استانادا ارالاس جەكپە-جەكتەن «Naiza 55» ءتۋرنيرى ءوتتى. بۇل جارىستا قازاقستان, برازيليا, جاپونيا, رەسەي, ازەربايجان جانە قىرعىزستاننىڭ سپورتشىلارى سايىسقا ءتۇستى.
جاقسىلىق ۇشكەمپىروۆ اتىنداعى سپورت سارايىنا جينالعان سان مىڭ جانكۇيەر جالعاس جۇماعۇلوۆتىڭ (14-9) ايقاس الاڭىنا شىققانىن تاعاتسىزدانا كۇتتى. كەزىندە ول رەسەيلىك «Fight Nights Global» ۇيىمىنىڭ چەمپيونى بولعاننان كەيىن UFC-مەن كەلىسىمشارتقا وتىرعان ەدى. الايدا الەمنىڭ ەڭ بەلدى پروموۋشەنى ۇيىمداستىرعان ءدۇبىرلى دودالاردا قانداسىمىزدىڭ جولى بولمادى. 7 جەكپە-جەكتىڭ التاۋىندا جەڭىلگەن جۇماعۇلوۆ قايتا ەلگە ورالدى. استانادا 35 جاستاعى ساقا سپورتشى جاپونيالىق ماساتو ناكامۋرامەن (9-7) جۇدىرىقتاستى. بۇل باسەكە ۇزاققا سوزىلعان جوق. جالعاس قارسىلاسىن ءبىرىنشى راۋندتا-اق اۋىر سوققىسىمەن ۇرىپ جىعىپ, ءدۇيىم جۇرتتىڭ قوشەمەتىنە بولەندى.
ەلوردا تورىندە وتكەن جارىستىڭ باستى جەكپە-جەگىندە دياس ەرەنعايىپوۆ (14-3) پەن جاپونيانىڭ تاعى ءبىر فايتەرى رۋي فۋكۋدا (21-7-1) «Naiza» ۇيىمىنىڭ التىن بەلبەۋىن ساراپقا سالدى. بۇل ايقاستا دياس ۇپاي سانىمەن جەڭىسە جەتتى.