ماڭعىستاۋداعى حالىقارالىق تەڭىز ساۋدا پورتىندا جاڭا تانكەرلەردىڭ كەلۋىنە بايلانىستى سالتاناتتى ءىس-شارا ءوتتى. جالپى كولەمى 8 مىڭ توننا مۇناي قۇيۋ تانكەرلەرى «قازمۇنايگاز» ۇك» اق مەن Abu Dhabi Ports Group (ADP) اراسىنداعى ىنتىماقتاستىق شەڭبەرىندە ساتىپ الىندى.
«Caspian Integrated Maritime Solutions Ltd» (CIMS) بىرلەسكەن كاسىپورنى, ونىڭ اكتسيونەرلەرى «قازاقتەڭىزكولىكفلوتى» ۇتكقك» جشس (قمگ ەنشىلەس كاسىپورنى) جانە International Maritime Investments Ltd (ADP ەنشىلەس كومپانياسى) يەلىگىندەگى تانكەرلەر نيدەرلاند كونتسەرنىنىڭ اۋماعىندا قۇراستىرىلعان. كەمەلەردىڭ ۇزىندىعى – 140 مەتر, ەنى – 16,7 مەتر, ال شوگىندىسى – 4,2 مەتر, جىلدامدىعى – 10 توراپ. ەكى تانكەر دە وزىق باسقارۋ جۇيەلەرىمەن جابدىقتالعان, ولار بارلىق حالىقارالىق قاۋىپسىزدىك ستاندارتىمەن ەكولوگيالىق تالاپقا سايكەس كەلەدى.
سالتاناتتى ءىس-شاراعا ماڭعىستاۋ وبلىسىنىڭ اكىمى ن.نوعاەۆ, قمگ باسقارما توراعاسى م.مىرزاعاليەۆ, بىرىككەن اراب امىرلىكتەرىنىڭ قازاقستانداعى ەلشىسى مۇحاممەد سايد ءال-اريكي, ADP باسقارما توراعاسى مۇحاممەد جۇما ءال-شاميسي, «قازاقتەڭىزكولىكفلوتى» ۇتكقك» جشس باس ديرەكتورى ا.ورجانوۆ, وزگە دە قوناقتار قاتىستى.
– بۇل تانكەرلەردى ساتىپ الۋ مەملەكەت باسشىسى قاسىم-جومارت توقاەۆتىڭ وتاندىق كومىرسۋتەك ەكسپورتىنىڭ بالامالى باعىتتارىن دامىتۋ جونىندەگى تاپسىرماسىن ورىنداۋ اياسىندا جۇزەگە اسىرىلدى. ءبىز ارقاشان ءوڭىرىمىزدى جان-جاقتى دامىتۋعا باعىتتالعان بارلىق باستامانى قولداۋعا دايىنبىز. «قازاقتەڭىزكولىكفلوتى» ۇلتتىق تاسىمالداۋشىسىندا ىسكە قوسىلاتىن ەكى مۇناي تانكەرى ەلىمىزدىڭ ەكونوميكاسى مەن كولىك-لوگيستيكا سالاسىنىڭ دامۋى مەن وركەندەۋىنە قىزمەت ەتەدى, – دەدى ايماق باسشىسى نۇرلان نوعاەۆ.
ءىس-شارادا ءسوز سويلەگەن قمگ باسشىسى جاڭا تانكەرلەردى ساتىپ الۋ ارقىلى ترانسكاسپي باعىتىن دامىتۋدا ماڭىزدى قادام جاسالعانىن اتاپ ءوتتى.
–تانكەرلەردىڭ ءبىرى ءباا-دەگى وازيس-Liwa دەگەن مەكەننىڭ اتىمەن, ال ەكىنشى تانكەر تاريحي قالا – تارازدىڭ اتىمەن اتالعان. جاڭا تانكەرلەردى ساتىپ الۋ ارقىلى ءبىز ترانسكاسپي باعىتىن دامىتۋدا ماڭىزدى قادام جاساپ وتىرمىز. وسىعان بايلانىستى بىرلەسكەن جوبانى ءساتتى جۇزەگە اسىرعانى ءۇشىن ستراتەگيالىق سەرىكتەسىمىزگە شىن جۇرەكتەن العىسىمدى بىلدىرگىم كەلەدى, – دەدى قمگ باسشىسى ماعزۇم مىرزاعاليەۆ.
جاڭا كەمەلەر بيىل جەلتوقسان ايىندا قولدانىسقا بەرىلەدى. الىنعان ەكى تانكەر ەلىمىزدىڭ جىلىنا 750 مىڭ توننا مۇناي تاسىمالداۋ جونىندەگى مىندەتتەمەنى تولىعىمەن ورىنداۋعا مۇمكىندىك بەرەدى.
ماڭعىستاۋ وبلىسى