قاتاردىڭ باس شاھارى – دوحادا اۋىر اتلەتيكادان گران-پري ءتۋرنيرى اياقتالدى. وكىنىشكە قاراي, جارىس جولىنا شىققان بىردە-ءبىر جەرلەسىمىز جەڭىس تۇعىرىنا كوتەرىلە المادى.
ەڭ ۇزدىك ناتيجەگە اقمولدا سايرامكەز قول جەتكىزدى. 67 كيلو سالماق دارەجەسىندە كۇش سىناسقان قانداسىمىز قوسسايىستىڭ قورىتىندىسى بويىنشا 294 (126+168) كگ سالماقتى ەڭسەرىپ, ءتورتىنشى ورىنعا تابان تىرەدى. بۇل تارتىستا اقمولدا سولتۇستىك كورەيا, بولگاريا جانە تۇرىكمەنستاننىڭ سپورتشىلارىنان قالىپ قويدى. وزگە زىلتەمىرشىلەرىمىزدىڭ ناتيجەلەرى ودان دا تومەن. تىپتەن, 81 كگ سالماقتا سىنعا تۇسكەن ريو وليمپياداسىنىڭ قولا جۇلدەگەرى, دۇنيەجۇزىلىك ۋنيۆەرسيادانىڭ جەڭىمپازى, ازيا چەمپيونى دەنيس ۋلانوۆتىڭ ءوزى 14-ورىندى قاناعات تۇتتى.
ەرلەر مەن ايەلدەردى قوسا العاندا جالپى ەسەپتە سولتۇستىك كورەيا قۇراماسىنا تەڭ كەلەر كوماندا تابىلمادى. دوحادا ساراپقا سالىنعان 18 باس جۇلدەنىڭ توعىزىن سولار يەلەندى. ەكىنشى ورىندا – قىتاي. قىتاي ەلىنىڭ وكىلدەرى ءۇش التىندى ولجالادى. سونداي-اق تەڭدەسسىز دەپ تانىلعاندار قاتارىندا لاتۆيا, بولگاريا, تۇركيا, قاتار, ازەربايجان جانە ارمەنيانىڭ ءبىر-ءبىر زىلتەمىرشىسى بار.