استاناداعى Beeline Arena كەشەنىندە كاسىپقوي بوكستان «IBA-نىڭ چەمپيوندار ءتۇنى» دەپ اتالاتىن حالىقارالىق تۋرنير ۇيىمداستىرىلدى. اتالعان جارىستا قازاقتىڭ جۋان جۇدىرىقتى جىگىتتەرىمەن قاتار, الىس-جاقىن شەت مەملەكەتتەردەن كەلگەن بىرقاتار تانىمال بىلعارى قولعاپ شەبەرى كۇش سىناستى. بۇل باسەكەلەردە سانجار تاشكەنباي (51 كگ) وزبەكستاندىق نوديرجون مىرزااحمەدوۆتەن, دانيار ەلەۋسىنوۆ (71 كگ) وڭتۇستىك افريكا رەسپۋبليكاسىنىڭ وكىلى دجابۋلاني ماكحەنسەدەن, بەكزاد نۇرداۋلەتوۆ (80 كگ) رەسەيلىك نيكيتا زوننان باسىم تۇسسە, سەرىك تەمىرجانوۆ (63,5 كگ) سەربيالىق پاۆەل فەدوروۆقا, دۋلات بەكباۋوۆ (67 كگ) رەسەيدىڭ تاعى ءبىر بوكسشىسى حاريتون اگراباعا, اسلانبەك شىمبەرگەنوۆ (71 كگ) مەكسيكالىق حوسە ميگەل بوررەگوعا جانە ەراسىل جاقپەكوۆ (80 كگ) نيدەرلاندتىق گرادۋس كراۋسقا ەسە جىبەردى.
رەسەيدىڭ ەكاتەرينبۋرگ قالاسىندا وتكەن RCC 17 تۋرنيرىندە اۋىر سالماقتا ايقاساتىن قازاقتىڭ ارالاس جەكپە-جەك شەبەرى اسىلجان باقىتجان ۇلى كەزىندە UFC-دە باق سىناعان رەسەيلىك ماكسيم گريشينمەن شەبەرلىك بايقاستى. بۇل باسەكە قانداسىمىزدىڭ باسىمدىعىمەن ءوتتى. قارسىلاسىنا قاراعاندا «ساق» وتە ساۋاتتى قيمىلداپ, سوققىسىن دا كوبىرەك دارىتتى. بىراق ادىلدىكتى بەلدەن باسقان تورەشىلەر جەرگىلىكتى سپورتشىنىڭ قولىن كوتەردى.
شورت-ترەكتەن وڭتۇستىك كورەيانىڭ استاناسى سەۋلدە شىمىلدىعى تۇرىلگەن الەم كۋبوگى كەزەڭدىك سايىسىندا دەنيس نيكيشا 500 مەترلىك قاشىقتىقتى 41.196 سەكۋندتا جۇگىرىپ ءوتىپ, قولا مەدال يەلەندى. ول تەك قىتايلىق شاوان ليۋ (41.196) مەن وڭتۇستىككورەيالىق ي-را سيوگەدەن (41.205) قالىپ قويدى.
شايبالى حوككەيدەن قازاقستاننىڭ جاستار قۇراماسى 2025 جىلى وتەتىن الەم بىرىنشىلىگىنىڭ ىرىكتەۋ تۋرنيرىندەگى سوڭعى كەزدەسۋدە اۋستريادان بۋلليت سوعۋ بارىسىندا ۇتىلدى. بىراق بۇل جاعداي جارىس كەستەسىنە ايتارلىقتاي اسەر ەتە قويمادى. سەبەبى وسىعان دەيىن جەرلەستەرىمىز ءتورت كەزدەسۋدىڭ بارلىعىندا جەڭىسكە جەتىپ, نەگىزگى جارىستىڭ جولداماسىنا كۇنى بۇرىن يەلىك ەتكەن ەدى. تاعى ءبىر ايتا كەتەرلىك جايت, وسى ءتۋرنيردىڭ قورىتىندىسى بويىنشا ۆلاديمير نيكيتين ەڭ ۇزدىك قاقپاشى بولىپ تانىلدى. ول ءوز قاقپاسىنا باعىتتالعان سوققىلاردىڭ 64,44 پايىزىن كەرى قايتارىپ, 119 رەت سەيۆ جاسادى.
ارالاس جەكپە-جەكتەن اقش-تىڭ لاس-ۆەگاس قالاسىندا ۇيىمداستىرىلعان UFC 296 تۋرنيرىندە ءالى دە جەڭىلىستىڭ كەرمەك ءدامىن تاتىپ كورمەگەن جارتىلاي ورتا سالماقتاعى شاۆقات راحمونوۆ 40 جاستاعى ساقا سپورتشى ستيۆەن تومپسونمەن توبەلەستى. جەرگىلىكتى فايتەر ءبىزدىڭ جىگىتكە جارىتىپ قارسىلىق كورسەتە المادى. باسەكەنىڭ باسىنان تىزگىندى قولىنا العان شاۆقات ەكىنشى كەزەڭ اياقتالۋىنا ساناۋلى سەكۋندتار قالعاندا ستيۆەندى قىلقىندىرىپ تاستادى. بۇل – 29 جاستاعى قازاقتىڭ قايسار ۇلىنىڭ وكتاگونداعى 18-جەڭىسى!
بوكستان الەم چەمپيوناتىنىڭ قولا جۇلدەگەرى تۇرسىنباي قۇلاحمەت كاسىپقوي رينگتەگى ءوزىنىڭ كەزەكتى جەكپە-جەگىن ۇلىبريتانيانىڭ ساندەرلەند قالاسىندا وتكىزدى. بۇل باسەكەدە ورتا سالماقتاعى سىر بويىنىڭ ساڭلاعى فرانتسيالىق فۋاد ەل ءماسسۋديدى ۇپاي سانىمەن ۇتتى.
سانكت-پەتەربۋرگتە شايبالى حوككەيدەن ء«بىرىنشا ارنا كۋبوگى» جولىنداعى جارىس ءوز مارەسىنە جەتتى. تۇساۋكەسەر كەزدەسۋدە بەلارۋستەن (2:6) ۇتىلعان وتانداستارىمىز كەلەسى ماتچتا جحل-دىڭ جۇلدىزدارىنان (3:1) باسىم ءتۇستى. بىراق سوڭعى ويىندا رەسەي-25 كومانداسىنا (2:5) ەسە جىبەردى. ناتيجەسىندە, قازاقستاننىڭ حوككەيشىلەرى ءۇشىنشى ورىندى ەنشىلەدى.