بۇگىن استانادا بيزنەس, عىلىم, مادەنيەت, مەديا جانە اقپاراتتىق تەحنولوگيالار سالاسىنداعى ۇزدىك 30 جوبانىڭ اۆتورىنا «تاۋەلسىزدىك ۇرپاقتارى» گرانتى تابىستالدى, دەپ حابارلايدى Egemen.kz مادەنيەت جانە اقپارات مينيسترلىگىنىڭ ءباسپاسوز قىزمەتىنە سىلتەمە جاساپ.
سالتاناتتى ءىس-شاراعا مادەنيەت جانە اقپارات ءمينيسترى ايدا بالاەۆا, پارلامەنت ءماجىلىسىنىڭ دەپۋتاتتارى, قر پرەزيدەنتى جانىنداعى جاستار ساياساتى كەڭەسىنىڭ وكىلدەرى, مەملەكەت جانە قوعام قايراتكەرلەرى قاتىستى.
مەملەكەت باسشىسى ق.توقاەۆ 2021 جىلى «تاۋەلسىزدىك ۇرپاقتارى» گرانتىن جاس دارىنداردىڭ جاڭا جانە قولدانىستاعى باستامالارىن قولداۋ ماقساتىندا تاعايىنداعان بولاتىن. گرانت اياسىندا 63 ادام ءوز جوباسىن قازاقستاندا عانا ەمەس شەتەلدە دە ءتۇرلى سالالاردا تابىستى جۇزەگە اسىرۋدا.
ء«بىز ۇلكەن وزگەرىستەر داۋىرىندە ءومىر ءسۇرىپ جاتىرمىز. جاستارعا دۇرىس تاڭداۋ جاساۋ, سەنىمگە لايىق ازامات بولۋ, ءوزىن-ءوزى دامىتۋ, وقۋ جانە ەڭبەك ارقىلى تابىسقا ۇمتىلۋ سياقتى ەڭ ماڭىزدى جاۋاپكەرشىلىك جۇكتەلگەن. مەملەكەت باسشىسى قاسىم-جومارت توقاەۆ جاستاردىڭ دامۋىنا, ولارعا جاڭا جانە اۋقىمدى مۇمكىندىكتەر اشۋعا ەرەكشە كوڭىل بولەدى. بار ءۇمىتىمىز - ەڭبەك پەن ءبىلىمنىڭ جولىمەن جۇرەتىن, ادامدىق قادىر-قاسيەتتىڭ ءمانىن تەرەڭ تۇسىنەتىن, اتا-بابا ءداستۇرىن قاستەرلەيتىن جاستاردا. بۇگىنگى بەرىلگەن گرانت - سىزدەردىڭ تاباندىلىعىڭىز بەن تالانتىڭىزدىڭ, قاجىرلى ەڭبەگىڭىز بەن ادالدىعىڭىزدىڭ, قوعام ءۇشىن ماڭىزدىلىعىڭىز بەن ءوز الەۋەتىڭىزدى مويىنداۋىڭىزدىڭ سىيى. بۇل قۇرمەت ودان ءارى دامۋ مەن ىنتالانۋعا جەتەلەسىن. ءاربىر قادامدارىڭىز جاڭا جەتىستىكتەر مەن جاڭالىقتارعا جول اشىپ, شىعارماشىلىق, عىلىمي, ىسكەرلىك يدەيالارىڭىز ەلىمىزدىڭ دامۋىنا ەلەۋلى ۇلەس قوسۋعا مۇمكىندىك بەرسىن. سىزدەر قازاقستاندى بۇدان دا زور كوركەيتەتىندەرىڭىزگە سەنەمىن!», دەدى ا.بالاەۆا.
بەس باعىت بويىنشا كەلىپ تۇسكەن 3 مىڭنان استام ءوتىنىم اراسىنان ۇزدىك دەپ تانىلعان 30 اۆتورعا 3 ميلليون تەڭگە مولشەرىندە گرانت تابىستالدى.
ولاردىڭ اراسىندا قازاقستاننىڭ مادەني مۇراسىن ناسيحاتتاۋعا, حالىقتىق مادەني داستۇرلەر مەن ونەردى ىلگەرىلەتۋگە, IT سالاسىنداعى عىلىمي زەرتتەۋلەردى, ستارتاپتار مەن جوبالاردى, ەكونوميكانىڭ نەگىزگى سەكتورلارىنداعى كرەاتيۆتى بيزنەس يدەيالاردى ىسكە اسىرۋعا باعىتتالعان جوبا يەلەرى بار.
ەلىمىزدە 1992 جىلدان باستاپ ءداستۇرلى تۇردە عىلىمي, شىعارماشىلىق, كرەاتيۆتى قىزمەتپەن اينالىساتىن, سونداي-اق سپورت سالاسىندا جەتىستىكتەرى بار جاستارعا «دارىن» مەملەكەتتىك جاستار سىيلىعى بەرىلەدى. سونىمەن قاتار جاس جازۋشىلار مەن اقىندار پرەزيدەنتتىك ارناۋلى ادەبي سىيلىقتىڭ يەگەرى اتانسا, دارىندى عالىمدار د.ا. قوناەۆ اتىنداعى سىيلىقتار مەن عىلىمي ستيپەنديالار الادى.