بۇل كۇندەرى قازاقستاننىڭ فۋتزالشىلارى 2014 جىلى وتەتىن الەم چەمپيوناتىنىڭ ىرىكتەۋ تۋرنيرىندە قىزۋ دايىندالىپ جاتىر. الدا جەرلەستەرىمىزدى ەڭ ماڭىزدى ماتچ كۇتىپ تۇر.
ەرتەڭ قازاقستان قۇراماسى استانادا نيدەرلاندتى قابىلدايدى. تۋرا ءبىر اپتادان كەيىن بۋحارەستكە ساپار شەگىپ, رۋمىنيامەن شەبەرلىك بايقاسادى. بۇل باسەكەلەردە ۇلتتىق كوماندامىزدىڭ باس باپكەرى ريكاردو كاكا مىنا شاكىرتتەرىنە سەنىم ارتتى: قاقپاشىلار – يگيتا, نارۋن سەرىكوۆ, قانات جەتكىرباەۆ. الاڭداعى ويىنشىلار – دۋگلاس, ءبىرجان ورازوۆ, لەو, ازات ۆاليۋللين, تاينان, ەدسون, لەو, البەرت اقبالىقوۆ, شىڭعىس ەسەنامانوۆ, دامير قايىرباي, ارنولد كناۋب, ءابدىراسۋل ءابدىماناپ ۇلى, داۋرەن تۇرساعۇلوۆ, نۇربولات باتىرحانوۆ, اقجول ءدارىباي جانە اسحات كولباەۆ.
جارىستىڭ فينالدىق بولىگىنە بىردەن جولداما الۋ ءۇشىن فۋتزالشىلارىمىز مىندەتتى تۇردە ءوز توبىندا جەكە-دارا كوش باستاۋعا ءتيىس. ەكىنشى ورىندى ەنشىلەگەن جاعدايدا ەلەكتىك كەزدەسۋلەرگە قاتىسۋعا تۋرا كەلەدى.