قىزىلوردانىڭ ءدال ىرگەسىندە ناعي ءىلياسوۆ اتىنداعى ەلدى مەكەن بار. ەكىنشى دۇنيەجۇزىلىك سوعىستان بۋداپەشت قالاسىن ازات ەتۋدەگى ەرلىگى ءۇشىن كەڭەس وداعىنىڭ باتىرى اتانىپ قايتقان قاھارمان وسى اۋىلدىڭ ءتۇتىنىن ءتۇزۋ ۇشىرۋ ءۇشىن جان اياماي ەڭبەك ەتكەن. وسى كۇنى باتىر ەسىمىن يەلەنگەن اۋىلدىڭ تۇرمىسى قالادان بىردە-ءبىر كەم ەمەس. سىرتتان كەلگەن قوناقتار بايىرعى جۇرتتاعى بايىرقالى تىرلىكتى بىردەن بايقايدى.
تاۋەلسىزدىك مەرەكەسى قارساڭىندا وبلىس اكىمى نۇرلىبەك نالىباەۆ پەن سىر وڭىرىنە ارنايى كەلگەن پارلامەنت ماجىلىسىندەگى «Amanat» پارتياسى فراكتسياسىنىڭ جەتەكشىسى ەلنۇر بەيسەنباەۆ, ءماجىلىس دەپۋتاتى مارحابات جايىمبەتوۆ سىرداريا اۋدانىنداعى وسى اۋىلعا بارىپ, دارىگەرلىك امبۋلاتوريانىڭ اشىلۋ راسىمىنە قاتىستى. جاڭالىعى كوپ اۋىلداعى بۇل نىسان پرەزيدەنت تاپسىرماسىمەن قولعا الىنعان «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا سىر وڭىرىندە سالىنىپ جاتقان 27 مەديتسينالىق نىساننىڭ العاشقىسى ەكەندىگىن دە ايتا كەتەيىك. ۇلتتىق جوبا اياسىنداعى العاشقى امبۋلاتوريا عيماراتىنىڭ اۋدانى – 860 شارشى مەتر.
– مەملەكەت باسشىسىنىڭ تاپسىرماسىمەن ەلىمىزدە دەنساۋلىق ساقتاۋ سالاسىنا ايرىقشا كوڭىل ءبولىنىپ, مەديتسينالىق قىزمەتتىڭ قولجەتىمدىلىگىن قامتاماسىز ەتۋ, ينفراقۇرىلىمدى جاڭعىرتۋ باعىتىندا كوپ باستاما قولعا الىندى. مىسالى, «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە ايماق ەلدى مەكەندەرىندە 27 نىسان سالىنىپ جاتىر. سالاداعى وسىنداي سالماقتى باستامالار الداعى ۋاقىتتا دا ءوڭىر حالقىنىڭ يگىلىگىنە اينالا بەرەدى دەپ سەنەمىز, – دەدى وبلىس باسشىسى.
پارلامەنت ماجىلىسىندەگى «Amanat» پارتياسى فراكتسياسىنىڭ جەتەكشىسى ەلنۇر بەيسەنباەۆ اۋىل تۇرعىندارىن جاڭا نىساننىڭ اشىلۋىمەن قۇتتىقتاپ, سالا ارداگەرى تۇرعانباي ماحانوۆ باتا بەردى. مەرەكە قارساڭىنداعى سالتاناتتا نىساندى سالعان مەردىگەر مەكەمە وكىلدەرى جانە اۋىلدىڭ دامۋىنا ۇلەس قوسقان ازاماتتار ماراپات يەلەندى.
جالپى, وبلىس بيۋدجەتىنىڭ نەگىزگى بولىگى الەۋمەتتىك سالاعا باعىتتالىپ كەلەدى. بيىل ايماق قازىناسىنىڭ قورجىنى 57 پايىزعا ءوسىپ, 609 ملرد تەڭگەگە جەتتى. ءوڭىر مەديتسيناسىنا 138 ملرد 600 ملن تەڭگەدەن استام قارجى قارالىپتى. وسى جىلى قىزىلوردا قالاسىندا 36 ملرد 400 ملن تەڭگەگە ءبىر اۋىسىمدا 100 كەلۋشىگە ارنالعان ەمحاناسى جانە ونكولوگيالىق بولىمشەسى بار 300 ورىندىق كوپبەيىندى اۋرۋحانانىڭ قۇرىلىسى باستالدى. قۇنى 2 ملرد 900 ملن بولاتىن قان ورتالىعى جاقىن كۇندەرى قولدانىسقا بەرىلەدى. وعان قوسا 9 مەديتسينالىق نىسانعا كۇردەلى جوندەۋ جۇرگىزىلىپ, 5 نىساننىڭ جىلۋ جۇيەسى گازعا اۋىستىرىلىپ جاتىر.
جىل سوڭىنا دەيىن كوپبەيىندى وبلىستىق اۋرۋحانا جانىنان 70 توسەكتىك پەريناتالدىق ورتالىق, قالا ىرگەسىندەگى دوسان ەلدى مەكەنىندە مەديتسينالىق بەكەت, جاڭاقورعانداعى كوپبەيىندى اۋداندىق اۋرۋحانادان بالالارعا ارنالعان «قامقورلىق» وڭالتۋ ورتالىعى اشىلماق.
قىزىلوردا وبلىسى