مانەرلەپ سىرعاناۋدان حورۆاتيانىڭ استاناسى زاگرەبتە ۇيىمداستىرىلعان «چەلەندجەر» ساناتىنداعى Golden Spin تۋرنيرىندە ميحايل شادوروۆ تابىستى ونەر كورسەتتى.
قىسقا باعدارلامانى جەرلەسىمىز ءۇشىنشى ورىنمەن قورىتىندىلادى. 82,85 ۇپاي جيعان ميحايل جاتتىعۋدىڭ بۇل تۇرىندە الەم چەمپيوناتىنىڭ ەكى دۇركىن قولا جۇلدەگەرى, ء«تورت قۇرلىق بىرىنشىلىگىنىڭ» جەڭىمپازى, قىتايلىق تسزين بويان (91,25 ۇپاي) مەن ەستونيالىق الەكساندر سەلەۆكودان (83,58) عانا قالىپ قويدى. ەركىن باعدارلامادا 19 جاستاعى قازاقستاننىڭ ورەنى ەكىنشى ورىنعا (152,47) تابان تىرەدى. جارىس قورىتىندىسى بويىنشا ول كۇمىس مەدالدى يەلەنسە, جوعارىدا ەسىمى اتالعان بالتىق جاعالاۋىنىڭ وكىلى قولا جۇلدەنى قاناعات تۇتتى. ال قىتاي ەلىنىڭ اتاقتى مانەرلەپ سىرعاناۋشىسى التىن تۇعىرعا كوتەرىلدى.
ءسويتىپ, ميحايل شادوروۆ بيىلعى ماۋسىمدا ءوزىنىڭ ەكىنشى جۇلدەسىنە قول جەتكىزدى. وسىدان ءبىر اي بۇرىن عانا ول قىتايدىڭ چۋنتسين قالاسىندا وتكەن گران-پري دوداسىندا ءۇشىنشى ساتىعا جايعاسقان ەدى.