جاپونيانىڭ باس شاھارى توكيودا دزيۋدودان Grand Slam ءتۋرنيرى ءوتىپ جاتىر. جىل سايىن جەلتوقسان ايىندا جالاۋى جەلبىرەيتىن ءداستۇرلى جارىستا قازاقستاننىڭ ساناۋلى عانا بالۋاندارى جەڭىس تۇعىرىنا كوتەرىلگەن. اتاپ ايتساق, 2010 مەن 2012 جىلى ماكسيم راكوۆ, 2012 جىلى يسلام بوزباەۆ, 2014 جىلى رۋسلان ىبىراەۆ جانە 2022 جىلى عالىمجان قىرىقبايدىڭ قانجىعاسى مايلاندى. ونىڭ بارلىعىنا دا قولا مەدال بۇيىردى. ال وسى كۇنگە دەيىن فينالعا بىردە-ءبىر جەرلەسىمىز شىعا العان جوق.
بۇل جولى كۇنشىعىس ەلىندەگى جارىستا قازاقستاننىڭ 20 سپورتشىسى باق سىنادى. العاشقى كۇنى التى سالماق دارەجەسىنىڭ جۇلدەلەرى ساراپقا سالىندى. وكىنىشكە قاراي, بىردە-ءبىر بالۋانىمىز جەڭىس تۇعىرىنا كوتەرىلە المادى. ەرلەر اراسىندا 73 كگ سالماقتا بەلدەسكەن دانيار شامشاەۆ تۇساۋكەسەر كەزدەسۋىندە پولشالىق ادام ستودولسكيگە سان سوقتىرعانىمەن, كەلەسى كەزەڭدە الەم چەمپيوناتىنىڭ ەكى دۇركىن كۇمىس جۇلدەگەرى, ەۋروپا چەمپيونى, يتاليالىق مانۋەل لومباردودان ايلاسىن اسىرا المادى. اسقار نارقۇلوۆ جاستار اراسىنداعى الەم بىرىنشىلىگىنىڭ كۇمىس جۇلدەگەرى, گرۋزيالىق گەورگي تەراشۆيليگە ەسە جىبەردى. 81 كگ سالماقتاعى ابىلايحان جۇبانازار مەن رۋسلان مۇساەۆتىڭ دا جولى بولمادى. ابىلايحان قىرعىزستاندىق اساد ماسابيروۆتان ۇتىلسا, رۋسلان پانامەريكا ويىندارىنىڭ جەڭىمپازى, كانادالىق فرانسۋا گوتە-دراپودان جەڭىلدى. 90 كگ سالماقتا كۇرەسكەن ايدار اراپوۆ پەن ەرماحان انۋاربەكوۆ جارىس باستالعان بەتتە كورەرمەندەر قاتارىنا قوسىلدى. ولار شۆەتسيالىق ماركۋس نيمان مەن ماروككولىق اشراف ءموۋتيدىڭ وسال تۇسىن تابا المادى.
ايەلدەر باسەكەسىندە 77 كگ سالماق دارەجەسىندە باق سىناعان وليمپيا ويىندارى, الەم جانە ەۋروپا چەمپيوناتتارىنىڭ جۇلدەگەرى, رەسەيلىك ءمادينا تايمازوۆا ءبىزدىڭ ەكاتەرينا توكارەۆانى وڭباي ءسۇرىندىردى. اسا اۋىر سالماقتا ونەر كورسەتكەن نازگۇل ماراتوۆا فرانتسيالىق كورالي حايمەگە جارىتىپ قارسىلىق كورسەتە العان جوق. ال كاميلا بەرلىقاش ۆەنەسۋەلالىق ۋردانەتا اماراتادان ايلاسىن اسىرعانىمەن, كەلەسى كەزەڭدە الەم چەمپيوناتىنىڭ كۇمىس جۇلدەگەرى, ەۋروپا چەمپيونى, فرانتسيالىق لەا فونتەننەن جەڭىلدى. جۇبانىش بەلدەسۋدە ول جاپونيالىق كوداما حيكارۋگە جول بەردى.
الداعى كۇندەرى نۇرقانات سەرىكباەۆ پەن ەلدوس سمەتوۆ (60 كگ), نۇرزات سالىمباەۆ پەن عۇسمان قىرعىزباەۆ (66 كگ), نۇرلىحان شارحان مەن بەكارىس سادۋاقاس (100 كگ), عالىمجان قىرىقباي پەن ەراسىل قاجىباەۆ (+100 كگ), عاليا تىڭباەۆا مەن ءابيبا ابۋجاقىنوۆا (48 كگ) جانە ەسميگۇل كۋيۋلوۆا (70 كگ) سىندى بالۋاندارىمىز تاتاميگە شىعادى.
ەستەرىڭىزگە سالا كەتەيىك, توكيوداعى Grand Slam تۋرنيرىندە 84 مەملەكەتتەن كەلگەن 506 دزيۋدوشى كۇش سىناسىپ جاتىر. بۇل جارىستىڭ جۇلدە قورى 154 مىڭ دوللاردى قۇرايدى. تارقاتىپ ايتساق, باس جۇلدەنى ولجالاعاندار 4 مىڭ (+1 000 باپكەرىنە), كۇمىس العاندار 2 400 (+600 باپكەرىنە) جانە قولا مەدالدى يەلەنگەندەر 1 200 (+300 باپكەرىنە) دوللاردى قالتاعا باسادى.