يندونەزيادا فۋتبولدان جاسوسپىرىمدەر اراسىنداعى الەم بىرىنشىلىگى (U-17) ءوز مارەسىنە جەتتى. 23 كۇنگە سوزىلعان جارىستا جەر-جاھاننىڭ ءار قيىرىنان جينالعان 24 كوماندا باق سىنادى.
ءدۇبىرلى دوپ دوداسى گەرمانيا قۇراماسىنىڭ جارقىن جەڭىسىمەن اياقتالدى. توپتىق تۋرنيردە مەكسيكا (3:1), ۆەنەسۋەلا (3:0) جانە جاڭا زەلانديانى (3:1) ۇتقان ولار 1/8 فينالدا اقش-تى (3:2), ¼ فينالدا يسپانيانى (1:0) جانە جارتىلاي فينالدا ارگەنتينانى (3:3, پەنالتيدەن 4:2) جەڭدى. شەشۋشى تۇستا فرانتسيامەن 2:2 ەسەبىمەن تەڭ وينادى. بۇل ماتچتا العاشقى ەكى دوپتى نەمىستەر سوققان ەدى. سول گولداردىڭ اۆتورلارى – پاريس برۋننەر مەن نوا دارۆيح. 53-مينۋتتا سايمون بۋابر ەسەپ ايىرماشىلىعىن قىسقارتتى. 69-مينۋتتا ۆيننەرس وساۆە قىزىل قاعاز الىپ, الاڭنان قۋىلدى. بۇل مۇمكىندىكتى فرانتسۋزدار قالت جىبەرمەي, ارادا ءبىراز ۋاقىت وتكەننەن كەيىن ماتيس امۋگۋ تارازى باسىن تەڭەستىردى – 2:2. ال پەنالتي سوعۋ بارىسىندا شتەففەن فرويند باپتاعان كوماندانىڭ باعى جاندى – 4:3. ءسويتىپ, گەرمانيانىڭ جاس ورەندەرى ءوز تاريحىندا تۇڭعىش رەت الەم چەمپيوناتىنىڭ باس جۇلدەسىن ولجالادى.
ءۇشىنشى ورىن ءۇشىن تارتىس ارگەنتينا مەن مالي قۇرامالارى اراسىندا ءوربىدى. پابلو ايماردىڭ شاكىرتتەرى وسى كەزدەسۋدىڭ فاۆوريتتەرى سانالعانىمەن, قارا قۇرلىقتىڭ وكىلدەرى ولارعا دەس بەرمەدى. ماليلىكتەر باسەكەنىڭ باسىنان تىزگىندى قولعا الىپ, يبرايم دياررا مەن مامادۋ دۋمبيا ءبىرىنشى تايمدا نىسانانى ءدال كوزدەسە, ۇزىلىستەن كەيىن اميدۋ ماكالۋ كەزدەسۋدىڭ سوڭعى نۇكتەسىن قويدى – 0:3. ءسويتىپ, مالي فۋتبولشىلارى قولا مەدالدى موينىندا جارقىراتتى.
وسى جارىستا وزبەكستان قۇراماسى دا ءساتتى ونەر كورسەتكەنىن ايتا كەتۋگە ءتيىسپىز. توپتىق تۋرنيردەن ىركىلمەي وتكەن «الا تاقيالىلار» 1/8 فينالدا ازۋلى انگليادان 2:1 ەسەبىمەن ايلاسىن اسىردى. شيرەك فينالدا ولار فرانتسيادان ءبىر عانا دوپ ايىرماشىلىعىمەن ۇتىلدى – 0:1. دەسەك تە جەر-جاھاننىڭ جالىندى جاستارى جينالعان جارىستا ۇزدىك سەگىز كوماندانىڭ قاتارىنان كورىنۋ وزبەكتەر ءۇشىن زور مارتەبە ەكەنى انىق.