كونە شاھاردىڭ كوزىندەي بولعان الماتىداعى «كوك بازاردىڭ» قادىرىن ونىڭ بايىرعى تۇرعىندارى بىلەدى. ەندى تاريحقا اينالىپ ۇلگەرگەن, كەشەگى كەڭەس وكىمەتىنىڭ تۇسىندا قازىرگىدەي سامساعان سۋپەرماركەتتەردىڭ, قاپتاعان ساۋدا ورىندارىنىڭ بولماعانىنا تاۋەلسىزدىكتىڭ بەدەرىندە تۋعان بالالاردى سەندىرە المايسىڭ. جاستاردى ايتپاعاندا, جۇرت بىلەتىن, ەل باراتىن دۇكەندەر دە ساۋساقپەن سانارلىق بولعاندىقتان, ازىق-ت ۇلىك ءۇشىن كوبىنەسە «كوك بازارعا» عانا باراتىنىن ءوزىمىز دە ۇمىتا باستادىق.
دەگەنمەن بۇگىندە وسى بازاردى ون وراپ الاتىن ساۋدا ورىندارى جەتكىلىكتى بولسا دا, نەگە وعان جاڭعىرتۋ جۇمىستارى جۇرگىزىلىپ جاتقانىنا ەرەكشە توقتالۋىمىزدىڭ دا ءجونى بار. ويتكەنى بيىل قالادا «كوك بازاردى» سۇرەدى ەكەن, ورنىنا گيپەرماركەت سالىنادى ەكەن دەگەن سىبىس تاراعاندا, قالا تۇرعىندارىنىڭ تاريحي بازاردى قيراتۋعا قيماعانى راس.
بىراق بازاردىڭ تاريحي كەلبەتى مەن ونىڭ مادەني قۇندىلىعى ساقتالىناتىن بولدى. پاۆيلونداردى جاڭعىرتۋ 2023 جىلدىڭ شىلدەسىندە باستالدى, ونى 2025 جىلدىڭ سوڭىنا دەيىن اياقتاۋ جوسپارلانعان. قۇرىلىس-مونتاجداۋ جۇمىستارىن جۇرگىزۋگە قازقسعزي زەرتتەۋ قورىتىندىسى الىندى. قايتا قۇرۋ كەزىندە بازار شتاتتىق رەجىمدە ساۋداسىن جالعاستىرا بەرمەك.
قالا اكىمى ەربولات دوساەۆ ورتالىق بازاردىڭ ابدەن توزعاندىقتان, جاڭعىرتۋ تۋرالى شەشىم قابىلداپ وتىر.
كاسىپكەرلىك جانە ينۆەستيتسيالار باسقارماسىنىڭ باسشىسى بەرىك سولتانباەۆ الماتى اكىمىنە جوبانى جۇزەگە اسىرۋدىڭ كەزەڭدەرى مەن كەلەشەگى تۋرالى بايانداعان كەزدە, ينجەنەرلىك جەلىلەردى قايتا قۇرۋ قاراستىرىلعانىن, ساۋدا الاڭدارى جاڭعىرتىلىپ, قاسبەتى جاڭارتىلىپ جاتقانىن جەتكىزدى. سونىمەن قاتار جىبەك جولى كوشەسى جاعىنان ىرگەلەس اۋماقتى اباتتاندىرۋ جۇرگىزىلەدى, جاڭا قوعامدىق كەڭىستىك – قالا تۇرعىندارى ءۇشىن جاياۋ جۇرگىنشىلەر ايماعى پايدا بولادى.
«كوك بازار» – قالاداعى ەرەكشە ورىن. مۇندا تۇرعىندار مەن قالا قوناقتارى ساۋدا جاساۋعا كەلىپ قانا قويماي, ونىڭ ەرەكشە اتموسفەراسىن سەزىنەدى. ونىڭ بۇزباي ساقتاپ, توبەسى جابىلعان بازار جاساعان ءجون. باستىسى رەتكە كەلتىرۋ, بىراق «كوك بازاردىڭ» قالانىڭ مادەني مەنشىگى جانە تۋريستىك ورنى بولىپ قالعانى ماڭىزدى. سەبەبى الماتى «كوك بازارسىز» – الماتى ەمەس, سوندىقتان قالامىزدىڭ تاريحي ورتالىعىن ساقتاۋدى سۇرايمىن», دەدى اكىم ەربولات دوساەۆ.
بۇعان دەيىن, 2017 جىلى قالا بازارلارىن جاڭعىرتۋ اياسىندا «كوك بازاردا» جوندەۋ جۇمىستارى جۇرگىزىلىپ, اشىق كونتەينەرلىك قاتارلاردىڭ ورنىنا اۋدانى 20 مىڭ شارشى مەتر بولاتىن جاڭا «قىسقى پاۆيلون» سالىنىپ, ونىڭ جارتىسى ساۋدا الاڭىنا, ەكىنشى بولىگى 400 ورىندىق ەكىدەڭگەيلى اۆتوپاركينگكە بەرىلگەن ەدى.
الماتى