سىرداريا اۋدانىندا 80 وتباسىنا جاڭا باسپانا كىلتى تابىس ەتىلدى. وسى اۋدانعا جاساعان ساپارى اياسىندا قۋانىشقا كەنەلگەن تۇرعىندارمەن كەزدەسكەن وبلىس اكىمى نۇرلىبەك نالىباەۆ قولجەتىمدى باسپانا – مەملەكەت باسشىسىنىڭ تاپسىرماسىمەن ۇكىمەت پەن وبلىس اكىمدىگى تاراپىنان جۇزەگە اسىرىلاتىن باستى ستراتەگيالىق جوسپارلاردىڭ ءبىرى ەكەنىن اتاپ ءوتتى.
– جىل سايىن ايماقتا قولدانىسقا بەرىلگەن تۇرعىن ءۇي كولەمى ارتىپ كەلەدى. بيىل 4170 پاتەرلىك 300 تۇرعىن ءۇيدىڭ قۇرىلىسى جۇرگىزىلىپ, ونىڭ ىشىندە 2500-گە جۋىق پاتەر ءوز يەلەرىنە تابىستالدى. وسىلايشا, 11 مىڭنان اسا جەرلەسىمىز جايلى ۇيگە قونىس تەپتى. حالىقتىڭ الەۋمەتتىك وسال توپتارى ءۇشىن 1000-نان اسا پاتەر ساتىپ الىنۋدا. بۇعان دەيىن ارال, قازالى, جاڭاقورعان, شيەلى, جالاعاش اۋداندارىندا 300-دەن اسا وتباسى باسپانا قۋانىشىنا كەنەلسە, بۇگىن سىرداريادا 80 ۇيەلمەن قونىس تويىن تويلايدى, – دەدى ايماق باسشىسى.
كەنتتە بوي كوتەرگەن 40 ءۇيدىڭ ارقايسىسىندا 2 پاتەردەن بار. قۇرىلىسى بيىل مامىر ايىندا باستالعان ۇيلەردەگى ءار پاتەردىڭ جالپى الاڭى 65 شارشى مەتر بولادى. وسى جىلى سىرداريا اۋدانىنىڭ بيۋدجەتى 11 ملرد تەڭگەدەن اسىپ, اۋدانداعى كەزەك كۇتتىرمەيتىن تۇيتكىلدەردى شەشۋگە, تۇرعىندارىنىڭ ءومىر ءسۇرۋ ساپاسىن ارتتىرۋعا باعىتتالعان قارجى كولەمى ۇلعايدى. اۋدانداعى 72 شاقىرىم جولدى جوندەۋگە 3,4 ملرد تەڭگە ءبولىندى.
وبلىس ەلدى مەكەندەرىن گازداندىرۋ باعىتىنداعى جۇمىستار قالا ىرگەسىندەگى بۇل اۋداندا دا جالعاسىپ جاتىر. كوپ ۇزاماي «كوگىلدىر وتىن» يگىلىگىن كورە باستايتىن ەلدى مەكەندەر قاتارىندا اۋدانداعى ساكەن سەيفۋللين جانە اسقار توقماعامبەتوۆ اۋىلدىق وكرۋگتەرى تۇر.
قىزىلوردا