنشا, استانا ينفراقۇرىلىمى اعىل-تەگىل كوشتى قابىلداۋعا, كەلگەندەرگە جايلى تۇرمىس تارتۋعا دايىن ەمەس.
«راسىندا, كوممۋنالدىق-تۇرمىستىق, ينجەنەرلىك جانە الەۋمەتتىك ينفراقۇرىلىم بويىنشا كوشى-قون قارقىنىنان بەلگىلى ءبىر ارتتا قالۋ بار, سوندىقتان قازىر ءتيىستى شارالار قابىلدانىپ جاتىر. جوعارىدا ايتىلعانداي, مەكتەپتەر مەن مەديتسينالىق مەكەمەلەردىڭ, مەكتەپكە دەيىنگى ءبىلىم بەرۋ نىساندارىنىڭ كوپتەپ سالىنۋى. بۇگىن وسى ماسەلەگە قاتىستى ماسەلەلەردىڭ بارلىعى دەرلىك كوتەرىلدى, سونىمەن قاتار تىرشىلىكتى قامتاماسىز ەتۋ نىساندارىنىڭ قۇرىلىسى: جىلۋ, سۋ, ەلەكتر ەنەرگياسى جانە ت.ب. ماسەلەلەردى جەدەل شەشۋگە تىرىسامىز», دەدى استانا قالاسىنىڭ اكىمى.