ءبىر ەمەس, ەكى بىردەي وبلىستىڭ ورتالىقتاندىرىلعان سۋمەن قامتاماسىز ەتەتىن «استراحان-ماڭعىشلاق» ماگيسترالدى سۋ قۇبىرى قايتا جوندەلىپ, ىسكە قوسىلدى. وسىلايشا, قۇبىردىڭ قۋاتتىلىعى 1,5 ەسە ارتتى. پايدالانۋعا بەرىلگەن 177 شاقىرىم قۇبىر اتىراۋ جانە ماڭعىستاۋ وبلىسىنىڭ, سونداي-اق جاڭاوزەن قالاسىنىڭ اۋىز سۋعا قاتىستى قاجەتتىلىگىن وتەيدى.
پرەمەر-مينيستر ءاليحان سمايلوۆ اتاپ وتكەندەي, قايتا جاڭعىرتىلعان «استراحان-ماڭعىشلاق» ماگيسترالدى سۋ قۇبىرى اتىراۋ جانە ماڭعىستاۋ وبلىستارىنىڭ حالقى مەن كاسىپورىندارى جانە اۋىل شارۋاشىلىعى ءۇشىن تاۋلىگىنە قوسىمشا 60 مىڭ تەكشە مەتر سۋ بەرۋ كوزىنە اينالادى. جوبا اياسىندا توزىعى جەتكەن جابدىقتاردى جاڭارتۋ جۇمىستارى جۇرگىزىلىپ, ۇزىندىعى شامامەن 177 شاقىرىم ماگيسترالدى سۋ قۇبىرىنىڭ ەكى ۋچاسكەسى اۋىستىرىلدى. قۇرىلىسقا 500-دەن استام ادام جۇمىلدىرىلعان. سونىڭ ناتيجەسىندە «استراحان-ماڭعىشلاق» سۋ قۇبىرىنىڭ وتكىزۋ قابىلەتى تاۋلىگىنە 110-نان 170 مىڭ تەكشە مەترگە دەيىن ارتتى.
«سۋ قۇبىرىن كۇردەلى جوندەۋ بەلگىلەنگەن مەرزىمنەن بۇرىن اياقتالدى. وعان ءتيىمدى جوبالىق شەشىمدەر مەن جوعارى قۇرىلىس قارقىنى ناتيجەسىندە قول جەتكىزىلدى. بۇل جوبا سوڭعىسى ەمەس, وڭىردە سۋمەن قامتاماسىز ەتۋگە بايلانىستى باسقا دا اۋقىمدى جوبالار بار», دەدى ءا.سمايىلوۆ.
ۇكىمەت باسشىسىنىڭ ايتۋىنشا, ەكى ءوڭىر ءۇشىن ستراتەگيالىق ماڭىزى زور «استراحان-ماڭعىشلاق» ماگيسترالدى سۋ قۇبىرىن كۇردەلى جوندەۋ بەلگىلەنگەن مەرزىمنەن بۇرىن اياقتالدى.
«وعان ءتيىمدى جوبالىق شەشىمدەر مەن قۇرىلىس جۇمىستارىن ساپالى جۇرگىزۋدىڭ ناتيجەسىندە قول جەتتى. بۇل وسىنداي جوبالاردىڭ سوڭعىسى ەمەس. وڭىردە سۋمەن قامتاماسىز ەتۋگە بايلانىستى باسقا دا اۋقىمدى جوبالار بار», دەدى ءا.سمايىلوۆ.
ماسەلەن, كەندىرلى كەنتىندە جالپى قۋاتى تاۋلىگىنە 50 مىڭ تەكشە مەتر بولاتىن سۋ تۇششىتۋ زاۋىتى سالىنىپ جاتىر. اتالعان كەنتتەن جاڭاوزەن قالاسىنا دەيىن ۇزىندىعى 105 شاقىرىمدى قۇرايتىن ماگيسترالدى سۋ قۇبىرى تارتىلادى.
ء«بىزدىڭ ماقساتىمىز – 2026 جىلعا قاراي ەلدى مەكەندەردى 100 پايىز اۋىز سۋمەن قامتاماسىز ەتىپ, تۇرعىندار مەن ءوندىرىس ورىندارىن ودان ءارى تۇراقتى بەرىلەتىن سۋمەن قامتاماسىز ەتۋ. بۇل ءۇشىن جاڭا گيدروتەحنيكالىق قۇرىلىستار مەن سۋ قۇبىرلارىن سالۋ, قازىرگى قۇبىرلاردى جاڭعىرتۋ بويىنشا جوبالار ىسكە اسىرىلىپ وتىر. ەلدى مەكەندەرگە سۋ تاراتۋ جەلىلەرى سالىنىپ, ال شالعاي اۋىلداردا جەراستى سۋ كوزىنەن سورعى مودۋلدەرى ورناتىلىپ جاتىر. الدىمىزدا ءالى دە كوپ جۇمىس بار», دەپ اتاپ ءوتتى ۇكىمەت باسشىسى.
«قازمۇنايگاز» ۇك» اق باسقارما توراعاسى ماعزۇم مىرزاعاليەۆتىڭ ايتۋىنشا, جوبانى ىسكە اسىرۋ كەزىندە قازاقستاندىق ءونىم وندىرۋشىلەرمەن ىسكەرلىك بايلانىسقا باسىمدىق بەرىلگەن. ماسەلەن, تەلەكوممۋنيكاتسيالىق جانە باقىلاۋ جابدىقتارى, كاتودتى قورعاۋ ستانسالارى مەن اۆتونومدى گيبريدتى قوندىرعىلار, سونداي-اق قۇبىر ونىمدەرىنىڭ ءبىر بولىگى وتاندىق وندىرۋشىلەردەن ساتىپ الىنعان.
«ماڭعىستاۋ وبلىسىنداعى كەندەرلى كەنتىندە سالىناتىن زاۋىتتى جوبالاۋ جۇمىستارى جۇرگىزىلىپ جاتىر. وسى كەزگە دەيىن ينجەنەرلىك-گەودەزيالىق, ينجەنەرلىك-گەولوگيالىق, باتيمەتريالىق ىزدەستىرۋ جۇمىستارى, زەرتحانالىق جانە كامەرالىق جۇمىستار اتقارىلدى. بولاشاقتا بۇل سۋ تۇششىتۋ زاۋىتى «استراحان-ماڭعىشلاق» ماگيسترالدى سۋ جەلىسىنە تۇسەتىن جۇكتەمەنى ازايتادى. ال قايتا جاڭعىرتىلعان «استراحان-ماڭعىشلاق» ماگيسترالدى سۋ قۇبىرى – ستراتەگيالىق ماڭىزدى نىسان. ويتكەنى اتىراۋ وبلىسىنىڭ قۇرمانعازى, يساتاي جانە جىلىوي اۋدانىنىڭ, ماڭعىستاۋ وڭىرىندەگى جاڭاوزەن, بەينەۋ, ماڭعىستاۋ, قاراقيا جانە تۇپقاراعان اۋدانى ءۇشىن جالعىز ورتالىقتاندىرىلعان سۋ كوزى بولىپ وتىر. قۇبىرمەن كەلگەن سۋدى ماڭعىستاۋ وبلىسى تۇرعىندارىنىڭ – 35, اتىراۋ وڭىرىندەگى تۇرعىنداردىڭ 28 پايىزى تۇتىنادى. جىل سايىن تۇرعىنداردىڭ سۋ تۇتىنۋى كورسەتكىشى 4-5 پايىزعا ارتىپ كەلەدى», دەدى م.مىرزاعاليەۆ.
«استراحان-ماڭعىشلاق» ماگيسترالدى قۇبىرىنا سۋ ەدىل وزەنىنىڭ ساعالىق سالاسى قيعاشتان الىنادى. ال قيعاش – اتىراۋ مەن رەسەي فەدەراتسياسىنداعى استراحان وبلىسىنىڭ شەكاراسىنداعى وزەن. قوس وڭىردەگى تۇرعىنداردىڭ الەۋمەتتىك جاعدايىن جاقسارتۋ, اتىراۋ وبلىسىنداعى مۇناي-گاز ءوندىرۋ جانە ونەركاسىپتىك كاسىپورىنداردىڭ, سونداي-اق «ۇلتتىق يندۋستريالدى مۇناي-حيميا تەحنوپاركى» ارنايى ەكونوميكالىق ايماعىندا ورنالاسقان مۇناي-حيميا ءوندىرىسى جوبالارىنىڭ توقتاۋسىز جۇمىس ىستەۋى اتالعان قۇبىرمەن ۇزدىكسىز جەتكىزىلەتىن سۋمەن بايلانىستى بولىپ وتىر. سول سەبەپتەن «استراحان-ماڭعىشلاق» ماگيسترالدى سۋ قۇبىرىن قايتا قۇرۋ جانە كەڭەيتۋ جوباسى بەلگىلەنگەن مەرزىمىنەن ءبىر جىل بۇرىن ىسكە قوسىلدى.
«جوباعا سايكەس ەندى سۋ قۇبىرىنىڭ وتكىزۋ قۋاتى تاۋلىگىنە قوسىمشا 60 مىڭ تەكشە مەترگە ارتادى. قۇبىر ارقىلى كەلگەن سۋ تۇرعىنداردى, ونەركاسىپ پەن اۋىل شارۋاشىلىعى سالاسىن سۋمەن تۇراقتى قامتاماسىز ەتەدى. بۇل قۇبىردى جاڭعىرتۋ جۇمىسى الداعى ۋاقىتتا جالعاسىن تابادى», دەدى م.مىرزاعاليەۆ.
ينفراقۇرىلىمدىق جوبانى «قازمۇنايگاز» ۇك» اق باسشىلىعىمەن «ماگيسترالدى سۋ قۇبىرى» جشس جۇزەگە اسىردى. وتاندىق مۇناي-گاز كومپانياسى بىلتىر ماڭعىستاۋ وبلىسىنىڭ «قاراجانباس» كەن ورنىندا تەست رەجىمىندە جەراستى قاباتىنداعى سۋدى تۇششىتۋ زاۋىتىن ىسكە قوسقانىن اتاپ وتكەن ءجون.
«استراحان-ماڭعىشلاق» ماگيسترالدى سۋ قۇبىرى جەلىسىندە ۇزاق جىل جۇمىس ىستەگەن ارداگەر حاميت قابىلوۆتىڭ ايتۋىنشا, ەندى جاڭعىرتۋ جۇمىسىن قۇلسارى قالاسىنا دەيىنگى, ودان ءارى ماڭعىستاۋ وبلىسىنداعى بولىگىندە جالعاستىرۋ قاجەت. ويتكەنى تۇرعىندارعا دا, وندىرىستىك نىساندارعا دا سۋ تۇراقتى جەتكىزىلگەنى ءجون.
اتىراۋ وبلىسى