سەمەي قالاسىنداعى №44 مەكتەپتىڭ 8-سىنىپ وقۋشىسى جىگەر باقىتبەكوۆ 3D دومبىرا ماكەتىن جاسادى.
وقۋشى جەتەكشىلەرىمەن بىرگە دومبىرا ۇيىرمەسىنە ۇلتتىق اسپاپتى قولدان جاساپ كورمەكشى بولعان. ۆlender باعدارلاماسىندا جاسالعان اسپاپ 4 پلاستيك بولىكتەن تۇرادى. قۇرالدى 3D پرينتەردەن باسىپ شىعارعان, دومبىرانىڭ شاناعىن ەكى بولىككە ءبولىپ, موينىن جانە قۇلاعىن باسىپ شىعارۋعا 15 ساعات ۋاقىت كەتكەن. بارلىق بولىكتى ىستىق جەلىممەن جابىستىرىپ قۇراستىرعان. كادىمگى دومبىرانىڭ ىشەگىن ورنالاستىرىپ, ۇيىرمەدە شەرتۋگە بولاتىن زاماناۋي قۇرال دايىنداعان.
وسىلايشا, اۆتور مەكتەپتە ۇيىرمەلەرگە قاتىساتىن وقۋشىلارعا 3D پرينتەر ارقىلى دومبىرا جاساپ بەرۋگە بولاتىنىن دالەلدەدى. بولاشاقتا دومبىرانى ۇلكەن اۋقىمدا جاساپ, تاعى ەلەكتروندى دومبىرا جاساۋ ءۇشىن اردۋينو باعدارلاماسىن ورناتۋدى جوسپارلاپ وتىر. وسى باعدارلاما ارقىلى اسپاپتى جەتىلدىرىپ, وقۋشىلارعا دومبىرانى شەرتىپ ۇيرەنۋگە ىقپال ەتۋگە بولادى دەپ ەسەپتەيدى اۆتورلار.
«ول ءۇشىن ساپالى 3D پرينتەر جانە كوپ مولشەردە پلاستيك قاجەت, سوندا زاماناۋي دومبىرالاردىڭ سانىن كوبەيتىپ, ۇلتتىق اسپاپتى قولدان وندىرۋگە مۇمكىندىك تۋادى. ويتكەنى ۇيىرمەگە قاتىسۋ ءۇشىن دومبىرانى ساتىپ الۋ كەيبىر وتباسىنا قىمباتقا تۇسەدى, ال وسىنداي مودەلدەۋدە باسىپ شىعارىلعان دومبىرا ءارى قولجەتىمدى, ءارى ۇلتتىق مارتەبەمىزدى ارتتىرادى», دەيدى جەتەكشىلەرى مايرا ەسىمجانوۆا مەن قىمبات تىلەۋبەرديەۆا.
مەكتەپتە جەتىگەن ۇيىرمەسىن اشىپ, پلاستيكتەن 3D پرينتەر ارقىلى جەتىگەندى دە جاساۋدى ويلاعان. ىشەكتەرىن تارتىپ, اسىقتى پلاستيكتەن جاساپ ۇلتتىق اسپاپتىڭ جاڭا ۇلگىسىن ۇسىنباقشى.