ۇزدىكتەر ساناتىنا قوسىلا المادى

«بەنفيكانىڭ» ازۋلى قارسىلاس ەكەنى داۋسىز. ولار پورتۋگاليا چەمپيوناتى, ەل كۋبوگى جانە ەل سۋپەركۋبوگىنىڭ ار­قاي­سىسىنىڭ باس جۇلدەسىن 8 رەتتەن ولجالادى. 2010 جىلى ۋەفا چەمپيوندار ليگاسىندا توپ جاردى. كەزىندە التى رەت تورتكۇل دۇنيەنىڭ تەڭدەسسىز ويىنشىسى دەپ تانىلعان ريكاردينونىڭ ءدال وسى ليسسابوندىق كلۋبتىڭ ساپىندا جاسىنداي جارقىلداعانىن جانكۇيەرلەر جاقسى بىلەدى. دەسەك تە «قاي­رات» تا وسال ەمەس. جەر­لەس­تەرىمىز 2013 جانە 2015 جىل­دارى چەم­پيون­دار ليگاسىن ەكى رەت ۇتىپ, سول كەزدەرى قۇر­­­لىقارالىق كۋ­بوك­تى يەلەدى. ودان باس­قا دا تولىپ جاتقان اتاق­تارىمىز تاعى بار.

پريشتيناداعى با­سەكە «بەنفيكانىڭ» با­سىمدىعىمەن ءوتتى. 4 جانە 5-مينۋتتاردا كوز­دى اشىپ-جۇمعانشا افونسۋ جەسۋز پەن ديە­گو نۋنەس قاتارىنان ەكى گول سوقسا, 8-مينۋتتا داۋ­رەن تۇرساعۇلوۆ ەسەپ ايىر­ما­شىلىعىن قىسقارتتى. سول كەزدە كەۋدەمىزدە ءۇمىت وتى جىلت ەتتى. بىراق 11-مينۋتتا لۋسيۋ روشا مەرگەندىك تانىتتى. وسى ورايدا ەكىنشى جانە ءۇشىنشى گولدىڭ يگيتانىڭ ورەسكەل قاتەلىگى سالدارىنان قاقپامىزعا ەنگەنىن ايتا كەتۋىمىز كەرەك. بەس رەت الەمنىڭ ەڭ ۇزدىك گولكيپەرى بولىپ تانىلعان ول العاشىندا ءوز ايىپ الاڭىندا قارسى جاقتىڭ ويىنشىسىن الداپ وتەمىن دەپ وپىق جەدى. ەكىنشى رەت قاقپادان تىم ۇزاپ كەت­تى. بۇل مۇم­كىندىكتى «بەن­فيكانىڭ» سەر­كەلەرى قالت جىبەرمەدى. كەز­دەسۋدىڭ اياقتالۋىنا ءتورت مينۋت قالعاندا دەنەر نىسانانى ءدال كوزدەدى. ودان ارىگە الماتىلىقتاردىڭ شاماسى جەتپەدى. ەسەپ – 2:3.

«بەنفيكاعا» قارسى ويىنداعى سات­سىزدىكتەن كەيىن-اق «قايراتتىڭ» «تورتتىك فينالىنان» شەت قال­عانى بەلگىلى بول­­دى. سەبەبى ءار توپتا ءبىرىنشى ورىن العان كو­ماندا عانا كەلەسى جىلدىڭ كوك­تەمىندە شى­مىلدىعى تۇرى­لەتىن ماۋ­سىمنىڭ باستى دوداسىندا كۇش سىناسۋ قۇرمەتىنە يە بولادى. ال مارلون ۆەلاسكو باپتاعان ۇجىمعا ونداي باق بۇيىرمادى. قازاقستاننىڭ فۋتزالشىلارى ونەر كورسەتكەن G توبىندا پورتۋگاليالىق كلۋب وزدى.